THIS IS MIZORAM - IX

Mahmuaka Chhakchhuak Dec. 6, 2020 Heti taka kan ramchhunga thilmak thleng thin hi kan ngaihtuah chiang hlawm em le. Sakhaw puithiam zinga kan ngaih ropui berte zinga mi Rev. Zairema te meuhin ‘Pu Hawla hi heti tak mai hian puh hmingchhiat a ni a, khawnge a dik leh dik lo i han fiah ang hmiang’ tia PIL an thehluh chu ho takin a hmawr bawk a ni a, kum 10 chhunga MNF sorkar lai zawngin a tawp an thleng thei lo a, Congress sorkar hunah tak a tawpna an han nei ta mai te kha ngaihtuah tham tak a ni awm e. Aizawl Civil Hospital OPD Floor khat bo tia Politician pahnihte inbeihna ngaihnawm tak tur emaw kan lo tih pawh chu ho takin a zuih ral a ni ber lawm ni kha. Tunah pawh kan MLA pakhat chu sangha bomb chungchangah a hmingchhe hle a, social media lamah a lang chuai chuai a, pawisa pawh an chawitir ngei a, nimahsela nakin lawkah chuan kan sawizui rei leh peih chuang hauh lo ang a, kan MLA ngei pawh hi kan chawimawi leh ngei ang. Chutiang chu Mizo kristiante mizia hi a ni tlat a, Kohhran upain tawngtai duh a neih laia tawngtai duh loh a nei bawk nen thuhmun reng a ni. Heti taka Kristianna belh chian dawl lo hi hmun dangah hian awm ve tak maw le ka ti fo thin a, he kan ram leilung ngei pawh hmangaihna nei hauh loa kan politician te’n hnamdang hnena an lo hlan te hi thinrim awm tak kan nih laiin thenkhatte hi chuan kan lo tan emaw te a ni zawk a, mak tak a ni. Kan harhchhuak mai a nih loh chuan kan hmabak hi a thim khawpin a rinawm. Ram hruaitu ber atangin mahni sahmim puarna tur kan ngaihtuah a, ram dang hruaitute’n rorelna thuthlenga an thutna chu an taksain hriat theih tur khawpa a tawrh laiin kan ram hruaitute ve chuan an thau kung kung zawk puia, thil ho tak tak hawng turin kan ko phar sek bawk nen hian kan chim chin ala sang lutuk lo tih a hriat. An office kai hma thu te, ke-a an kal te, an saruh khel te ringawt kan la sawitui hi chuan kan ram hruaitute laka kan beisei hi ala sang lutuk lo em ni aw a tih theih bawk. Ram tana hna thawk turin beisei ila, khawtlang leh ram tana hmasawnna neih phah theih ngeina turin i tawngtaipui fo bawk zawk ang u. Kan ram hruaitute hi mihring ve bawk an nih laiin vantirhkoh ang maia thianghlim tur hian kan ngai fo thin tih thil an tisual a, thiam loh an chan ngai loh atang hian a hriattheih mai awm e. Hetiang hi ram dangah te hian thleng ve thin tak maw? Kan ram ah hi chuan a neih phu loha In leh lo neitu ngei pawhin biakbukah inthlahrung hauh loin thu ala sawi ngam a, nimin lawka uire pawh lamtualah ala lam ngam tlat bawk a nih hi. Sual sim hi chunglam duh dan a nih laiin keini chuan thlan pawnlam hnawihvar ang chauha sual sim nia lang pawh kan lo chawimawi hman zel bawk a, malsawmna bul hi engkim hmu a, engkim hretu Pathian a ni tih kan hriat hmaih thin. Dinhmun sang leh zahawm takah pawh hlankai ni mah ila keimah ber zawkin chumi thleng tura thawhrimna ka neih chuan siloh chuan a lawm tur angin kan lawm tak tak thei ngai chuang hek lo ang. Thawhrimna hi malsawm dawnna a ni a, thawhrimna atanga malsawmna dawngte chu mit niloin thinlung zawk hian a hmuh hmaih ngai lo a ni. Ram hruaitute’n kan ram hi siamthat a ngai tawh an tih fo laia mahni insiamthat tumna nei chuang loa midang dik lohna leh fellohna an sawi zut zut chhung hi chuan anni hnen atanga ram siamthat hi beisei lo ngam ila, an mipui te hian ram siamtha thei tu tur midang kan thlanchhuah ngam a hun tawh a ni. Tunah rih hi chuan ram siamthatna lam hi politician te sawi tur chauh emaw kan ti a, sakhaw puithiam te tan sawi ve a mawi loin kan hre tlat te hi thil dik a ni dawn em ni. Chutih lai erawh chuan kan sakhaw rawngbawltute ngei pawhin mahni rawngbawlna hna ber - kohhran mipuite tan pawha tawngtaia koh theih loh hial khawpa ropui-a an inngaih tawh chuan a dik chuang hauh lo ang. Pension hnu chauha ram leh hnam vei mi kan nih pawhin a dik hek lo ang a, tute emaw kut chauha ram leh hnam vei hi kan dah a nih bawk chuan kan ti sual hle ngei ang. Hei chauh ala ni loa ram leh hnam veina kan nei duh miah lo a nih phei chuan ram leh hnam hmangaihna nei lo ka niin he rama cheng tlak lo ka ni hial tihna a ni ang a, kan tu leh fate tan pawha zahthlak a ni hial bawk ang. He ram hian hmangaih tu a mamawh a, hmangaihtu der erawh a mamawh lem lo. Tute emawh chuan ram rawngbawlna hi hlawkpuina atan lo hmang pawh nisela he ram leilung hian a lem pil hunah chuan theihnghilh zui a ni ve tho ang. Mahni hlawkna tur ngaihtuah chunga ram rawngbawlna neih a rem lo a, sakhaw rawngbawltu pawhin a rawngbawlsak mipui te aia ram a vei zawk lah a thiang hek lo. Chutiang zelin ram mipuite ngei pawhin ram hruaitute hnena dik lo taka hlawkna duh vanga thil ti tura kan nawr fo a nih chuan a dik chuang hek lo ang. Mahni dikna pawh humhim zoloa kan awm tawh lek phei chuan engmah sawi ngam tawh tur kan ni lo tihna a ni bawk. Ram leh hnam hmangaihna hmachhuana sum leh pai khawn chi kan nih phei chuan he rama awm tlak lo hial kan ni ang. Heng zawng zawngah hian dikna leh rinawmnain hmun pawimawh ber chang fo sela, keimahni tan chauh niloin kan tu leh fate tana rawngbawla ram leh hnam hmangaih kan ni zawk tih hi mipui leh ram rawngbawltu mai bakah sakhaw rawngbawltute hian hre vek ila Zoram khawvar kan thleng tihna a ni mai zawk a ni.