HNAM ROHLU A THANGTLAWM E

(Thinghlun Thlam haltu Karimganj DC hnenah Khiangkawi Ipte chei hlan a ni) Mahmuaka Chhakchhuak Oct. 31, 2020 Chhinlung chhuak Zofate hi khawvel hmun hrang hrangah awmdarh mah ila chhiar tham lek kan la niin kan ram neihchhun – Mizoramah ber pawh Nuaih 12 emaw chauh kan la awm a, reilote chhunga in hriatpawh zung zung theih mai turin kan la inhre chiang hlawm em em bawk a. La inhre ngai vak lo te pawh hi pi leh pute emaw han sawi a, khawchhuahna hmunte han sawi hi chuan engtin emaw tak hian inhnaihna riaute hi kan la nei thei mai zel bawk a, hnam chi khat te kan inti unau a, khawkhat chhuakte pawh kan inhnaih viau zel a, a tute mai pawh hi inhlat tak tak thei kan la awm meuh lo a ni. Chutiang karah chuan induhsakna pawh kan theih chin sangin ropui lua lem lo mahsela chawei a insawm hi mizoah chuan induhsakna sang taka vawiin thlenga kan la dah reng chu a ni a, tunlai hunah ngei pawh hian khawpui lama cheng mi thenkhatte chuan lo dah ropui vak lo pawh nisela thingtlang lamah chuan a aia ropui hi a awm chuang kher lo ang. Duh hun huna sa hmeh tur awm lohna hmuna Ar vulh lai ngei mai han talhsak ngat hi chu duhsakna ropui tak a tih loh theih loh a ni. Hetiang bawk hian duhsak zawngte hnena kan thil hlan thinah te pawh he kan hnam hian thil ropui kan ngah lem lo viau a, khawvel hriat khawpa thil hlu neih lah kan nei hek lo. Chutih laiin kan hnam bilin kan neih chhun heng, Ngotekherh te, Puan chei te, Thangchhuah Diar te, Tawlhlohpuan te leh Khiangkawi ipte te ngat hi chu kan pi leh pute hun atanga vawiin thlenga kan hnam rohlu chuai thei ngai lo leh kan la ngaihhlut reng thil pawimawh tak a ni. Heng lo hi kan hnam hi rohlu kan nei lo a, a hnam ang ngat phei chuan neih belh tur thil pawh a awm tawh kher chuang hek lo ang. Amaherawhchu heng kan hnam rohlute hi an tlawm emai a, keimahni ngei hian humhalh leh roh nachang kan hriat loh aleiah tunlai ngat phei hi chuan kan duh dan danin kan ti danglam kual ta zawk a ni. Ngotekherh pawh hmanni lawk thleng kha chuan puan bih chi chauha kan neih a nih laiin tunah chuan Kameez atan te an lo thui ta zel a, kan uar phian lehnghal a nih hi. Awmze nei leh kawngkal nei tak thui pawh a awm ta lem lo a, kan duh dan danin kan thui kual ta mai bawk a, a tha vekah ngai mai teh ang. Thangtharte hian kan hnam rohlu neihchhun hi kan duat a ngai hle mai a, kan roh a tul takmeuhin a hriat. Khawvel hnam heti zat awmah hian keini chauhin kan neih a nih vang hian kan tu leh fa, kan thlah lo la awm zel turte tan pawha kan hnam rohlu neihchhun a nih zel dawn bawk avang hian vawiin atanga ngaihhlut nachang kan hriat lehzual hi tulin a hriat a ni. Sum leh pai tih loha kan rohlu neihchhun a nih vang hian a hun leh hmun hre taka kan tarchhuah thiam thin pawh a tha ngei ang. Tawlhlohpuante pawh dawrah lei mai tur a awm ngei mai tak nain kan duh hun huna kan phawrhchhuah leh ngawt mai thin te hian a hlutna a tih hniam phah lawng maw ka zuk ti deuh a. Chutiang bawkin mizo hmeichhe incheinaah pawh pawnfen kak te, fuke langkim biai thei khawpa thawmhnaw tawt hate ai chuan ngotekherh nena nalh taka an inchei chu kan thlang daih zawk ang hian kan hnam rohlu hi a hlut lehzual theihna tura keini hian kan hman thiam a pawimawh viau. Oct. 9, 2020 (Zirtawpni) ah Thinghlun khuaa kan mizopa thlam chu thenawm vai 200 rual zetin rawn halin kuhva hmun te chu an rawn suasam chiam mai a, silai nen meuha thawkchhuak an nih bawk avangin a dodal zawnga chet ngaihna a awm hlawllo a ni awm a. Chung vai te chu misual hranpa ni loin Karimganj DC ho meuha rawn thawkchhuak a ni tih kan han hre zui nghal mai bawk a, kan thin a rim hlawm viau a nih kha. A hnu lawk, Oct. 14th, 2020 ah kan sorkar aiawhin Mamit DC chuan Karimganj DC chu meeting a neihpuiin Pu Zolawma thlam hal chungchang sawiin a titu leh mawhphurhtu chu manchhuak a action la ngei turin a phut thu a hrilh nghe nghe a nih kha. Nimahsela Karimganj DC erawhin ‘thil thlenna hmun chu Singla Forest Reserve hnuaia awm, Karimganj District chhunga mi anih avangin an thuneihna zah sak turin a lo ngen ve thung bawk a. Hetih rual hian ngaihhruihna thilpek hlanin kan Mizoram lam hruaitute chuan Karimganj DC te hi Khiangkawi Ipte an hlan a ni. Nimahsela a hnu lawk, Oct. 26, 2020 ah District Programme Officer (DPO), Mamit chuan Thinghluna sorkar bungraw pawimawh an tihchhiat vangin insawifiah tura hriattirna a pe chhunzawm ve leh nghal bawk a, Oct. 31, 2020 hmaa insawifiah turin tih a ni nghe nghe. Karimganj DC hi Thinghluna thlam hal leh sorkar thil pawimawh tihchhiatnaa mawhphurtu ber a ni a, chutih laiin DC lamin meeting neihpuiin Khiangkawi Ipte an lo hlan thung a, Khiangkawi Ipte hlan ni hian thil thlenna hmun chu Singla Forest Reserve hnuaia awm, Karimganj District chhunga mi anih avangin an thuneihna zah sak turin Mizoram palai kalte chu inthlahrung miah loin a lo ngen ve thung bawk anih kha. Hetia ngaih mai chuan District Programme Officer-in Show Cause Notice a pek hi thil tul lo tawp a ni ta zawk nge DC lamin meeting an neihpuia Khiangkawi Ipte meuh an hlan tak kha thil tul lo tawp ni ta zawk ang le? Karimganj DC hi kan dah ropuiin kan chawimawi zawk tihna phei chu ni miah lo mahsela heti taka keini lam atanga a tha lam leh a chhe lam thil a tawng ta hi thil danglam tak chu a ni ta hrim hrim mai tih a chiang reng. Insawifiahna hun pek tawp ni Oct. 31, 2020 ah lah chuan Ischabeel Tea Estate, Karimganj ah Mamit DC te nen bawk meeting neih leh a ni a, an meeting minute tarchhuahah lah chuan Show Cause Notice lam engmah tarlan a ni hek lo. Heti tak maia sorkar thil pawimawh an tihchhiat vanga insawifiah tura hriattirna a ngai pawimawh lo hi a aia na zawka hmalakna chi ni awm tak a nih hmel nain helam chu keini lo sawi phak a awm hauh lo mai. Khatia kan ram chhunga pawi khawiha, sorkar thil pawimawh meuh rawn tichhe tu hnena Khiangkawi Ipte kan lo hlan erawh kan hnam rohlu tih thangtlawmna a ni mai lawng maw a tih theih thung. Union Minister emaw State dang hruaitu liante engemaw programme pawimawha rawn tel te duhsakna atana kan hlan te hi chu a hriatthiamawm ngawih ngawih a, Thinghluna kan thlam min halsak tu a ni tih hrerenga Khiangkawi Ipte kan lo hlan kha kan tih loh tawp tur niin alang a, a hnam angin a zahthlak a, khati taka a inluling chunga Khiangkawi Ipte kan lo hlan kha alakah dawl zawrin kan zawr ta a ni hial lawng maw te pawh a tih theih hial awm e.