TUNLAI THIL AWMZIA

Mahmuaka Chhakchhuak Oct. 29, 2020 Pathianthuin ‘Tunlai thil awmzia in hriat avang leh muhilte thawhharh a hun tawh takzet tih in hriat avangin chu chu ka sawi a ni’ a tih angin kan tunlai khawvel hun tawn mek hi hai der luih chi a ni lo a, bengsika ngaihtuah a hun tawh ta. Ram hruaitu ropui tak tak an buai a, sumdawng lian an buai bawk a, sorkar hnathawk an buai mai bakah zirna lam thlengin kan buai a, mitin kan buai ta luih luih mai a nih hi. Hei hi eng dang vang niloin hripui leng CoviD vang vek hi a ni a, mahni hmasialna thinlung nei chunga do chi a ni lo a, politics inbeihna atan pawha hman chi a ni hek lo ang. Kan zavaia tanrualna tha tak nena kan beihlet chauha hneh theih tur chi niin alang. Kan ral beih ber CoviD lah chu mita hmuh tham loh a nih bakah lehkha tar leh tawngkam hmanga beihlet chi a ni silo a, Concrete In ropui tak chhunga chengte leh Di In chhunga chengte a tu amah min thliar bawk si loh vang hian Saingho khuma mu tan pawh hlauh loh ngawt chi a ni hek lo. Sum neih zawkte a kalkan bik hek loh vang tak te hian tanrualna tha tak nena ralpui phiara kan phiar a ngai a nih hi. Mithiam zawkte chuan kum naupang zawk leh kum upa lam tan a hlauhawm bik an tih vangin thalai tan a hlauhawm lo e tihna pawh a ni chuang lo a, pawngpaw zuam ngawt chi lah a ni si lo a, Pathian hnena tawngtaina nei reng chunga kan thiam dan dan baka kan theihna ang anga kan inven a pawimawh ta ber a nih hi. TB natna nei pakhat chu tuemaw tawngtaimi hian a TB damdawi ei lai chu thlaha tawngtaina dam pui zawk turin alo ti a, a ni chuan ring tak chungin a damdawi ei lai chu thlahin a ei duh ta lo a, TB lama thawktute chuan damdawi chu thlah lo hram la tawngtaina pawh ring tho bawk la tia an nawr chiam hnuah pawh chuan a ei duh tlat chuang si lo a, thla reilote hnuah chuan a thih phah ta nghe nghe a nih kha. Hetiang deuh hian keini pawh kan tawngtai reng bawk ang a, chuti chung chuan invenna pawh kan thlahthlam mai thiang chuang lo a ni. Kan zoram chhung ngeiah CoviD vanga nunna chan kan awm ta hi a thinrimthlak ngawt mai a, a pawi ngawt mai. Kan damdawi lam thiamte’n an theihtawp chhuahin ni 10 vel lai an enkawlna pawhin awmzia a awm lo a ni a, a chhung leh khatte tan ngat phei chuan tawrh thiam a har ngawtin a rinawm. Hetih lai hian kan hruaitute lam lahin Intensive Care Unit (ICU) kan neih tlem zia an lo sawi ri bawk nen hian ngaihtuahna a buai lo thei lo a, nasa leh zuala mitin kan fimkhur a ngai tak meuh a, kan tawngtai tam pawh a ngai zual hle mai. Mi tam takin khawlaia mask kan han hrengte hi chu hri laka invenna ai mahin police man kan hlauh vang zawk nitein alang lehnghal a, hawh u, mahni sa himna tur leh midang tana himna tur a nih phawt chuan mask hren hi i hreh lo ang u, CoviD vanga hreng nimah ila kan mizo nunphung en hian mask hren hi a that zawk hmel hrim hrim. A chhan chu hnai tak taka inbiak kan ching a, tawng paha chil per mi lah kan kat zut bawk nen hian mask hren hi chin thana neih pawh a pawilo viau maithei. Heng bakah hian mimal tin hian nunphunga kan lo neih tawh thil tak tak thlak danglam tur kan nei ngei bawkin a rinawm a. Chung zinga langsar tak pakhat chu mahni Ina awm tam hi a ni. Eizawnna vangin kan chhuak lo thei lo a nih pawhin midang hnaihchilh lutuka awm loh hram tum ila, mi kuhva leh sahdah ban loh hram tum bakah mi chibai leh kuah deuh nawk nawk mi tan pawh simna nun nei ta bawk ila. A tlem thei ang bera midang hnaih chilh loh dan hram zawn a pawimawh. Tuna kan hri kai thar thenkhatte hi chu khawi atanga kai ngei an nih tih hriat hleihtheih loh an lo awm takah hian kan hmelhriat thiantha tak tak te bakah keimahni ngei pawh kan hriat loh karin kan lo positive reng thei si a, Hamlet-a pa tawngkam takin fimkhurnaah hian hlimnain zung a kaih tih hi theihnghilh loh hram a tha ngawt mai. Kut sil fai ngun te hi chu hripui vang pawh niloa pawimawh reng sa a nih vang hian chin thanah nei thei ila a tha ngei ang le. Sorkar atang pawh hian tuna kan kalphung pangngai lo deuha kalphung dang kan neih a tha maithei bawk. CoviD beihletna atan sorkar laipui atang tein sum leh pai dawng thin mah ila sorkar hnathawkte thlabi hlawh hman hawhsak ngai khawpin kan khawpkham lo tih a chiang a. Nakin zelah hian eng ang takin nge sum leh pai kan la mamawh dawn tih lah chu a hriat bawk si loh vangin sorkar ber atang hian tawngkam chauha mipui leh tlawmngai pawl hrang hrang bakah opposition party te ngei pawh hi mawhphurhna pek nisela tun ai hian kan thatpui zawkin a rinawm. Tuna kan kalphungah hi chuan sorkarin midang puihna mamawh lo ang maiin a mal beih a, tlawmngai pawl leh opposition party te a tak rama mawhphurhna pe loin opposition party tana tawng ti nuam tur takin a mal beih mauh mai si a, mipui tan a lu hai thlak duh ngawt mai. Hripui hian sorkarna fawng chelh tute chauh a hnaih lo a, opposition leh neutral thlenga a vai hma vek mai si vang hian a khawi lai part emaw chu midang kuta dah ni ta sela tun ai hian phunchiarna pawh a tlem zawk ngeiin a rinawm. A tir lama PPE set kan lei dan atangin thil fello kan nei nghal a, CoviD beih letna atana sorkar atanga sum chhunkhawmna ruahman awmchhun Chief Minister Relief Fund (CMRF) hman danah opposition party lung a awih lo a, CoviD hri kai leh kai lo enna khawl lei danah te pawh kan lung a dam kim chiah lo a, Assembly House chhung ngeia sawi chhuak te pawh kan awm phah ta a nih kha. Thil dang pawh sawi tur a awm bawk ang a, hetianga lungrual lo taka CoviD dona kawnga kan ke pen a rual loh chuan nakin lawkah hian mit lawng pawha hmuh tham loh hrik tereuhte vang hian inthenawm hnai te te te ngei pawh hi kan la in hmu sakhi lo ang tih pawh a sawi theih loh a nih tak hial hi. Hengte hi kan tunlai thil awmzia chu a ni rih si a, a vei mi tan chuan a vei awm mai bakah zana mut kan lo harsat phah vein engruai ti thei si lo hian kan lo vei ve em em reng bawk si a.