HNAH LA HLUI

Mahmuaka Chhakchhuak 

Dec. 9, 2020 

 A kum tak ka hre thei mai tawh lo nain kum 10 vel kan nih lai a ni a, kohhran thupuangtu chuan Pathianni zana thu pawimawh a puan zingah chuan Krismas leh Kumthar ruaithehna tur atana Hnah la tur a puan mi 20 vel zingah chuan ka hming a han puang tel ve tlat a, keimah chauh niloa kan thianhoa kan hming a puan vek avang chuan kan lawmin kan hlim kher mai. Ina haw veleh ka nu leh pate bulah ka sawi bawk a, anni chuan hnah la thei a ka awm tawh vangin min lawmpui piah lamah ka pa chuan hnah lakna atan ama chempui ngei mai chu min han tahhriam sak zui nghal bawk a. Changel kung kih dan tur te min hrilh a, a tlukna tur kan duh lamah a har lak hmasak tur a ni a, chumi hnuah a lehlamah sah leh tur a ni tiin fimkhur taka hnah lak dan turte min hrilh mawlh mawlh pah bawk a. 

 Hnah lak niah chuan mahni In atangin chempui leh sairawkherh leh saihlumte chu ipte-a akin kan chhuak a, Arro kawng lam (Arro hi Khawzawl atanga Aizawl lama kala, Chaltheikawn atang peng leh a ni) ah rual u zawkte hnungzuiin hnah la tur ho chu a rualin kan kal a. Keini rual bik phei chu kan vawikhat hnah lakna tur a nih bawk avang chuan kan phur hlawm hle a ni. 

 Darkar hnih vel kan kal hnuah chuan kawng kamah, chhak lam leh thlang lamah hian changel kung sang tak tak hian alo awm teuh mai a, chuta chuan kan zavai chuan chhak lam leh thlang lamah te insem darhin changel kung chu kan sat thlu ta mawlh mawlh a, changel kung sahthluk mai chu thil harsa tak a nih loh laiin keini rual tan chuan hnah hih dan zawng kan hriat loh vangin a ni lo laiah hian hnah chu a tet zel mai a, rual u zingah chuan U Maduha hian a hih dan min zirtirin hnah dah/ rem khawmna turin thingtual te min han siam sak nghal bawk a, rem tak maiin hnah hih sa chu ka dah ta zel a, tichuan changel kung satthlu sa atang chuan hnah 50 vel tur chu keimahniin kan hik thei maiin kan tel a, a laiah thingtuai ka rawlh leh a, rual u zawkte chuan kan hnah lak chu ruaitheh niin fatute’n harsa taka an phelh hi a hmuhnawm an tih vangin hruiin a nghet thei ang bera tawn zel tur an tih vang chuan ram hruai kan chhah hmang chuan kan theih tawka nghetin hnah chu kan tawn a, a ah-na tur kan siam bawk a, kan ipte chu hnah chungah chuan bat tangin hnung lamah chuan hnah chu kan ak a. 

Chawhnu dar 2 velah chuan ram atangin kan zavai chuan kan hawng ho leh a, keini rual tan chuan ke hlira kal bawk si chuan hnah 50 vel telkhawm ah chu alo rit duh ang reng hle mai a, In thlen meuh chuan kan chau ang reng viau a. Biak In bul maia kan kohhran upate Inah chuan dahkhawm tur a nih vangin kan zavai chuan kan lutkhawm a, nu hoin tualah chhang an lo deng laih laih bawk a, keini hnah la ho chu min hmuh chuan kan hmingin min han ko lauh lauh a, kan hnah ah laite chu min han dahthat sak zung zung nghal bawk a, inchhungah lutin thingpui sen sa ver vawr leh kurtai mai bakah chhang chhum hmin hlim, la nem tak hi a suahna tur fian nen min rawn chhawp bawk a, chhuat laia thu bialin chhang chu fianin kan han pir laih laih a, chutih laia an tawngkama min han fak pah bawk te chuan hah a ti dam sawng sawngin kan hre bawk a, nuam kan ti hle a ni. 

 Ruaitheh niah chuan Biak In kawmchar lamah fatute chuan keini Hnah la bikte tana eina turin kan hnah lak ngei mai chu min han phah sak bawk a, fatu thenkhatin kan hnah tel, ram hruia uar taka kan phuar lai harsa ti tak chunga an phelh lai kan hmuh chuan keini chuan nui ring ngam si lo hian kan lo nuih ru tet tet a, kan duhthusam ang taka harsa taka an phelh lai han hmuh chu kan chak bawk reng kha a ni. 

Nu leh pate kianga chhungkua kuaa kil reng reng thinin hnah la hluia han kil hrang ta bik chu nuam kan ti hle a, chhungte chaw bel atangin chaw kan va la then a, fatute pawh chuan duhsak takin sa min han suah hnem bik ngei bawk a, kan hlim hle a ni. A tuipui leh a chek tui hawp turin YMA no ang tiat ngei mai hian no in kan inchhawp bawk a, kan tlei hle mai. Keini rual tan chuan hei hi Krismas kan nghahhlelh chhan chu a ni mai a, nu leh pate lahin min lo lawmpui em em bawk vangte chuan tlangval ve tan tawhin kan inhria a, nuam kan ti takzet a ni. 

 Tunah chuan hetianga hnah lak hi a awm tawh lo a ni ber mai a, hnah lak aia awlsam leh fel fai zawkin kohhran tinin thleng kan neih mai bakah a thente chuan Dispo thleng te kan hmang bawk a, a lehlamah chuan a khawharthlak duh hle mai. Ruaithehna atan lah dawhkan nuam tak kan nei fer fur bawk a, chhungkua te lah chuan In atanga chaw bel ken a ngai tawh hek lo. Chhungkuaa kil pawh a awm tawh ngai meuh lo a, buffet hlira kan ei tawh vangin a rem dan danin ruai kan theh mai a, puar takin kan ei tho nain hnah la hlui ngei maia kan ei kha kei ka tan chuan hrawk alo fah ber zawk mai. 

 Tun hnua ka ngaihtuah kir leh hian khang Hnah la hluia ka kilpui thenkhatte chuan chantuan ram min lo pansan tawh bawk nen chuan khua a har duh hle mai a, kan titi te kha ropui lua lo mahsela chaw bar pah chunga tawng kan inchuh nak nak te kha engtikah tak tawng leh ang i maw le?