HRINGNUN HI – 26

Mahmuaka Chhakchhuak Oct. 12, 2020 Tuk khat chu kan farnu neih chhun, kan unaua upa ber Mami dam loh thu hi ka nauin min rawn hrilh thut maiin zankhat damdawiinah lo riak tawhin Aizawl lama phurh thlak an tum thu min rawn hrilh a, ka rilru a buai hman teuh hle mai. 2016 kum khan ka nu dam loh thu min rawn hrilh tawhin kan thlen meuh chuan a pangti lum pawh kan dek hman tawh lo a ni a, damdawi man atan cheng khatmah kan seng hman loin rang takin van kohna alo chhang tawh a, tunah mami damloh thu han hriat leh pawh chu ngaihtuahna a kal thui duh viau a ni. Tih theih dang ka neih ka hre lo a, Pathian hnenah ka tawngtai ringawt a, a kutah engkim ka hlan a, a niin tha a tih dan danin rorelna nei zawkin chu chu lawm taka pawm mai turin keimah ngei pawh ka inbuatsaih nghal a. Pathian hnena innghah hi a tha ber kan tih rualin kan innghat zo thin lo chu a ni ber mai zawk a, ‘rin tlem te u’ tia Lal Isua tawngkam pawh kha alo dik ngawt mai. Rinna chak neih hi a har kan ti a, Pathianah beidawnna hial kan neih phah thin. A ni chuan kan duh dan leh tha kan tih dan lam ngaihtuah lo leh min rawn miah loin rorelna a nei mai zawk a, a kuta engkim hlana in surrender zawk mai turin min duh thin. Dam kan duh a, hrisel kan duh a, hlim kan duh a, sum leh pai neih te pawh kan duh bawk, chung zawng zawng chu nei ta vek ila he mihring tisa hian a dawng zo meuh ang maw? Pathian hnen atanga dawng inti chung hian Pathian hlat phahna atan emaw Pathian duh loh zawng tih phahna atan te hian kan lo hman phah thei zawk a sin. Hausa tlak lo mihring te, malsawmna dawng tlak lo mihringte hi kan awm ve bawk tih hriat a tha ngawt mai. Ka nu boral khan Pathian lakah ka vui hauh lo nain kan neih ve ang anga damdawi man sen ve kha chu kan huamin reilote tal enkawl kan chak a, nimahsela van Angelte khan an thlakhlelh tawh em vang zawk khan an lo ko hmanhmawh tawh zawk alo ni reng mai tih ka hriatin vawiin thleng hian vuina reng nei loin ka lawm nawn fo thin. Zing taka Mami dam loh thu ka hriat pawh chuan mihring tihtheih tlem zia ka hria a, Pathian kutah ka hlan mai zawk a, a duh chuan a ti dam thei a, a duh chuan a nunna pawh a laksak thei tih ka hrereng. Hmun hla tak atanga mangang taka ka lo awm kha thil tha lo tak a ni zawkin thil tul lo tak a ni bawk thei. Thinlung takin Pathian hnenah tawngtaina ka nei a, rinna chak tak neih ka tum zawk mai a ni. Pathianthuah kan hmu a - Antam mu fangkhat rinna neih chungchang pawh Lal Isua ngeiin tehkhinthu hmanga a sawi kan hriat kha. Khawvelah hian engkim hi midang hnena thlenga an neih vek bik tur a ni lo a, kan neih ve tur leh kan chanvo tur hi alo awm ve zel mai. Hei hi a tha lam thil chauh sawina a niloin a chhe lamah pawh a dik a, thihna leh vanduaina dang reng rengte pawh hi kan chanvo a ni vek thei. Joba chanchin kha kan hre hlawm ngei ang, a thiantha tak tak 3 te khan ram hla tak atangin an rawn kan vang vang a, sawi tur pawh an ngah hlawm ngeiin a rinawm nain Joba kiangah khan ni 7 ngawt mai ngawi rengin an thu a nih kha. A natna chu na emin an hria a, biak mai ngam chi niin an hre lo hial a. Harsatna kan tawhin emaw thihna hial pawh kan tawh vanga Pathian laka kan vui mai chuan ringtu kan nihna hi enge maw awmzia awm ang le? Mihring danin kum puitling rual kan nih ve tawhnate, then leh rual te tana mi pangngai anga kan lo awm ve tawhnate ngei pawh chu thaichhiatin a awm ang a maw? A teuh lo mai. Pathianah piantharna nei tawh ka nih a, ringtu tha ka lo intih ve tawh phei chuan hetiang harsatna vanga Pathian laka vui mai tur ka ni lo. Pathian hian chu natna emaw thihna emaw chu kan tana tha tur zawka ruahmanna a neih vang zawk tih hi kan hriat hmaih loh atana tha tak chu a ni. Pathian hian khawvelah hian awmze nei loin min din lo a, eng kawng emaw tala tangkaina nei turin min din a ni tih hi hrereng ila, chu min din chhan chu hre turin amah i hnaih fo thin ang u. Kan thiltihna eng emawah kan tluang lo a nih pawhin a aia tha turin inbuatsaih thar leh ila, Lalpaah chuan inti chak fo thin ang u. Pathian chuan khawvelah hian tunge i nih tih hi lantir a chak a, chutih rualin i nihna lantir thei ngai miah lo turin setana’n hmanraw hrang hrang hmangin lem ral che a tum bawk a ni. Nangmaha Pathian leh setana inbuanna kha i hre lo ang a, enge maw hlekah chau takin ilo awm mai palh ang e. Rinnaa pasaltha mual liam tawh tam takte khan nang leh keiin kan tawrh aia tam leh nasa zawk hi an lo tuar nasat tawh bakah an lo tuar chhuak tawh a sin. Khawvelah tihhrehawmin awm mahsela vanah chuai thei ngai lo tur lawmman an dawng bawk a. Engvanginnge nang leh kei hian kan theih loh bik ang ni? Rethei berah in ngai mah ila keini aia harsa zawk hi an lo awm ve zel tho mai thin te hi Pathian hnena lawmthu sawina tur a ni a, keini aia tuar nasa zawk te hi an lo tam mai tih te hi hrereng fo ila a tha ngei ang. Mi tam tak inawhhlum chhante hi ngaihzawng vang te, retheihna vang te, mahni hniam bika inngaih vangte leh thil dang vangte a ni hlawm ang, chungtiang khawpa hrehawm leh nasa chu nang leh kei hian kan tawng ve thei tih hi theihnghilh ngai lo ila, Khawvelah hian enge Pathianin min din chhan tih ngaihtuah chungin kan nihna dik tak lantir turin huaisen takin hmalam i pan zawk fo thin ang le. Thim zingah Eng chu alang fiah bik thin si a…..