HRINGNUN HI – 24

Mahmuaka Chhakchhuak Sept. 10, 2020 Mi pangngai nih ve a, kan kumin alo phu ve tawh bawk hrim hrim hi chuan eng kawng kawngah emaw chuan kan kianga mite hian min lo hmu pangngai ve viau maithei thin. Chutianga mi pangngai ang taka min hmuh takah chuan eng pawl pawlah te emaw hian min han hnuk lut a, thil sual phei chu a ni hauh chuang lo. Kan tlin leh fel em em vang pawh ni chuang hauh loin chanvo te min han bel nawk nawk a, kan phu lohin nihna sang kan chelh a, kan cho rual lohin dinhmun sangah din chang alo awm bawk thin. Hetiang hunah tak hian ka thei tak emaw tih a awl viau a, a tir atanga min dawm kang tute leh tun huna min thlen tu kan thiantha te mai bakah kan thawhpui te aia thei ta emaw tha zawk emawa inngaihna a awm fo thin. Hei hi a dikna takah chuan kan chapo vang a ni chawk. Chapona hi a chhe zawnga sawi vek a rem lohna a awm thei ang. Lal Isua ngei pawh kha a damlai niah khan Pa thu zawmin hun a hmang a, Pa thutiam tihhlawhtlin tumin nitin zantin hun a hmang a nih kha. Khang zawng zawngah khan mita hmu tute mit tikham tur angin a awm chang a awm thin a, a mission tihhlawhtlin a tum ber vangin thenkhatte tan chuan Chapo tia sawi theihna tur a tamin a rinawm. Nimahsela a thiltih chu chunglam remruatna a nih vek vang erawh chuan a chhe zawnga lo sawi erawh a rem lohna a awm thei bawk awm e. Hetiang hian keini zingah pawh sawisel leh dem dawn hial hiala thilti kan awm fo theiin a rinawm a. Kan chunga mawhphurhna min bel ang hian tha taka thawk emaw kan intih laiin thenkhatte chuan a ni lo zawng hian min lo sawi leh thin. A nih loh pawhin engemaw ti taka hriatthiam theih tur ang zawngin a ni lo zawng emaw hian min lo sawi thei thin a ni. Hetiang hi khawvel awmchhunga awm reng tura ngaih tur a ni a, chutiangah chuan pawmdan nghet tak kan neih a ngai ngei ang. Min sawiselna tur awm miah lo chuan tu mihring mah hi kan fel famkim lo tih hi pawm tlat tur a nih rualin a tha thei ang bera thawh erawh kan tum tlat tur a ni. Sawiselna huat ringawt te hi mi puitling lo zia a ni a, sawiselna awm miah lo tur erawh chuan tumah hian hna kan thawk thei bawk lo a ni. Chutih reng lai chuan kan chanvo chu a nihna ang taka thahnemngai taka kan thawh chu kan mawhphurhna a ni si a. Min lo sawiseltu awm mahsela min sawiselna chu a dik chuan pawm mai tur a ni a, sawisel ngai tawh lo tura insiamthat chu kan tih tur hmasaber a ni. Thufing pakhat chuan ‘miin vawikhat a tihsual chuan ama thiam loh a ni lo a, vawihnih a tihsual erawh chuan ama thiam loh dik tak a ni tawh a ni’ a ti a. Min sawiselna ang chiaha sawisel ngaia kan awm nawn leh chuan keimahni thiam loh a ni tawh tihna a nih chu. Sawiseltute sawisel let ve mai loin lawm takin min sawiselna chu kan pawm tur a ni a, insiamthatna atan kan hmang tur a ni. Chutah ngei chuan puitlinna kawngah kan kal zel thei zawk ang a, hmasawnna rahbi sang zawkah kan chuang thei dawn tihna a ni. Hetianga hmasawnna rahbi rap duh lo a, naupang chhe rilru nei reng ang maia sawiselna haw chi kan nih chuan kum thar apianga kan kum pung zel angin keimahniin puitlinna kawngah kan thang thei ngai lo ang. He hringnun chu hnunglam hawi loa hmalam chauh thlirna tur a nih vangin kan mit chuan hmalam kan thlir reng tur a ni a, huaisen takin hmalam kan pan zel tur a ni. Eng kawngah pawh hian harsatna a awm vek avangin chu harsatna chu inzirna atana hmangin hmasawnna rahbi atan kan hmang thin tur a ni. Aizawl pa hausa hlun mualliam tawh Pu Buangthanga te, Pu Hauva te leh mi dang dangte chanchin kan hriatin an nun kawng zawh bumboh zia kan hre thei awm e. Nimahsela thlantui luang zawih zawiha an thawhna chuan hahdamna a thlenin sum leh paiah ngei pawh malsawmna an lo dawn phah ta zawk a. Thlantui mai bakah thinlung hliam tu leh ti na tu tam tak an tawng ngei bawkin a rinawm a, khawhar tak chunga eizawnna kawng an zawh ni pawh a awm ngei ang. Chung zawng zawng paltlang chuan mi baka kalin an tha an ti chak lui a, an chhelna rah chu an tu leh fate thlengin seng tur an lo neih phah ta a nih hi. Chunglam thupekah ngei pawh chhelna nei tura min tihna hmuh tur a tam mai a, hla-in ‘mihring chauh lo chu zirtir an ngai lo’ ti tein Pathian fakna kawngah pawh mihringte hian zirtirna kan mamawh fo thin. Hei hi a chhan nia lang chu mihring hian malsawmna kan dawn hi kan chhiar thiam lo a, lawmna leh hlimna chauh emaw hi malsawmnaa kan chhiar thin vang a ni. Mosia ziakah chuan ‘Mupuiin a bu a no a chawk tho a, thlaa a chawi a thlawh a zirtir thin angin….’ Tih thu kan hmu a, mupuite hian an bu atangin an no te hi vansang takah an thlawhpui thin a, tichuan an thlahin anmahni chuan thlawh an zir ta thin a ni. Hetiang hian mihring hian Pathian malsawmna kan dawn dan hi lawmna leh hlimna hmunah chauh chhiar loin harsartna leh hrehawmna hmun atang pawh hian chhiar thiam ta thin zawk ila hringnunah hian zirlai zir thiam kan ni ngei ang le. Mizo upa te’n ‘Zangkhua pawhin bungbut hun a nei’ an tih angin thil reng reng hi pangngai reng leh hlun tur reng hi alo awm lo a, chutiang bawkin keimahni ngei pawh hi kan pangngai reng thei hek lo. Mittui tlakna a awmin a hnu lawkah lawmna kan tawng leh a, lungngaihna kan tawhin a hnu lawkah hlimna leh thlamuanna kan tawng leh mai bawk thin. Chutiang khawvelah chuan nang leh kei hi kan chen tlat avangin kan hmalam hun chu keimahni thu thu a nihna a awm a ni. I duh chuan indawm kun reng theihna tur chhan i nei thei, i duhthlanna bawkin thlantui luang zawih zawih chung rengin i kal lui thei bawk e. Thuthlukna chu i kuta awm a ni.