AIGUPTA RAMA HREMNA (Liberal ho sawi dan hi chhiar la enge i ngaihdan ni ve ang le?)

1. TUI THISENA CHANTIR: Exo. 7:14 - 25 thuah kan hmu a, Arona chuan tiang chu ala a, Aigupta lui chungah chuan a lek a, Lalpa thupek ang chuan ati a, Pharoa leh a hote mithmuhah chuan luia tui te chu an vua a, luia tui zawng zawng chu thisenah a chang ta a. Hei hi engtia pawm tur nge? Tui thisena chang tak takah pawm tur nge, lui tui lo sen phut chu thisen angin sawi a ni mai zawk? Lui tui len zual lai July leh August thla angah te hi chuan Nile lui hian a kama lei tam tak a hrut thlak thin avangin lui tui chu thisen ang maiin a sen phut thin a ni. Hetianga lui lianin lui tui a tihsen hi thisen angin sawi a ni bawk thin a ni. Nile lui tui thisena a chan dan thuah hian Thisen tak takah chang lo ni turin ngai ta ila Pathian thu hi dal sawtin kan hria ang em? 2. CHUNGU PUANG: Pathian chuan Pharoa leh Aigupta mite chu a mi Israel te an chhuah theih nan Chungu hmangin a hrem leh ta a (Exo. 8: 1 -15). Aigupta mite zingah chuan Chungu hmanga hremna hi a huatthlala hle ang. A chhan chu an sakhuana a khawih tel tlat vang a ni. rannung thianghlim leh serh a ni a, khuarel inthlahpun kawnga thiltihtheihna entirna a ni bawk. Chubakah chuan Pathian zinga pakhat angin an ngai bawk a ni awm e. Chungu lo puang ta thut hi engtia ngaih tur nge? Nile lui peng chunga Arona tiang lek avanga lo pung ta chiam nge, Nile lui kam chirhdup an ngeih em avanga lo puang ta mai zawk? Pathianin Nile lui kama chirhdup awm hmang hian chungu hi a tipung ta niin ngai ila kan Bible nen hian inkalhin kan hria em le? 3. THOSI/ VAIHMITE PUANG: Biblea kan hmuh dan chuan Arona’n vaivut a tianga a han vuak chuan Aigupta ram chhung zawng zawnga vaivut chu thosi ah alo chang ta tih a ni.Aigupta ramah hian thosi a tam hle thin a, rannung mi seh thei leh zuk thei (insects) tam tak te chu vaivut ah an inthlahpung thin a, chung tho leh rannung mi zuk thei chi te chu Nile lui khawhthla hnu lamah leh dila tui tling ro chho mekah te a tam zual hle a ni. Lehlin thenkhatah chuan helaia rannung hi ‘hrik‘ tih a ni. Rawlinson-a chuan eng emaw hun chhung bikah phei chuan vaivut pawh hi hrik ah an chang ta anga ngaih hial theih a ni a ti. Thosi tam tak ramchhunga awmsa hi Pathianin a thiltihtheihzia entirnan a hmangah ngai ta ila, Pathian thu kan pawm dan a danglam phah ang em? 4. THO PUANG: Tho chi hrang hrang hi Aigupta ramah hian a tam a ni awm e. Grik Bible-ah chuan ‘dog-flies’ (tlip?) tiin a sawi a, ngaihdan tlangpuiah chuan sephung chi khat thil nasa taka tichhe thei nia ngaih a ni. Chu chu a dik anih chuan he hremna hian Aigupta mite ngeng a chhun zual hle ang. A chhan chu sephung hi rannung thianghlim leh serh niin Ni pathian entirna atana an hman thin vang a ni. Ram tichhe viau thei khawp a nih chuan tho satliah niloin sephung chi khata ngaih hi a inawm hle a ni. Thil mak tak chu Israel te awmna bial Gosen-ah chuan an tuar hauh lo mai hi a ni. Tho puang tih chu mithiam te chuan sephung niin an ngai zawk a, nang enge i ngaihdan ni ve le? 5. RAN HRI LENG: Helaia Ran hri leng ah hian Aigupta ran zawng zawng hi a ngial a ngana thi vek tura ngaih hi a dik lo maithei a ni. Engvanga ran hri chu leng nge tih Bible in min hrilh chiah silo a, Sangha leh Chungu thi atang khan chung ran hrite chu tho leh thosi chi hrang hrang te chuan ranah an pu darh ta niin mithiam thenkhatte chuan an ngai. Aigupta mite ran zawng zawng thi veka Israel fate ran erawh pakhatmah thi velo anga kan hmuh hi enge nang i ngaihdan ni ve le? 6. KHAWIHLIA HREMNA: Pharoa chuan Israel fate kal chhuah chu a phal tlat loh avangin Mosia chuan Pathian thupek angin meipui chhehna hmuna vut chu a la a, Pharoa mithmuhah ngei chuan van lamah a vawr ta a, tichuan Aigupta mite zawng zawng chuan khawihli an lo vei ta a ni. Helaia khawihli hi phar chi khat anga sawi a ni ve bawk. Aigupta khawihli chu tihdam theihloh hiala sawi a ni bawk (Deut. 28:27). 7. RIAL TAM TAK: Mosia chuan a tiang chu van lam hawiin a han lek a, rial leh khawpui ri leh tek a lo thawk ta a ni. Aigupta mite ran leh thlai te leh anmahni ngei pawh a deng a, nimahsela Israel mite chuan an tuar ve lo. Pharoa chuan Mosia leh Arona chu a ko a, a sualna a puang a, Pathian hremna la kiang turin a ngen a, Mosia chuan a kut chu Lalpa hnen lamah a phar a, rial tla chu a bang ta a ni. Hetianga leilunga thil thleng thin hmang hian Pathianin hna a thawk thin reng a ni tih hi mithiam tam tak te pawmdan a ni a, nang enge i pawmdan ni ve le? 8. KHAUKHUAP PUANG: Aigupta ramah hian khaukhuap hi a tam hle a, a chang chuan Ni khar hial thei khawpa an thlawh chang awm thinin an sawi. Suria leh Arabia phei chu khaukhuap inthlahpunna hmun a ni awm e. Pathian hremna khaukhuap lo thlen nana Pathian hmanraw pawimawh tak chu khawchhak thli bawk a ni. Khawchhak thli hian Suria leh Arabia vela khaukhuap inthlah pung chiam chu khawthlang lamah a rawn len thla thin niin mithiam te chuan an sawi. Enge i pawmdan ni ve le? 9. KHAWTHIM CHHAH MUP: Mosia chuan a kut chu Pathian thu angin an lamah a lek a, khua chu alo thim ta tih kan hmu.Mithiamte sawi dan chuan hei hi chhumin a hliah avanga lo thleng satliah a ni lo. Chhim lam emaw chhimthlang atanga thli lo thawk thin ‘Khamsin’ an tih nen a inang hlein an ngai a, chu thli chu Aigupta ah hian ni sawmnga chhung vel chu alo thawk phut thin a ni awm e. He thli hian vaivut leh tiauvut te a chhem len chuai chuai thin avangin a thim mup thin a, chutiang khaw thim chuan ni hnih ni thum lai te pawh a awm thei a ni. He hremna hian Aigupta mite leh Israel fate chu thliarin an awm leh ta. Enge i pawmdan ni ang le? 10. FATIR TIHHLUM: Aigupta mite chunga Pathian hremna vawrtawp chu fatir tihhlum hi a ni. Fatir tihhlum hian lalber Pharoa atanga bawih fatir thlengin a huam a. An ran vulh piang hmasa ber pawh a huam tel bawk. An fatir theuh thihna avang chuan Aigupta chhungkaw zingah chuan tahna a lo thleng ta a ni. Chutih laiin Israel fate erawh chu a kal kahlen tih kan hmu thung. Pathianin fatir a tihhlum dan chiah hi Biblein min hrilh lo a, Pathian ngei chu intinah lutin ama kut ngeiin a hmehhlum sak nge, fatir te tan hian hrichhia a lentir bik tih pawh kan hre thei lo. Engpawh nisela an thih dan chu a pawimawh ber lo a, Pathian hian hmanrua a ngah tih hi kan pawmdan mai tur chu a ni.