AN BAN TA NGE NGE E

Mahmuaka Chhakchhuak Nov. 27, 2020 Vawiin thlengin kan zoramah CoviD hripuiin min luhchilh lai leh kan hmangaih tak takte nunna hial a lak tawh laiin kan ram rorel khawl sang bera thute chuan zoram tana mi hnawksak ber leh tangkai lo ber ang maiin Pu Lalduhoma banna turin a thutpui mi 12 te chuan an han hek a, Sept. 22, 2020 (Thawhlehni) daih a hekna thehluh tawh kha a ni a, thuthlukna siamtu tur kan Assembly Speaker tan pawh thuthlukna siam mai a harin a rinawm a, ni 66 liam hnuah chuan thuthlukna siam fel tain Pu Lalduhoma chu MLA atangin chawlhtir alo ni ta a ni. Kan zavaia tangruala kan beih tur leh kan hmelma lian ber hripui chuan reh lam a pan chuang hauh lo a, thihna meuh a thlen takah chuan ralpui phiara phiar tur kan ni tawh a ni. Sorkar hotu ber atanga mipui zawng zawng pawhin kan theihtawpa tangruala kan beihlet a ngai a, sawi mai ni lo a a tak taka kan beihlet a ngai takzet a ni. Rin loh deuh deuhna hmun atanga kai thar an han awm te phei hi chuan a bik takin nunau tan ngat phei chuan a hlauhthawnawm lehzual avangin haider luih mai chi a ni hauh lo. Kan himna atana inkharkhip leh chu rem lohna tam tak a awm bawk si a, hlau chung chunga nitin hun kan hman a ngai a ni. Chutianga kan taksa himna tura invenna kan mamawh em em lai leh mipui te thlamuan kan ngaih em em lai mek chuan kan ram hruaitu thenkhatte erawh chuan Uirenu denhlum tum ang mai khan an MLA-pui pakhat chu House chhunga a thut ve theih lohna turin an theihtawp an lo chhuah mek bawk a, dik tak chuan heng MLA 12 te hian anmahni bialah theuh CoviD hri leng hi umbo tawhin emaw hneh takin beilet sela chuan an thiltih hi sawiselna a awm lo deuh tur a nih laiin an bialah CoviD kai thar an awm mai bakah mipuite thlabar takin an awm mek a. Thlamuan an ngaih em em laiin chulam chu ngaihsak miah lo ang maiin heti lamah an buai ta si hi an demawm thei mai dawn hial a. Hektu MLA 12 zinga kohhran upa awmte ngei ngei pawh chuan bial mipuite thlamuanna an nei bik chuang hauh lo a, an bial chhunga harsatna awm mek te an hre miah lo em ni tih theih turin an awm ta tlat hi thilmak tak a ni a tih loh theih loh. Zoram pum huapin kan ral beih hi lungrual taka kan beih a ngai a, tha thlah a thiang lo a, sorkar leh mipuite ngei pawh inthlahthlam thei kan ni lo a ni. Kan tih tur ve ve a awm a, kan theihna leh kan kut bik tur awmte hi hlen taka kan tih hian he hripui lak atang hian mipui kan him thei dawn mai chauh a ni a. Nimahsela chutiang lama insawrbing ta lo chuan heti hian MLA pakhat banna tur lamah kan rilru kan hmang thup ta mai si hian nghawng tha lo tak a nei palh ang tih pawh hlauhawm tak a ni. An hek ber-a lah chuan an hek chhan chu atan huatna tur a awm loh zia sawiin a lawm zawk thu te a sawi ta daih lehnghal a, ZPM lutuk a an hriatna leh an hekna chu zoram mipuite ngei pawh hian kan hrechiang hlawm vek bawk si. Thil dang tih dik loh te hmuhchhuah a ni mai bawk si lo a, MLA Fund a neih ve ang angte lah chu dik lo takin a hman an hek bawk siloh bakah thildanga hektu a lo nei bawk lo te zel chuan a MLA-puite tan hekna tur zawnchawp a ngai ta ni maiin a hriat a, heti hian an hek ta mai niin alang. Mipui te ngei pawhin mak kan tih fo tur chu Pu Lalduhoma hetia MLA atanga chawlhtir a nih takah hian atan zahna tur leh inchhirna tur a awm chuang hauh lo hi a ni. Kum 2018 ah khan ZPM Flag thahnemtham tak tar chungin a campaign a, ZPM mi leh sa tam takin an campaign pui bawk a, ZPM em em in a awm a, hlawhtlinna lo changin a lo MLA ta hlauh mai a, a MLA hnuah ngei pawh chuan ZPM chhunzawm zelin mithar lawmlut turtein leh thusawi tur tein sawmna a dawng reng bawk a ni. Chu chu kan MLA 12 te hian an lo ngaimawhin Assembly House chhunga a thut ve an remti lo a, thu tlak a ni lo e tiin an hek ta a ni. Thildang engmah an sawi lo a, a ZPM na chiah chu an sawi a niin Pu Duha’n Speaker hnena insawifiahna a thehluh Ni ah te ngei pawh chuan kan MLA 12 te chuan Press Conference neiin an hekna chhante chu mipui hriat thar leh turin an sawifiah nawn leh nghe nghe a ni kha. Lehlam kawnga ngaihtuah chuan a naupang thu ang reng riaua hriatna a awm bawk a, hetia Speaker hnena Pu Duha’n lehkha a thehluhni khera Press Conference lo neih kha a tul viau nge ni a, mipuiin an hrechiang tawk lo a, sawi nawn leh a ngai an ti zawk tih pawh hi sawi tur a awm thei awm e. Pu Duha dik tawk lohna nia an hriatte chu an han sawi thar leh a, ‘Dan kan ngaih pawimawh vang a ni’ te chu ti ve bawk mahsela thlirtu mipui lam erawh chuan chu aia pawimawh zawk chu lang lo lamah awm turin kan ngai vek tho tho a nih hi maw. An sawi anga dan an ngaih pawimawhna hi Pu Duha an hekna atang chiah hian nge ni tih pawh zawhna awm thei a ni bawk a, MLA an nih tirh atanga ngai pawimawh nisela chuan thil dang pawimawh tak tak leh dan lo anga sum leh pai tam tak luangral te hi sawi rik ve awm tak a ni a, nimahsela chung zawng zawng ai chuan Pu Lalduhoma a thlangtlingtu mipui phatsanna pawh awm chuang lo a chawlhtir hi a pawimawh hmasa ber a ni ang e.