THIS IS MIZORAM – IV

Mahmuaka Chhakchhuak Nov. 22, 2020 Hripui leng vanga harsatna kan tawh hi a mal malin chhiar ta theuh ila chhiar tham fe a awm thei awm e. Chutih laiin hripui leng vanga thil thar kan tawn te pawh kutchang thleh nghauh nghauh tham a awm bawkin a rinawm. He hripui leng hi a ngeiawm a, a huatthalaawm mai bakah a thinrimthlak bawk a, kan nunphung min tihbuai dan zawng zawng hi sawi ta theuh ila ngaihnawm taka sawi thei apui hi kan tam bawk ngei ang le. Nimahsela chuti chung chuan he hripui hi a hnawhbo ngawt theih si loh a, a lak atangin kan inthiar fihlim ngawt thei bawk chuang si lo a nih hi. Kan hmelhriat tirh te kha chuan hlauh dan tur leh a laka inven dan tur pawh kan la thiam vak loin a hriat a, min rawn hnaih hret a, kan hlau tan dawn emaw chauh a ni a, min rawn luhchilh takah erawh tumah khap hranpa ngai loin sorkar zawkin dan a siam te pawh mipui nawrna vangin kan han tidanglam leh hial te kha a ni a. Tunah erawh alak atanga bihruk thei rual lohin hmun tinah a inzar pharh ta a nih tak ber hi. Heti taka ngeiawm leh huatthlala hripui hi mita hmuh tham loha te ala ni leh ta nghal a, nimahsela chutianga hrik tereuhte pawh chuan patling thau leh mawi lo khawpa dul kiar te mai bakah kan zavaiin min tibuai viau a nih lawih si hi maw le. Mithiam zawk te’n inven dan tur an ruahman dan ang hmangin theihtawpin kan inveng a, sorkar lamin dan leh dun tha tak tak hmangin mipui awmdan tur leh nunphung turte thlengin min siam sak bawk a. Chumai bakah kohhran lamin a huhoa tawngtaina hun te hial neiin he hripui hi kan beilet a, kan do a, a lak atanga him kan tum chungin nitin kai thar kan nei ziah bawk tho a, a chhan hriat mai theih loh kai tharte hial kan nei ta zel bawk a nih hi. Chutih laiin kan sorkar chuan a tir atangin hripui beihletna chu a fawng chelh tum tlat ang maiin kawng engkimah a bul tumtu nizelin mipui leh tlawmngai pawl hrang hrang te atanga CoviD beihletna tur sum leh pai thawhkhawm hmandan turte thleng chuan thi beh lo lam tel ve hauh loin a pumhmawm a. Chutih mek lai erawh chuan ‘CoviD hripui leng hi tumahin politics inbeihna lam zawnga hman loh nise’ kan ti leh hlauh thung bawk a nih kha. Hripui leng chu thupui bera neih a ngaih rualin saipui kal lai ui bauh mai maiah a ding ngai lo tih ang maiin kan sorkar chuan kut lehlamin hnathawh thulh a tum chuang lo a, hei Anthurium Festival te hial pawh kan hman thin dan angin a hman theih ngang bawk si loha a rem dan danin kan nei ta zel a nih hi. Nitinin hri kai thar kan neih thar ziah chuan chawlh rih a tum chuang lo a, damdawiin lamah kan inphur lut zel a, IUC-a enkawl ngai te pawh kan nei ta nual a nih hi. Kan damdawiin lama thawktute ngei ngei pawhin vanduai thlak takin an lo kai ta hial bawk a, kan hriat theuh angin CoviD hripui leng vanga nunna chan pawh kan zoram chhungah mi 5 lai kan awm hial tawh a nih hi. Pathian zarah nunna chan hi kan awm belh tawh lo turah ngai ila, tawngtaina nei reng chungin fimkhur taka nitin hun hman hi kan zavaia tihmakmawh a ni. Thihna tawk rau rau-ah ruang kil hleihtheih loh mai baka duh anga thlahliam hleitheih lohte hi alo rapthlak emai a, mitthi chhungte tan a nat bik dawn em vangte pawh hian he hripui leng vang hian nunna chan hi awm tawh miah lo ila a duhawm ngawt mai. Nimahsela hripui lengin nasa taka min tihbuai mek lai pawhin kan duh loh leh tum loh lamah kan ram chhungah thenawmte kel lutin pawi an rawn khawih ta thut mai a, chumi chhunzawm zelah chuan ni 13 emaw lai lirthei dan hial a nih mai bakah state thenawm dang atanga pur chaw phurh hial kan lo ngai ta lehzel te hi tunhma lam atanga kan lo inbuatsaih loh zia ti langtu tiin sawi kher lo mah ila kan hrethiam theuhin a rinawm tho mai. Ramri-a buaina nei reng chungin ramri buai ber buaipui hmain kawng dan chu buaipui zawk alo ngai lo thei ta si lo a, Central sorkar pun meuhin state pahnih aiawh te chuan inbiakna an nei a, kan zawm vek dawn emaw tih laiin anni lam zawk chuan finrawl chhuahin lirthei an rawn chhuah leh duh chuang lo a, a hnua inbiakna neih leh a nih pawh chuan rinngam a har tawh viau nain harsatna siam tawh loin an rawn chhuah ta hlauh mai. A thenin CYMA thu leh hla vang an ti a, a thenin Kolasib Bawrhsap hnathawh vang an ti bawk a, a thenin MBA vang an lo ti bawk a, social media lamah inti hrechiang tak takte lahin Raju-a vang an ti bawk a, a chhan tak chu vana Pa chauhin a hriat tlat avangin hetia lirthei tana harsatna awm ta lo hi kutbenna tham a ni hrim hrim. Oil a rawn thleng a, an rawn chhuak tih kan hriatin kut kan beng dur dur a, Seling an rawn thlen meuh chuan beng thleng thlengin bawp kan khai a ni lawm ni kha. Nimahsela a rawn thleng a, VIP te chauhin an la thei ka ti leh bawk si! Lunglei-a kan driver pakhat phei chuan Aizawl atangin zing dar hnihah Lunglei a thleng a, petrol la turin zing dar hnihah chuan a intlar ve nghal a nih chu maw le. Hetiang taka kan ram chhunga Oil lama harsatna hi kan tawk tawh em ka hre chiah lo nain kan la tawh loh hian hi a rinawm. Chutih mek laiin a to (black)-a zuar te lahin zawrh tur an lo nei reng bawk a. Kan kristian rama thilthlengah chuan a mak a, a mak lo bawk a nih ber hi maw le. Rev. Thansiama tawngkam takin ‘kan kristian pawnlan dan hi a thuk a ni’ tih hi a dik ngawt mai!