ENGTINNGE MASI HI NI DAWN?

Mahmuaka Chhakchhuak Oct. 19, 2020 March thla chawhnu lam atangin CoviD vangin Biakbukah kan inkhawm thei tawh lo a, khawhar mi tan chuan khawharna tham zet chu a ni ta. A bik takin Biak In enkawltu tan ngat phei chuan a khawharthlak duh ngawtin a rinawm a, khap ngai khawpa naupang bengchheng awm ta lo diak chu a rehin a reh ngawih ngawih a rinawm a, khawram Chhimbuk ang maia khawharin a awm a rinawm hial a ni. Nimahsela kan thu a ni miau silo a le, hetiang reng hian engtikthleng nge kan awm a, nu naute nena Biakbuk kan pan leh theih hun tur hi suangtuahna mai chauh a ni si. Khel loa kan hman thin Good Friday leh Lal Isua thawhlehna ni te chu dan pangngai loh ang deuhin kan hmang zo chu a ni ta phawt a, khang ni pawimawh te kha kum hmasa lamah kha chuan urhsun taka hmangin hlim takin kan hmang a nih kha. Le, Lalpian champha ngei pawh chu kan hma lawkah khian a lo thleng leh mai dawn bawk a, engtinnge ni dawn le? Kan hripui leng lah chuan mi kiansan mai hmel rih si loh a, thinrimthlak viau mahsela thinrimin awmzia a awm chuang si lo a, kum danga kan hmang loh thin ang deuha hman a ngaih hmel ta a nih hi. Kohhran hruaitu leh rawngbawltu chin tan chuan ngaihtuahna hman hun lai tak a niin rinawm a, sorkar lam atang hian Kohhran inkhawm remtihna a awm thut a nih chuan a tha a ni mai ang a, nimahsela chu lah chu tun dinhmunah chuan a rinawm loh bakah a tha kher lo maithei bawk a. Chuti anih chuan Inkhawm pangngai chu a theih loh turah han ngai hmasa phawt ta ila tiin hetiang hian ruahmanna ilo nei chhin teh ang hmiang: THENAWM HNAI/ CHHUNGKHAT HNAITE NENA HMAN HO: Kan sorkar lamin mi 50 chin chu punkhawm a remti turah ngai phawt ila, chuti anih chuan mi 50 tling lo tura ruahmanna siamin thenawm hnai emaw, chhungkhat laina hnaite nena Pathian fak hona tur hmun buatsaih ila. Biakbuk ang chiaha rawngbawlna neih kan tlin em, Thusawi tu tur kan indaih chuan hun hman dan turte pawh sawihona nei ila. Entirna atan, Kristmas inrinna (Dec.24) zan atangin programme hmang tanin Dec. 26 zan thlengin inkhawmna neih kan tlin dawn chuan Thusawitu tur te, tanna hun hmang tu turte leh Inkhawm kaihruaitu turte thlengin a theih chuan ruat ila a tha ngawt ang. Hetianga rawngbawlna nei tur kan remchang lo a, hun hmang tu tur kan tlem deuh a nih pawhin bialtu Pastor sawm hlauh mai ila ava tha zel dawn ve. Pastor alo remchang chiah lo a nih pawhin Pastor pensioner emaw kan Upa zinga remchang emaw hmun hla deuh zawka rawngbawltute emaw sawm mai ila. Chuti a nih loh pawhin keini zing atanga rawngbawlna neih kher ngai lo turin Speaker turin rawngbawltu sawm zawk law law mai ila kan hlawkpui phian thei. Hetianga mi 10 atanga 50 emaw lek leka kristmas hman ho hi kan hlawkpui maithei a, nuam kan ti phian maithei. Tin, sum leh pai sen a tam lo zawk theih mai bakah lungrual pawh a awl phianin a rinawm, zai khawm erawh kan tui lutuk lo maithei a. Chu erawh a hriat lawk theih bik hauh loh mai a, tam vanga zaikhawm tui pawh a ni chiah bik chuang lo a, kim vanga zaikhawm tui te pawh kan lo tih thin tawh kha maw. Zaikhawm lam hi kan lo harsat a nih pawhin sharing neih tlan emaw, Pathianthu sawihona neih te emaw tawngtai rawngbawlna neih ho te leh thil dang dang kan zavaia hman ho theih chi te pawh ala awm ang. Hetianga chhungkaw 3- 5 vel emaw lek leka hun hman ho hi hripui leng vanga hman ni mahsela biakbuka mi 300 emaw a aia tam daih te nena hman ai chuan kan lo hlawkpui daih maithei asin. A thatna dang sawi leh tur awm chu, vawikhat hmannaah chuan kan khawr deuh lo thei lo ngei ang a, a vawihnihnaah chuan kan zei tawh viauin a rinawm. Kan zei zawk mai piah lamah keimahni ngei pawh kan inpawh lehzual zawk ngei dawn a, inngainatna a zual zawk ngei ang. Biakbuk angin puan neuh neuh tur a tam lem lo ang a, zaimi tan zai tuina tham hun a awm ngei pawh a rinawm. Heng lo pawh hi sawi tur ala awm thei bawk ang. RUAITHEHNA TANA SUM HMAN AIA HMUN DANGA SUM HMAN: Mizo Kristiante hian kum za tam ruai nen kristmas hi kan lo hmangin vawikhat pawh hi ruai tel loa kristmas kan hman loh ala awm lo ang atih theih hial a ni awm e. Kohhran hrang hrangte pawh hian Lal piang lawmna ruaitheh hi lohtheihlohah kan ngai tawh ni berin a hriat. A lawmawm reng mai a, nimahsela tun tum erawh hripui leng vanga biakbuka kan hmang khawm thei lo a nih si chuan ruaithehna atana sum leh pai kan thawhkhawm te hi hmun hla zawka rawngbawlna atan hman ava remchang em. Kan rilrem zawng a nih chiah lo maithei a, a thiam pawh kan thiam lo maithei bawk. Nimahsela hripui leng vanga mi 50 aia tam punkhawm a rem loh chuan a huhoa chaweikhawm a rem hmel siloh avangin ruaitheh nana kan sum leh pai thawhkhawmte hi (a zavai phei chuan a rem lo maithei a) ramthim lamah emaw kohhran chhunga chhungkaw harsa zualbik te tlangin emaw damdawiin lamah damlo kanna atante liam tir ta zawk mai ila kohhran ngei pawh hian malsawmna kan dawng zawk lawng maw? Kristmas ruaitheh hi khel loha tel tura ngai ti kan tamin a rinawm, nimahsela hripui leng vanga remchanna alo awm ta hlauh a nih chuan rawngbawlna atan tia hmun danga kal tir hi chunglam duh zawng tak pawh a nih a rinawm. A hnung kan zui ber Lal Isua ngei pawh khan ‘chaw dangral um in phe phe suh u’ a tih te kha hetiang ruaitheh hi a ni lawng maw te ti ila in huatthu ka sawi em lawng chu maw. Krista vang chuan vawikhat ruaitheh loh chu thiam lo viau mah ila kan vui kher dawn em ni. Kan ruaithehna tur sum leh pai lah keini anga Krista la nei ve lo te hnena rawngbawlna atan emaw damlo kanna atan emaw keini aia harsa lehzual zawkte tanpuina atan a ni tih kan hre chiang bawk a, thil lawmawm tak a ni zawk lawng maw le. Chutianga kan ngai thei lo a nih pawhin Krista vanga kan channaah te pawh ngai zawkin chutiang chuan inhnem ta mai ila chunglam pawi kan sawi kher dawn em ni?