JOBA NATNA KHA

Mahmuaka Chhakchhuak 

 Joba Lehkhabu hi Hebrai Bible ah chuan Hlawm thumna Kethubim (thuziak te) tih huangchhungah a awm a, ’Iyyob’ an ti a ni. Greek Bible lamah thung chuan Poetry and Wisdom (Hla leh Finna) huang ah awmin ’Iob’ tiin an dah thung a ni. Tin, Joba Lehkhabu hi Mosia’n a vahvaihna hmun atanga a ziak niin kum BC. 1473 khan a ziak zo a ni. 

Joba lehkhabu hian Mihring zinga tuar na lo awm thin leh chu ta Pathian lo tel ve dan chu a buaipui ber a, mihring ngaihdan pawha mi famkim leh mi tha Joba (1;1) chunga Pathian leh Setana inbeihna hmanrua atan Natna thlen tirin leh Tuarna hi mihring sualna avanga lo awm nge, Pathianin min tuar tir thin em ni ? Lo ni ta sela engvang nge? tih zawhna harsa tak tak chu hrilhfiah a ni ta a ni.

JOBA NATNA: Joba Natna hi Bible hrang hrangte chuan hetiang hian an sawi hlawm a: 

KHAWIHLI HNAI NEIA VUNG; ABP, AKJV,ASV, Bishops, ARV2005, BSV, CAB, Brenton, Coverdale, Geneva, Great, KJV, Matthew, LXXE, RNKJV, UKJV, HBS, IHOT+, IAV, JPS-ASVII, KJB:PCE, KJVA, JB2000, EWB-CB, 

KHAWIHLI HREHAWM TAK: Easy English, KJ2000, NHEB, Amp, CEV, WEB, NIV

KHAWIHLI RAPTHLAK TAK: ISV, NLT, MSG 

PAN LEU NASA : HRB, LITV- TSP PAN NASA TAK: CPDV, YLT, 

TAWRHHLELHAWM KHAWPA PAN NASA: DBR, Douay – Rheims 

TENAWM KHAWPA KHAWIHLI NASA: ESV, LEB (Heng lo pawh hi sawi dan dang chi hrang hrang ala awm a, hei hi tawk phawt sela).

 Hetianga Bible hrang hrang ten an sawi ang hian khawihli pan-chhia lam chu a ni ngei ang tih a pawm ngam a, chu chu Phar ang te pawhin a sawi theih bawk anga, nimahsela Joba natna bik tak hi chu Elephantiasis tiin an sawi bik a ni. He natna hi hmasanga ziaktu lar Pliny sawi niin a hnu ah Egypt lamah pawh a lo lar chho zel a, ram lum lamah chuan hmuhchhuah zel a lo ni bawk a, Norway hmar lamah te pawh chuan an lo vei ve zel a, an sawidan hmang chuan hetiang natna hi a tir lamah chuan kutke hmawr lamah a lang hmasa ber a, khupruh a ti zawi a, a hnu ah taksa pum a fanchhuak ta thin a ni. Joba natna bikah erawh hi chuan tumkhatah a kephah hnuai atangin a chhipchhuak thlengin he natna hian a bawh nghal a nih a rinawm. 

 Joba lehkhabu atang hian han en ta ila: - 1. A taksa pum chu panchhiahin a bawh khat vek a (2;7), a taksa hmun tin mai chu a thak neuh neuh tih a hriat reng mai a, a in hiah nan bel keh them (KJV, ETRV, Mizo Bible 1994-95 edition, etc) a hmanga (2;8) 

2. A thiante pathum pawh chuan ral hla tak atang chuan Joba ani tih an hre mai thei lo a, awrawl chhuah meuhin an tap hial a (2;12) 

3. A panchhia chuan a tisa pawh a eichhe hle tih a hriat a, amah Joba ngei pawh chuan Ka vun leh ka tisa hi ka ruh ah a bet a ti hial a ni (19;20) 

4. A panchhia chu a rim pawh a chhe hle a, a nupui tan ngei pawh chuan a rimchhiat thu a sawi a, a unau te tan pawh chuan a inthlahrung hle hial a ni (19;17) 

5. Inchhunga a chenpui te tan ngei pawh chuan tenawm mai niin a inhria a pawn ah, vaivut zingah a thu nitin ta hial a (2;8) 

6. A taksa hmuntin mai ah chuan thoin an bawm thin avangin a lo lung ta nuai nuai mai a, chu mai chu niloin a vun te chu alo puam a, a keh leh thin a (7;5) 

7. A taksa chuan chhiat lam a pan lo thei lo a, a lo cher ta em em mai a (16;8 ) 

8. Pathian chu dem hialin mumang lama la tih thaih angin Joba chuan a sawi a (7;14) 

9. Engmah a ei thei lo a, chaw tak ngial pawh ei dawn sela a thaw a pik tlat mai bawk si a, a rum thawm chu lui luang ri ang maiin a sawi hial a (3;24) 

10. A nunna ngei pawh chu ngai hlu zo loin rek hlum tu awm sela a ti hial a (7;15) 

11. Zanah han mu thin mahsela a natna chuan a seh neuh neuh avangin zankhuain a let a let a (7;4) 

12. A natna avang chuan a vun rawng pawh a lo dum zo ta a, ala khawk thei zui bawk a, a ruh te ngei pawh chu lum vut vut in a hre hial a (30;30) 

13. A natna avang chuan a ke a kawl bun ang hialin a in ngai a (13;27) 

14. Zanah lah chuan a ruh te chu kher ngut ngut in a hria a, a taksa hmuntin mai ah chuan a natna chuan fep sup sup angin a hria a (30;17) 

15. A hmel hmu tu naupang te ngei pawh chuan an hmusit hial a, an nuihsawh bawk nen (19;18) 

16. A natna chu a nat em avangin khaw eng awm lo sela a duh hial a (3;20)