MZ - 01 P 5462

Mahmuaka Chhakchhuak 

1 Feb, 2020 

 Kristmas hma lawk December ni 19 kha a ni a, Aizawl khawpui chu hmuntinah mi chi hrang hrang kan phu suau suau a ni ber a, thingtlang lam pana motor chhuak tur te reng reng chu an bawr thei hlawm hle a, a leng tawk aia tam an chuang em ni tih tur hian an khat luk hlawm mai. Hmun hrang hrang atanga Aizawl khawpui pankhawm an nih angin hmun hrang hrang pana kir leh turte an ni hlawm a, a thente phei chu nunaute nen an ni hlawm bawk a, motor chungah thawmhnaw remkhawmin hmuhnawm thamin an bawr hlawm a. 

Chutih laiin khawpuia awmte pawh awm mai mai bik loin chhungkaw tin te chu kawng hrang hrangin an buai bawk a, a thenin bazar lamah naupangte nen thawmhnaw leh In cheimawina chi hrang hrangte leiin an kal a. Mi tinreng chu Lalpian hun lo thleng mai tur avangin kan buai vek mai a ni. Kei ngei pawh ka buai ve hle mai. Hnathawh laklawh lai deuh ka neih avangin hma taka Office thlen ka tum avangin ka lirthei nen chuan zing lam dar 8;30 velah Office ka thleng pheiin ka thawk mawlh mawlh nghal a, thingpui senhang lumin dawhkanah ka inchhawp hnawk nuaih mai bawk a, mahni tawkah ka buai ve ang reng hle a ni. 

In lama chaw ka ei hman loh avang leh kan bul hnai vela restaurant te an inkhar vek bawk si avangin riltam teuhin chawhnu lam atang phei chuan ka awm a, Apple pum hnih ka pai chu ka duhkhawp lo lek lek hial a. Ka thinlung lah chuan kristmas lam ala hawi thei meuh lo a, ka hna khawih lai chu a pawimawhin, kumthar atana inhmakhuana a nih bawk avangin leh felfai taka bul tan theihna atan lo buatsaih ka duh bawk a ni. A tul zualpui ka zawh deuh hnu chuan dar 5 a lo ri hnai tawh hle mai a haw tumin ka inbuatsaih a, Office tual atang chuan In lam pan bawkin ka lirthei chu ka khalh hawng leh ta a. 

 Thil chi hrang hrang ngaihtuah chunga ka tlan lai chuan hriat loh karin Chanmari ka lo thleng phei a, ka hmaah hian Two wheeler Taxi tlan hi a awm a, Driver hnungah hia hmeichhe naupang thuin driver chu thei leh thei loin a kuah taih mai bawk avang chuan ka mit anla ta riau mai a, ka theih ang anga va hnaih pah chuan ka tlan zel a, chu hmeichhe naupang lah chuan thawmhnaw lum a hak bawk si loh avang chuan vawt a tih viau ka rin bawk avang chuan Driver hnenah chuan ‘kha, khawilam nge in pan dawn a?’ tiin ka be ta ngawt mai a, a ni chuan ‘Zemabawk lamah’ tiin min chhang a, chumi hnuah chuan ka tlan pel mai a, nimahsela Taxi lukhum a khum a, a hnunga hmeichhe naupangin nghet taka a kuah ka hmuh bawk avang chuan hriat belh duh tam tak ka nei nghal a, tlema tlan muang leh deuh hrat hrat pah chuan anni chu ka melh zauh zauh bawk a, ka kiang an rawn hnaih veleh chuan ‘Kha, i fanu em ni?’ tiin ka zawt leh a, a ni chuan ‘ni lo e, hei bazarah chawhmeh alo zuar a, a haw-na tur ka zawt a, a hlat bawk bakah a tlai tawh bawk si a, ka va thlah dawn a nih hi’ tiin min chhang leh ta a. 

Tun ang hun, taxi driver tana passenger tam hun lai taka hmeichhe naupang Zemabawk thlenga va thlah tur chu fel ka ti hle mai a, ka ngaihtuahna a kal thui phah viau a ni. He hmeichhe naupang ka hmuh hi mi awmthei chhungkua atanga seilian a ni lem lo tih a hriat ngawih ngawih a, a kekawr chu a rawng a dak tawh mai bakah a elastic a dul tawh tih hriat takin a mawng kekehkak thlengin a lang thei vek hial a, a under wear pawh ka lirthei eng-a ka chhun fuh pawhin a thar lam tawh lem lo tih pawh ka hre nghal thei mai bawk a. T. Shirt hlui tawh lam, a thar laiin eng rawng nge ni ang tih pawh sawi thiam har tak tawh tur hi a ha bawk a, a sam chu a thur deuh bam bawk nen chuan engmah ni bik lem lo hian ka khawngaih ta riau mai a, min tlan pelh hnuah chuan ka thinlung chu an hnena awm rengin Driver hnenah chuan ‘keima’n ka lo thlah zawk ang chu’ tia va tlawmngaih te pawh ka duh hial a. A nih loh pawhin ka pawisa neih ang ang tal pek te pawh ka duh a, Driver hming tal zawt ila, a phone number te pawh dil ila, ti a thil chi hrang hrang ka ngaihtuah lai chuan anni chu hla takah an tlan tawh bawk si. A remchan laiin ka lo ti mai lo kha aw tia mahni inthiam lo tak chungin ka phun mawlh mawlh a, nimahsela Two Wheeler Taxi number chu ka chhinchhiah hman hlauh avangin theihnghilh leh hlauh takin kawngsir pan rawk rawkin ka ding chawt a, ka Cell phone pawrh nghalin Note- ah chuan ‘MZ - 01 P 5462’ tih chu rang takin ka ziak ta a. Engtik niah emaw chuan hmuh hun ka la nei ngei ang a, chibai buk pahin lawmthu ka la hrilh mawlh ang maw le ti rilru rauh rauh chungin In ka lut ta a. Nia, tun Kristmas boruak karah khan mi fel tak takte chuan pawisaa mi harsa zawkte tanpuina an pe tih thawm kan hre hlawm ngei ang a, mimal ang te, pawl ang te pawha pe te sawi tur hria kan awm ngei ang. Hetianga luanchhuah duhna thinlung nei te hi alawm Kristian tak tak tia chhal a, Kohhran mi tia sawi tur chu. An hming bula Reverend tih te, Upa tih te leh hming tawp lama engmah dah tur nei lo te an ni thluah hlawm lehnghal a, sum leh pai lam lah nei le lu an ni kher chuang hauh lo te chu an rilru hi Chunglam lawm zawng ni hian ka hre tlat a, ka fak lo thei lo a ni. Chutiang zingah chuan he Taxi Driver pawh hi sawi hmaih chi a ni lo ang. Nupui fanau a nei emaw nei lo emaw in lamah an buai ve tho tur zia te, chumai baka sum leh pai duhthawh a nat tur zia te ka ngaihtuah a, sum leh pai a pek leh pek loh lam chu ka hre lo, chu lam ai mahin zan khawthim hnaih tawh tak, unau hmelhai hun vela khawvawt taka kara Aizawl Bazarpui atanga Zemabawk thlenga hmelhriat pawh nilo hmeichhe naupang va thlah hi a lawmawm thlawt a, chawimawi a phu hliah hliah a ni.