MIPUI COURT-AH

Mahmuaka Chhakchhuak Dec. 6, 2020 Mizoram sorkar rorelna hmun sang ber – Assembly House chhunga Mizoram mipuite’n kan aiawha kan thlanchhuah mi 40 zinga mi 12 te chuan an thutpui Lalduhoma chu Speaker hnena hekna Sept. 12 leh 14 niahte an thehlut a, Speaker chuan Lalduhoma chu insawifiahna hun ni 14 pe nghalin, a ni hian insawifiahna hun pek tawp ni, Oct. 8 ah Speaker hnenah hian a thehlut a ni. He a thehluh niah hian hektu MLA 12 te hian party Office ah an hek chhan te mipui hnenah sawifiahin ‘Dan an ngaih pawimawh vang’ tih an sawi a. Speaker hian Lalduhoma insawifiahna chu hektu 12 te hnenah hian a pe lehin chhanletna hun atan ni 7 chhung pek an ni a, chumi hnuah Speaker hian hektu 12 te leh Lalduhoma chu Nov. 3 ah ko lehin Assembly Secretariat Conference Hall-ah Speaker hmaah an inlan a. Hetah hian sawi duh an neih te sawi tir an ni hlawm a, an thusawite chu record vek a niin Speaker hian uluk taka zir chiang leh turin a insawi a. Pu Lalduhoma ngei pawhin ‘a ZPM lutuk’ tia an hekna chu ‘kan tang tlang ni berin ka hria a, lawmthu ka hrilh let duh hial zawk’ tiin a sawi bawk a. Chutianga Speaker berin kawng hrang hranga hma alak hnuah chuan Nov. 27 niah Pu Lalduhoma chu MLA atanga ban a nih thu puan a ni ta a ni. Speaker in thuthlukna a neih niah hian Aizawl khawpui chhunga ZPM te chu a remchang chang kalkhawmin Assembly House leh Vanapa Hall kawtah te pungkhawmin placard leh banner te nen kawngsirah an lo ding bawk a, thuthlukna an hriat hnu hian thusawina neiin tawngtainain an hun hman chu an ti tawp chhunzawm ve nghal bawk a. Congress Party atangin Chief Minister hlui Lalthanhawla chuan hetianga thuthlukna awm ta mai hi a thlang tlingtu mipui zahlohna vang a ni tiin thuchhuah a siam a, Zodintluanga, MLA pawhin mak a tih thu leh pawi a tih thu a sawi bawk. Pu Lalduhoma ngei pawh hian he thuthlukna hi politics-a phuba lakna a ni tiin a sawi leh bawk a, Speaker chu tunhnai teah security pek belh nia a hriat thute sawiin buaina leh tharum lama an chet ve dawn loh thu a sawi. Heng bakah hian mipui hnenah kan thlen ang a, mipui court-in a rel mai tur a ni. MNF hi an thangkamah ngei an awk mek a, ZPM min campaign sak a ni a ti bawk. Anni bakah hian ZPM chhungkaw lam atangin thuchhuah chi hrang hrang hmuh a ni bawk a, chutih lai mekin MNF lam ngei pawhin thuchhuah siamin ‘Speaker hian a tih tur dik tak a ti a ni’ an ti bawk. Tichuan Court-a kal tur nge ni ang a, By-election neih a, mipui duhthlannaa innghah tih chu mipui lam leh tupawh maiin kan ngaihven chu a ni a, amah Lalduhoma tan ngei pawh duhthlan thiam a har ngawtin a rinawm. Nimahsela Dec. 4, 2020 nia PAC thukhawm chuan Court-a kal loin mipui court ah ngaihtuah ni zawk sela By-election neih ngei ni rawhse an ti ta a ni. Serchhip mipui kutah thutawp a awm ta hi thil tha tak pawh a ni thei a, an nakin zel hun atan pawh thil pawimawh tak a ni ngei ang. By-Election hi chu sorkarna fawng chelhtute chan nia ngaih a ni thin nain tun tum erawh hi chu zoram mipui zawng zawngin a chhan leh vang kan hre vek a, Opposition bial nih pawh thil lawmawm ni hran lo mahsela a tul zawk maithei a ni. Lehlam kawngah erawh thil huphurhawm tak a ni thei bawk a, Serchhip bial, District Hqtr. biala rulling MLA neih nge Opposition MLA neih hi buk tham a awm rualin tun tumah erawh ZPM Candidate tur hi House chhunga performance hmuhnawm ber a nih avangin leh MLA atanga chawlh tir a nihna chhan ngaihtuah erawh chuan vote loh chu a sual thlak hial zawk maithei awm e. Hetia By-Election alo awm dawn takah chuan thawm riva hriattur a awm bawkin Sorkarna fawng chelhtute lam atangin Michael Chhakchhuak chuan bial a vil tan tawhin sum leh pai pawh a seng teuh tawh an ti a, PWD CE kalchhuak ta, Er. Sawmvela hming pawh sawirik a ni. Hetih lai mekin Serchhip biala vawi 4 lai lo in Candidate ve tawh leh Serchhip khaw chhuak C. Lalramzauva chu din leh a tum nia sawi a ni bawk. Congress tan erawh an hruaitu pahnih, an President ber leh Treasurer te’n Pu Duha thlavang an rawn hauh tawh avang hian Candidate pawh an neih loh mai a rinawm hial a, Candidate an nei a nih chuan an hruaitute hi an insawifiah nawn leh pawh a ngai hial maithei zawk. Thihna vang leh chhan dang vanga By-Election neih ngai ta chu nisela tu tan pawh a free vek ni mai tur a nih laiin tun tum erawh mitinin a chhan kan hre vek a, Speaker thuthlukna hi kan hriatchian em vangin midang tana Candidate neih ve leh kher loh hi thil tih chi ni awm taka ngaih a ni. Amaherawhchu thiang lo erawh a ni chuang loin remchang lo lakna hun atan pawh a tha tho maithei e. Mak tak maiin ZPM chhungkua atang mai nilo, Neutral lam atang tea Pu Lalduhoma tana sum leh pai khawn an awm hian mipui thinlung a hneh ngeiin a rinawm. Party khata awm te thiltih chu ngaihdan a neih theih mai laiin eng party mah zawm lo, Neutral atanga hmalakna awm hian nasa takin kawngro a nei ngei dawnin a hriat. Nimahsela chuti rualin MNF lam tan pawh heng zawng zawng hi hmuhhmaih theih a ni bik chuan dawn loh avangin strategy thar neih a ngai ngei turah ngai ila. Sum leh pai pawh a leng nasa maithei a, midang thik phak rual lohin eng programme emaw te pawh a awm maithei bawk e. A pawimawh ber zawk chu Serchhip biala vote nei mipuite an ni a, dinhmun khirh taka an dinna pawh a ni thei bawk. An tihsual chuan zoram mipuiin kan dem rawn luai luai ngei ang a, an tih fuh erawh chuan kan fak hle bawk ang. Sum leh pai hmanga lei theih erawh an tam lo maithei a, dik lo taka hausakna duh mi an tamin a rinawm loh.