POLITICS KHEL HLAWHTLING

Mahmuaka Chhakchhuak Kum 10 vel liam tawhah khan thianhoa politics kan sawinaah kan thianpa pakhat hian ‘Pu xyz hi chu mizo zingah chuan Politics khel hlawhtling ber a ni ang: Concrete In ropui tak, luah sen loha lian a sak phah a, chulai hmunah pawh In lian tak a nei bawk a, an fate sorkarah a hnimlut vek tawh bawk a, a ni baka politics khel hlawhtling an awm lo ang’ tiin a sawi bawrh bawrh a. Keia ngaihdan nen chuan a inmil loh avangin kei chuan ka hnial a, ‘Pu xyz hi chu ram leh hnam tana a thiltih sawi tur hi kei chuan ka hriat loh avangin chuti takin fakna tur ka hre lo a, politics khel hlawhtling tia sawi theihah ka ngai lo’ tiin ka hnial thung a. kan thianpa lah chuan ‘chu bak bak a awm hleinem’ tiin a tang tlat bawk a. Nimahsela kei chuan vawiin thlengin ka tanna hi dikin ka la hre tlat tho a ni. Kan zoram politiciante hi Mizo Union din tan, kum 1946 atang tawh khan thlirkir ila politician hlawhtling kan tih leh hlawhtling lo kan tihte hi a in ang lo hlawm ngeiin a rinawm. Abraham Lincoln kha mi tam takte chuan politics khel hlawhtling kan tihna chhan chu Bawih chhuahna a hlawhtlinpuina kha anih laiin politics kha a hausakpuina kan hre lo a, an chhungkaw hnemhnanpuina kan hre hek lo. A nunna ngeiin a tawrh phah nghe nghe a, nimahsela vawiin thlenga politician hlawhtling tia kan sawi ala bang chuang lo a nih hi. Hetianga an hnathawh that leh that lohah hian keini pawhin politiciante hi hlawhtling leh hlawhtlinlohna teh ta zawk ila a dikin a rinawm. Keimahni zingah ngei pawh hian politics kan khelhna chhan hi hetiang hi ni thin sela a duhawm hle a ni. Politics an khel a, ram leh hnam tana an thiltih aimahin anmahni mimal hlawkpuina neihte kan thlir thin atanga politician te kan teh a nih chuan he ram hi a kal dik theiin a rinawm loh a, keimahni ngei pawh kan politics thlir dan a dik thei ngai lo ang. Vawiina kan ram hruaitute zingah pawh hian tehna hrang hrang hmangin kan teha hnemhnanpui lo nia kan hriatte chu politics khel thiam lo te kan ti leh ngawt mai thin a, mahni tanghma hai thiam deuh emaw mahni tana hlawkna tur kawng zawng thiam deuh te chu politics khel thiama kan han sawi leh mai thin hi thil dik lo tak niin a lang. John F. Kennedy khan ‘I ramin enge i tan a tih theih ti loin i ram tan enge i tih theih’ tia a sawi ang hian he kan ram neihchhun – Mizoram tan hian kan politician te ngei hian enge ka tih theih? Tiin mahni inzawt thin sela he ram hian a thatpui zawk ngei ang. Chutiang niloa politics hi hlawkpuina tur atana kan khel a nih chuan ram leh hnam tan mi tangkai lo kan ni mai pawh ni loin mi hnawksak kan ni zawk dawn tihna a ni. Sum leh pai tam tak sengin politicsah an zuanglut a, vanneihna an lo chang ta hlauh a, an sum leh pai sen ral zawng zawng bakah a aia tam sum leh pai lak luh leh an tum si chuan ram tana an thawhna chu enge a thatna awm ang ni. Ram leh hnam hmangaih tak tak mi leh ram hruaina kawnga thinlung thianghlim takte hi chu tumahin kan haiin a rinawm loh a, kan politician mual liam tawhte zingah pawh sawi tur kan hre teuh ngei ang. Pu Ch. Chhunga te, Brig. T. Sailo te kha an hming kan lamrik hmasak pawl an ni ngei ang a. Thenkhatte erawh chuan politics khel hlawhchham ang hial tea sawi pawh anlo awm maithei nain anni te ngat kha chu zofate zingah hian politician chhuanawm berte zinga chhiar tel ngei ngei chi niin a hriat thung. A chhan chu, Sum leh pai lama hlawkna neih tuma politics khel an nih loh ang ngeiin thiltithei dinhmuna an din lai ngei pawh khan sum leh pai lama sawiselna tur an awm lo a tih theih hial. Pu Ch. Chhunga phei kha chu Chief Minister a nih laiin annu hian thingtuah tur an neih loh chuan puk tur a zawng mai a, a puk zat chiah chu a pe leh ngei ngei bawk thin a, chutianga mi duham lo mi tak chu an ni. Mi thianghlim famkim erawh an ni bik kherin a rinawm loh a, khawilaiah emaw chuan tihsual chu an nei ve ngeiin a rinawm tho a, nimahsela vawiin thleng hian sum leh pai emaw mahni tana hlawkna tura thiltihtheihna hmang tia sawi sep an kaina hi sawi tur awm lo ber an ni tlat si a nih hi. Tunlaia kan politician tam takte erawh chuan mipui aiawha rorelna hmuna an thutin engemaw riauin an inhre nghal a, an theihna vang dinhmun sanga awm an ni emaw an inti mai nghal thin. Hetiang politician te hi ram leh hnam hmasawnna daltu lian tak an ni a, an mihring mihrinna a biangbiak an nawm vang emaw an mawngzan vang te hian mipui lam lahin mi tha tak emaw kan lo ti mai thin bawk a, a pawi thin hle. Village Council emaw, Local Council emaw, Municipal Councilor emaw ram pum tana MLA emaw MP emaw an nih hian mipui rawngbawl tura hnathawh kawr ha an ni tih hi inhre thar mawlh teh se. Chumai bakah chuan ram leh hnam tan ngaihtuahna sengin thil pakhat tal hmasawnna tur ngaihtuah chhuak ngei rawh se. Chu an ngaihtuah chhuah chu hlawhtlinpui turin an theihtawp chhuah ngei bawk sela, a hlawhtlin chuan a lawmawm ang a, a lo hlawhtling chiah lo a nih pawhin ram leh hnam tana an thawhrimna chu mipuiin anmahni chawimawina atan kan hmang ngei tho ang. Chu chiah chu thlan khur chhunga an luh hnu pawha an chanchin kan la sawi rin ber tur lai chu a ni bawk ang a. Politics khel hlawhtling kan ti ang a, ram leh hnam tana an thawhhlawkna chu kum tam liam hnu pawhin kan la sawiri fo bawk ngei ang.