CORONAVIRUS CHAWHCHAWRAWI – III

Mahmuaka Chhakchhuak Sept. 16, 2020 CoviD hri hlauhawmin min chim buai mek laiin kan ram hruaitute chuan Assembly House ah Session an nei a, he kan rorelna hmun sang berah hian engtinnge kan hrileng hi an sawi a, an mipui tan hian ngaihthatna chi a ni a ngem, engtinnge hrileng do letna atana sum leh pai thawhkhawm an hman dan tihte pawh mipui lam chuan kan ngaihven berte zinga mi a ni awm e. Le, tichuan kan lo thlir ta thap hlawm a, vawiin thleng hian kan la sawizui thu leh hla pawh a lo awm ta a nih hi. Sorkarna fawng chelh tute thusawi chu kan bengkhawn ber a ni lo thei lo a, Speaker vei lama thute thu leh hla pawh kan ngaihven lo thei lo bawk. A ngaihnawm kan ti a, a bengvarthlak kan ti a, kum 10 liam tawha Peace Bonus chungchang phei chu kan Chief Minister berin ‘ka phuahchawp a ni, keima phuahchawp liau liau a ni’ a tih tak avangin ram hruaitu ber thilsawi chuan mipui vangtlang zingah kan sawi ta luai luai bakah chanchinbu lam thleng thlengin side A leh side B zawnga sawi a awm reng tak phah a nih hi. Heng kan ram hruaitute thusawi atang hian a lo thlir tute ngei pawhin ngaihdan kan neih hlawm ngei a rinawm a. Thil chiang ta chu; Hripuiin min chimbuai hma March thla atanga ralkhelh dar kan lo khawn rik atang khan kan CM berin sum leh pai tam zia a sawi a, mipui tan chuan a thlamuan thlak viau nghe nghe a nih kha. Nimahsela a tak taka sum leh pai hman alo ngaih takah chuan kan lo neih ta chiah lo nge ni, hman tur a awm ta meuh loh bakah sorkar hnathawk leh ram hruaitu atangte bakah mimal leh pawl hrang hrangte chuan an thawh ta ruih ruih zawk a. Sorkar laipui leh NEC atang ngei pawhin CoviD pual liau liaua sum dawn te pawh kan nei bawk a nih kha. Kan CM ber pawh chuan a thlabi hlawh atangin a thawh ve bawk a, sorkar hnathawk thenkhatte phei chu an thlabi hlawh puk sak te a han ni hial bawk a. Hetianga sum leh pai a luh ruih ruih laiin kan sorkar chuan Hripui chu tunhma lama a zeizia hre tawh ang maiin a che kan ti dawn nge, midang puihna a mamawh lo zawk ni ang, tumah tel ngai tiloin amal beih ta char char zawk a. A tir lam, March thla ah khan laboratory kan neih loh vangin Health Minister-in Prof. Lalnunmawia leh Dr. Vanlalthlana te Civil Hospital RKS Board member an nih avangin laboratory din dan ngaihtuah turin a ti a. Sorkar lam bench-a thu zawk Prof. Mawitea chuan Dr. Mathlana be lovin Dr. K. Pachhunga, Lunglei S MLA a lo be daih a, board member ni ve tho Mathlana chu Opposition MLA a nih vang nge ni thlauhthlakin a awm ta daih a. Hetihlai hian Rt-PCR khawl neitu Prof. Tapan Kumar Dutta, Vety College a mi hi Dr. Mathlana hian a mimal thahnemngaihnaa alo be tawhin laboratory din dan tur a lo sawipui vek tawh nghe nghe a ni. Dr. Mathlana’n 22.3.2020 (Sunday) ah Covid Laboratory siam dan tur sawihona WhatsApp a siam a, chumi group-a sawihona aṭang chuan laboratory siam mai theih dan sawi chhuah a nih avangin dt. 23.3.22020 (Monday) dar 12:30 ah Health Minister-in meeting a ko a, chu meeting-ah chuan doctor leh academician mi engemawzat an tel a. Tichuan Minister chuan Covid-19 Lab Core Team dinin a tuk leh mai, March 24, 22020 (Tuesday) ah Health Secretary Pu H. Lalengmawi IAS hovin 11:30-ah meeting neih nghal a ni a, ZMC-ah kalin a hmun hma tur te en nghal zung zung a. A hmanhmawh theih ang berin hmalak nghal zar zar a ni a, kan hriat ṭheuh angin MZU leh PUC leh Vety College te hmanraw hawh khawmin CoviD laboratory chu 2.4.2020 (Thursday) ah hawn a lo ni ta a ni. He Covid laboratory hawn a nih a, hawh chawpa Rt-PCR khawl bun a nih theihna hi ZPM MLA Dr. Mathlana hmalakna liau liau a ni kan ti thei ang. He CoviD laboratory dinna hian Dr. Hlenmawia RIPANS, Dr. Vanramliana HOD, Bio Tech, PUC, Prof. Senthil Kumar, HOD, Bio Tech, MZU, Prof. Tapan Kumar Dutta, Vetty College, Dr. Gracy, ZMC te, Dr. Hmangaihi te, Pu H. Lalengmawia IAS, Health Secretary leh Dr. Christy, Microbiologist, Presbyterian Hospital, Durtlang te an thawh hlawk hle a. Dr. Christy phei chuan Prof. Senthil Kumar, MZU hnuaia a Ph.D research tihna tur a rawn thawh tawp mai a ni a, a fakawm takzet a, vawiin thlenga hman ala ni ta reng a ni awm e. Dr. Christy hnenah hian kan sorkar hian lawmman tha tawk tak pe ngei sela a tha ngawt mai. Heng bakah hian CoviD beihletna atana sum leh pai thawhkhawm te chu kan sorkar chak tak chuan hmanraw leina atan te a han hmang mauh mai bawk a. Opposition MLA, Pu Lalduhoma’n Rt-PCR khawl leia ZMC a dah a tum pawh chu ngai an ti lo a, a hnu lawkah mimal donate chu lawm takin an dawng leh ta tho bawk te chu mipui atangin zawhna a tam phah ta hle a nih hi. He hripui hi sorkarin midang tanpuina tel loin a beilet thei ti dawn ila mipui leh pawl hrang hrang hnenah sum leh pai dilin kut a dawh bawk si a hriatthiam a ha rang reng hle a ni. Test-na khawl te lah chu CM Relief Fund atangin ram hran daih ami to tak takin an han lei bawk a. Lunglei Civil Hospital tana Oppostion MLA bawk, Zodintluanga dah te lah chu Hospital lamin lawm taka an dawn hnu lawkah an lakchhuah sak leh a, tunhnaiah an dah kir lehin hman lohin ala awm ta reng te hi enge a chhan ni ang tiin hre lo leh hre lo kan inzawt ta vel mai mai a nih hi. Kan ram hruaitute’n Assembly House chhunga an sawi rik atanga lang chiang ta chu kan sorkar hian he kan ramchhung ngeia min chimbuai mek tu Hripui hi an vei tak tak lo em ni tih hi a ni. Mithiam zawk leh a ngaihna hre zawk rawn zau duh loin leh opposition an nih vanga an thilpek dawn sak duh lo te hi neutral taka ngaihtuah pawhin a dik thei lo a. CMRF-a sum thahnemtham tak lut hi duhna hmun hmuna hman tur emaw an ti ni mai hian a hriat bawk a ni. Vawiin thlengin mipuiin nitin hlauthawng takin kan la awm reng a, inven sen pawh ni lo hialin hmun hrang hrangah positive an lo awm leh thut thut thin bawk nen kan sorkar chak tak hian lungawihthlak takin CoviD beihnaah hma la sela heti takin kan phunnawi lo mai tur.