HRINGNUN HI – 22

Mahmuaka Chhakchhuak 

22 April, 2020 

Hlawhtlinna kawnga kal kan duhin hlawhtlinna hmun thlen kan duh ṭheuh hlawm ngei ang. Nimahsela hlawhtlinna kawng kan zawh dan erawh a in ang vek lo ang a, hetiang hian kawng khat i han sawi dawn teh ang. Hlawhtlinna kawng khat, kawng awlsam tak nia lang bawk chu ‘Hunawl hman ṭhat‘ hi a ni. 

A bikin Mizote hi ṭawng tuitam chi kan ni a, ṭawng duh mi kan ni ti ila a dikna chen pawh a awm ang. A hun leh hmun hriat loh phei chuan ṭawng duh lutuk hian mi pawi kan sawi palhin mi nin zawng kan sawi palh thei a, an lo ngaihthlak ṭhat loh phei chuan vawk hmaa tuikeplung paih ang chauh a nih theih bawk ang. Hetianga ṭawng duh lutuk hian thil dang kan tih tur tam tak a tihbuai theih avangin a hun leh hmun hriat a ṭha viau. Mizote leh ram changkang zawkte kan in an lohna lian tak chu hun ngaihhlutna kawngah hian a ni. Kan nunphung chu in ang lo a awm ngei a, nimahsela in ang rengah pawh hian tluk lohna tam tak kan la neih reng chu hun hmanṭhat chungchangah hian a ni. 

Hetiang hian han sawi ta ila: 

Hnampui ho reng reng chu kea an kal hian keini Mizo te ang lo deuhin chak tak takin an kal ṭhin a, hriselna atan a ṭhat mai piah lamah hun an ren a, an hmanhmawh vang a ni. Hmuhnawm thlirna hmun a nih loh chuan an kawng kal te reng reng hi an hawi ve hu hu ngai lo a, hmalam chauh enin chak tak takin an kal ṭhin. Entirna atan han sawi ila, minute 10 a thlen theih reng kha anni chuan minute 5 ah emaw an thleng ta a, minute 5 chu thildang tihna atan an hmang thei a, keini aiin hun an hmang hlawk thei zawk tihna a ni. Kawng dang lehah chuan mi an biak reng renga an duh tak an sawi nghal mai ṭhin hi kan tluk loh lehna a ni. An va biakte khan an hun neih dan an hre lo a, emaw rilrua vei an neih leh neih loh pawh an hriat loh avangin hun tlem thei ang ber hmanpui an duh thin. Keini chuan thildang sawi kual hmasain kan sawi duh ber hi a hnuhnung lamah kan sawi thin a, hei hian hun a heh ṭhin viau. 

Nitin hun hi engtinnge i hman ṭhin le? Nang leh keiin kan hun hman ang tho hi mi hlawhtlingte pawh hian an hman a ni a, a darkar pawhin a inzat a, a minute pawhin a inzat reng tho. Nimahsela anni chuan an hun neih chu hlu tak leh ṭangkai takin an hmang a, hlawhtlinna an lo chang thei ta bik ṭhin a ni. A lo thlawnin hun an hmang ral lo a, ṭangkai taka hun an hman avangin anmahni ngei chuan hun hlut zia an hre deuh deuh a, keini anga rualpawlna ang chi hi an nei ve ngai meuh lo. Hetiang hian hun kan hmang ve thei reng tih hi hriata hlawhtlinna kawng kan zawh theihna turin tun hun atan hian ruahmanna kan siam a ngai a, chumi tur chuan hetiang hian i han sawi dawn ta ila; 

Zanah darkar engzatnge mutna atan kan hman? Kan taksa a dam ṭha a nih chuan darkar 6 bak mut tum lo ila, entirnan: zan dar 10 ah mu ila zing dar 4 ah tho leh ila. Chutichuan dar 8 velah chawei leh ila, chawei hma zawng darkar 4 vel chu ṭangkai takin a hman theih tihna a nih chu. Zing dar 7 vela thawha dar 8 vela chawei leh a ngaih bawk si chuan darkar 3 vel chu midangin ṭangkai taka an hman laiin keini chuan mutna atan kan hmang tihna a ni ang. 

 

Office-a kal kan ni emaw mi hnuaia thawk kan nih pawhin zing dar 9 aṭanga tlailam dar 5 thleng vel chhung chu kan duhzawng tihna atan a remchang lo turah ngai chhin ila, mahni hnathawk kan nih chuan darkar tin chu keimahni tana thawk kan nih avangin kan hun zawng zawng kan pe thei a ni. Office hna emaw mi hnuaia thawk kan ni emaw a nih chuan dar chuti zah tia hunbi sawi theih a nih avangin chutiang hun ah chuan ṭhahnemngai taka thawha chumi bak chu keimahni tan hun kan pe thei dawn tihna a ni. Chuti a nih chuan kan hunawl neih chu engtinnge kan hmang tak ang le? 

Hnam changkang zawkte chuan hunawl thawl deuh an neih hian chhungkuaa hman hona atan an hmang tlangpui ṭhin a, khawilai hmunah emaw intihlimin zanriak tein hun an hmang ṭhin. Lawng lianah te chuang chungin hunawl an hmang bawk ṭhin. A ṭhente chuan intihhlimna hmun hrang hrangah zu leh sa te nen hlim takin hun an hmang bawk a, chi hrang hrangin an hmang ṭhin hlawm a ni. Hengte hi keini tan erawh a rem lohna lian tak awm chu hetiang tur hian kan la hausak tawk loh vang a ni ber mai. Chubakah chuan kan society hian ala zo lo bawk. Kan phak tawka hunawl kan hmanna tlangpuite chu khawilai restaurant changkang ve deuh emaw-a chawlh te, lui-a kal te, khawilai hmun emaw-a infiam te leh chi dang dangte a ni. 

Heng kan hunawl hman dan te hi a nuam kan tih vanga hmang nge, kan rilru leh taksa hriselna atan kan hmang nge, enge atana hmang nge kan nih hlawm le? A ṭhente chuan lehkhabu chhiarna atan an hmang bawk ngei ang a, thil engemaw zirna atana hmang te pawh an awm bawk ang, a ṭha vek. Mahni leh chhungkaw tan emaw midang tan emaw-a ṭangkai tura kan hmang a nih loh chuan kan hunawl neih leh hman ṭhin hi a uihawm viau thei a ni. Time is Money tia hnampui hoin an lo sawi ang hian nang leh kei pawh hian hlu tak leh hriatreng tlakin hunawl kan neih thui deuh leh thui lo deuh te hi kan hmang ve thei reng a, hlawhtlinna rahbi thar rah ṭanna atan te hial kan hmang thei bawk a ni. 

 I hun i hmang ṭha em le?