BELHCHIAN DAWLLO MIZO KRISTIAN!

Mahmuaka Chhakchhuak 09 Dec, 2019 Thlalatuin a duh ang anga awm tirin a thla a laksak a, a fuke engkim mai te chu chiang takin a ti lang a, a thawmhnaw a phelh a, a phelh tir zel a, a tawpah chuan underwear nen chauh a awm ta hial a, a duh ang angin a awm euh tir vel bawk a, thlirtu mit pawng zawr zawr thei khawpin mit ala bawk reng a ni. Tichuan amah, thlalatu chuan a thupsak leh si lo a, a hre ngai loin kan hriat phah a, a hmu lo turte thleng thlengin kan lo hmuh phahin reiloteah thingtlang hmun kilkhawr a thleng thuai a nih kha. A mualpho ber-i lah chu a chenna khua leh tuite chuan ngawi hle hle a thlir bik loin dan awm hauh lo ata dan siam chawpin an khua leh tui atang chuan an hnawtchhuak ta hial a! He thilthleng hi kum reilote liam ta mai chauh a nih kha. He thlalak hi tun hunah uluk takin han thlir leh ta ni ila kan thalai mipaten an Computera an kawl tlat a, an paih phal mai loh – kan mizo thalaite ngei mai thlalak pawh ni mai lo an chelai zawng zawng chiang taka lanna Video te nena khaikhin chuan hnawhchhuah tawktu Nu hnawhchhuah a nihna chhan hi chu Chhungkaw kima thlir tlak zawk a ni hial ang. Hetiang hian kum reilote kal ta khan kan hmuh phak rengah thil thleng a awm a ni. A hnawt chhuaktute khan an dan siam chawp kha tun hun thlengin an la kengkawh reng em? Tih phei chu ka hre phak hauh lo a, khua leh tui atanga hnawhchhuah hial thleng khawpa dan an nei ta a nih hi chuan a kenkawh lamah pawh an inthurual viau turah ka ngai a, vawiin thleng hian midang hnawhchhuah an la neih thawm hriat tur a awm loh danah hian veng pawh an enkawl hneh viau a nih a rinawm. Nakin hun zelah pawh anni veng atang hian thlalak duh dak lo thehdarh an awm a beiseiawm loh a, veng zahawm tak an nih zel pawh a beiseiawm bawk. Nge ni, he veng atang hian hmun dang ang bawkin an thalaite an veng him zo bikloin thlalak mai niloa video leakout palh te hi an lo nei ve tho a, hnawtchhuaktute hian an hnawtchhuak seng tawh lo hial zawk ni ang tihte chu keini hriat phak va ni suh le.. Kan Mizo Kristianna hi a pian a fuh lo nge thlarau nun lama chawmtu kan tuitlan hi a thianghlim tawk lo tih hi bengsika ngaihtuah a ngai a ni. Tuna ka han sawi tak hnawtchhuaktute hi Mizo Hmeichhe Insuihkhawm Pawl (MHIP) an ni an ti a, a hunlai khan an fakawm viau maithei a, an hmingtha viau pawh a ni thei. Nimahsela vawiin hunah erawh chuan veng lehlama ruihhlo an manna hmun chu an OB zing ami a ni daih ang lawi bawk a! hmanni lawkah pawh khan Kohhran Upa nupui hnen atangin damdawi an man tawh bawk a, Uirenu pawh lamtualah a lam zak chuang hauh lo a, hmun pakhata naupiang chu Pastor fa a ni em, ni lo em? Tiin a rukin an sawi sep sep bawk a sin! Hetiang hi kan Zoram kristian dinhmun mek chu a ni a, ‘Zirtir 12 lek zingah pawh amah mantir tu an awm tho alawm’ tiin kan sawi mam lui maithei a, kan vawiin zoram kristianna erawh chu hetiang maia sawi mam chi hi niin ka ngai lem lo. Kan sawi tak angin kan kristianna hi Krista anna kawnga thanglian tur a nih laiin belhchian kan dawl zo tlat lo a, kristianna percentage a hniam zawnga a than danah hian kan thatpui lo tih chu a chiang nghal reng mai. Ram danga kristiante chuan belhchian an dawl a, an kristianna te chu mimalin an thatpui a, khawtlangin a thatpui bawk a, ramin a thatpui bawk a sin. Tunhnaiah HIV hrik pai tam lamah kan thang uak uak a, a ber kan hauh thuai mai bawk a, Laltawngtaina pawh sawi rual thei lo te hian zing tawngtai kan uar em em bawk si a, Politician te aiin Sakhaw rawngbawltuten ram an vei zawk emaw tih mai tura an sawi tam laiin kan Politician te chuan Pathianthu an uar em em ang lawi a, Pathianthu an uar viau e ti lo chuan kan ram hruaitu ber berte chu Eiruk vanga thubuai nei mek te an ni ang lawi bawk a, nimin lawka chil kan chhak khum a, khaw eng pawh hmu ngam lo tur khawpa kan sawi hnawm te pawh vawiinah chuan kuangkuah mai pawh niloin puan tha ber ber sin tirin, a kutah zungbun te kan bun tir bawk a, sualna nei reng reng lo angin kan han sawi leh ang lawi a. Hetianga Lal thutthlenga han thuttir leh thei khawpa Politics zau leh thiang kan han nei hi Kristian suak (pseudo- Christian) kan nihna a ni zawk lawng maw? Pathian Lehkhabu Thianghlim (Bible) te chu In tinin kan kawl fur ngei ang. Nimahsela a chhunga thu tha tak tak awmte erawh chu kan zawm lem hlei chuang lo a. ‘I unauin thil a tihsual chuan zilh rawh; a inchhir chuan ngaidam rawh’ tih thu te hi kan ram hruaitute hian a takin lantir ta hlawm sela kan ram hian malsawmna kan dawn phah hial lawng maw? Tuna kan Politician te reng rengin thil an tisual thei lo te, kawng engkima politician inrawlh ta vek mai te hi ngaihtuah chian ngai tak a ni. Ram dang chanchin sawi nuam kan ti a, kan ram dinhmun ni ve sela tiin kan sawiri fo thin. Anni te pawh chu kum hnih khat maia chutiang dinhmuna thleng chu an ni bik hauh lo nain ram an hmangaihna avangin politics bawlhhlawh lak atanga an filhim thei tlat te chu an ropui bikna a ni. New Zealand ah phei chuan tlem lai deuh tawhah khan Opposition MLA kha a fel leh that em avangin Minister an nih tir an tih kha maw le? Kan Ram, kan ram neihchhun leh kan pianna ram, kan lu nghahna turah hian khawtlang leh ram inrelbawl danah hian ngawi mai mai thei kan ni lo a, tha a kan hriat leh kan duhthusamte chu kan hrilh hriat ngei ngei a ngai a, chu chu kan dikna pawh a ni. He kan ram dinhmun chhe taka awm mek hi khaichhuak turin Politician te chauh kut a ni bik lo a, nang leh kei, kan zavaia kuta awm a ni. He kan State; Hriselna kawnga pachhe ber, Hlamzuih tamna ber, BPL tamna ber, Zu vanga Police thi tamna ber, Cancer tamna ber, nitin HIV vei thar 9 zel awmna leh ziak leh chhiar tamna lama a hniam zawnga thang mek Mizoram hi nang leh kei hian thinlung taka kan vei a hun tawh a ni. Nepolian chuan ‘Khawvel hian hrehawm tam tak a tuar a, a chhan chu misual vang a ni lo a, mi thate an ngawih reng vang zawk a ni’ a tih tak kha maw le…