BUM FIN HLEIHTHEIH LOH MIPUI

Mahmuaka Chhakchhuak May 17, 2020 Kan Politician te hian an mipuite hi min hrechiang hlawm em a, hrui vara min hlingin an duh lam lamah min hnuk min hnuk ta mai a nih hi. Keini lah chuan ‘a ni dawn tak e’ tiin kum hmasa lawka hnim pik leh hling bawn kara min hnuh kual hrep tawhna te chu kan theihnghilh mai bawk a. ‘Piangthar’ tih tawngkam te chu an hman tlakzen bawk avangin vanram kai phahna tur hial khawpa an pianthar kan han ring thei nghal mai bawk si. Saptawnga ‘Crocodile’s tear’ an tih te chu kan hrethiam lo lui a, kan riltam luat vangin kan hre lo lui a nih hi. Zirlai, lungfing chin leh kum upa tak te thleng hian kan ram inrelbawl dan fellohzia kan hre vek a, a fellohna lai tak erawh sawithiam chiah chuang loin ram hruaitu tha kan mamawh zia kan sawi kan sawi leh mai thin. Kan hmuh phak leh kan hriatthiam theih turin kan thenawm hnai mai State te chuan hmasawnna rahbi an rap a, kan tih ve theih ngei tur thil niin kan hriat bawk si avang hian kan ram hruaitute hriatphak turin kan han au ve sateh thin nain aw-chhang vek khawp leh bengchheng khawpa au pawhin awmzia a awm thei ngai chuang si lo. Kum hmasa lam-a kan ram hruaitute’n a hlawm hlawma sum thahnemtham tak an lo sen tawhna te han chhui kir leh hian kan lung a awih theih hlawm em le? Chalfilh tlanga cheng Vbc. 23 vela Khualbuk changkang tak sak te, BAFFACOS sum Vbc. 120 vel zet a hmanna tur niloa hman te, Aizawl khawpuia Lo neitute tuilakna atana pawisa hmin sa cheng Nuaih 73 zet chhheprelh tu Officer hawi-pir dan te chauh hian mipui thin a tirim lo a, UT kan nih lai, rambuai vanglaia Pachhunga College Building a kan vak tuma thubuai chhuitu Aizawl Police OC chawpchilh taka Champhaia transfer thut te, Ruling party office pakhat bula bomb puak te, Suangpuilawn kidnap chungchangte leh Rev. Chanchinmawia thih dan vawiinni thlenga chhuichhuah ala ni lo zel te hian mipui thinlungah ‘engemaw’ a awm tir ta tlat a. MLA Hostel-a hel riah tir tih te, Edenthar-a hel training tir tih te, 2003 inthlan lai a ralthuam chelek chungchang han sawi rik leh pawh tute emaw tan chuan thin ti rim tu a ni thar leh ang tih pawh hlauhawm ru tak a ni. Hman deuha Aizawl khawpui hnuaia Leiverh min sawi hmuh tute chuan Nuaih thum sem an tum vangin kan vote tling a, anni tho chuan Aizawl khawpui traffic jam tih rehna atan Kawngchhawng min tiam bawk a, nimahsela hei kum khat a liam hnuah pawh a ban phunna tur pawh lei laih khuar ala awm chuang si lo. Inti thei taka ‘Field Chhawng’ siam tum tu Minister pawh chuan thenawmte chawhmeh suah lama hming tih that a tum zawk ta mai mai emaw tih turin a che leh daih thung a. Mipui lam lahin fakna aw-rawl kan chhuah leh ta chuai chuai bawk a. Hmanni lawka mipui hriata an party pianthar thu sawitu lah chu vawiinniah chuan che thei loin an hnungkhirh daih ang lawi a. Hetiang vela mipui min bawl kualna hian vawiin thlengin min la bawl kual ta reng a nih hi. Hmangaihna tel loin min khawngaih a, retheihna khur ata talchhuak turin min ti nain a talchhuahna tur ber lah chu min buatsaih sak duh der bawk chuang si lo. Rethei taka min dah tute chuan hun reilote chhunga ei zawh mai theih tur sum fai min sawihmuh leh a mipui lam lahin hmangaihtu ber ah kan ngai lo thei si lo a kan thlang tling leh mai thin bawk si. Nuaih 73 ti botu Officer lamah khan thuneitute an tang tlat niin alang ta ber a, kha sum thahnemtham tak kha riral ta mai mai losela chuan kuthnathawktu engemawzat te’n tui lakna tha an neiin chhungkaw tam tak chu an dinchhuah phah ngeiin a rinawm. Nimahsela chhungkaw intodelh engemawzat awm ta sela voter hlutna a sang dawn si tih an hriat reng vang nge ni intodelh remti lo ang zia zangin rethei takin vawiin thleng hian min la awm tir ta reng chu a nih si hi. Hetianga chung lam atanga mipui min hruai dan hi mi nazawng chuan kan hrethiam thei tlat lo a, hrethiam tlemte te lahin an haider lui tlat bawk si. Tute emaw fingvar deuh te’n bei chiam thin mahsela Party inbeihna ti zawnga an sawi leh tlat thin avangin thui an kal thei chuang hauh si lo. A phusa pawl zinga hming langsarte lah chu vanram kawtchhuah thleng phak lo tur hialin kan chhuah leh daih thungin politics lama chanvo tha beisei ang hial tein kan sawi bawk a. Mahni tapchhak zawla ngawi renga lo thlirtu mipui te lah chuan thu saisa ta nuaihin kan hria a ‘a ni dawn tak e’ tiin thuthlukna kan lo siam leh mai thin bawk a. UT kan nih lai atanga chhut pawhin kum tam tak mahni ro inrelin kan lo awm tawh naa vawiin thleng hian ram mipuite tana chhenfakawm tur rotling kan la nei lo reng hi a chhan han chhuiin han sawi, han sawi thin mah ila vawiin a kan ram roreltute zing ami te hi an lo ni leh tho a. Uirenu ngaihdama pawm leh ang maiin mipui lam bawk hian an diklohna lai sawibo kan tum emaw te hi a ni leh hlauh thung a. Eiruk case nei hial te chu kohhran tal hi chuan chanvo pek loh hi a tih tur ni awm tak a nih laiin Sunday school zirtirtu atan kan iai chuang hauh si lo. Sorkar policies sawiseltu Pastor chhinchhiah duh tawh khawpa Party ruihchilhna rau thuk takin min luah tlat avangin huaisen taka thusawitu Sakhaw rawngbawltu dinhmun pawh alo derthawng ta hialin thihna tawk te pawh kan awm phah ta hial a nih hi. Heng zawng zawng ngaihtuah hian mipui thiam lohna chen a awm ngei ang. Kan Vote khat vanga tling leh kan aiawh tura rorelna hmuna thu tura kan tlan te hi kan chhiahhlawh an ni tih hi kan hriat reng fo a ngai. Kan chunga rorel a, an duh dan dana mipui min thunun tur leh min bum tur hi an ni lo tih hria a, chutiang mi te chu kan hnawl ngam a ni tih lantir hi kan mawhphurhna liau liau a ni. BPL nih zak hauh loa kan la chapopui zawk ta-mah te hian kan ram inrelbawl dan thatloh zia a lantir tih hi hrethiam ta vek ila chuan heti tak hian party politics hi kan ruih chilh hauh lo ang le.