COVID HRIPUI LENG KARA INKHAWM

Mahmuaka Chhakchhuak Jan. 17, 2021 Pathianni vawi 46 zet Biak Ina dan pangngai anga Inkhawm theih tawh loh hnuah Sorkar lam atangin thu thar lawmawm tak a rawn awm a. Jan. 15, 2021 (Zirtawpni) a sorkar thuchhuakin a tarlan danin February thla atang chuan CoviD leng laka himna tura sorkarin inkaihhruaina a siam chu inthlahdul hret a tum thu sawiin chhun lama Inkhawm a remti tain Inkhawm dan tur pawh Biak In-a thutna awmzat chhuta za zela sawm nga (50%) emaw mi 200 aia tam loah a tlem zawk zawk tel theih a ni ang tih a ni. Inkhawm theih loh chhung hi a rei ngar ngar hle mai a, rinna kawnga chaklo deuh leh thenkhatte tan chuan thlarau lam nun chauhna rawih tham te pawh a ni hial awm e. Amaherawhchu khawtlangah sualna a pun phahna erawh hriat a ni lem loin CoviD hripui leng hian mitin nunphung a tihdanglam vek mai avangin zalen takin kan awm thei lo vek a nih ber hi. Hetianga sorkar lam atanga kohhran inkhawm theih a nih dawn thu han hriat hi a lawmawm hle a, phal chin sawi erawh sorkar lam atang hian endiktu an rawn kal zel dawn nge bituk zat hi bawhpelh a hlauhawm lem loh ni zawk ang tih chu hriatthiam har tak a ni awm e. Tlem lai lawka Kohhran Inkhawm pawisa kan chawitir ang deuha kohhran chungah pawh khauh taka dan kan lekkawh a nih chuan endik tur pawh inruat a tha maithei bawk a ni. Tuna sorkar atanga thuchhuak kan hmuh anga mi 200 emaw Biak Ina thutna awmzat chhuta zaa sawm nga (50%) tiha a tlem zawk zawk tih ngawt mai hi Kohhran hruaitute tan inchhiar nghauh nghauh mai tur em ni ang tih pawh hriatthiam a har deuh awm e. Biak In chhunga thutna awm atanga a chanve tih leh mi 200 tih ngawt pawh hi kohhran mipui leh kohhran hruaitute tan a bangbo thlak duh viauin a rinawm a. A chhan chu hei leh chen inkhawm thei loa awm tawh hnua inkhawm theih a han nih tak phei hi chuan inkhawm alo chakawm bik ngeiin a rinawm si a, chumiah chuan kohhran member kan lo thathnem ve deuh si nen, mi 200 emaw thutna 50% emaw tia sorkar remtih chin bak lo inhnar ngawt mai chu a rem chiah awm bawk si lo a, Kohhran hian sum leh pai kan chawi phah fo mai lawng maw le. Nge kohhran hruaitu lam atang hian inkhawm dan tur hi a chhungkua anga detailment siam chi mai zawk em ni ang. Inkhawm tura rawn kal na na na han inhnar haw ngawt mai chu tu tan pawh alo nuam dawn bawk si lo avangin Kohhran member tlemah chuan thil har lo tak a nih laiin kohhran member tamna hmun ah chuan thilhar tak a ni thei dawnin a hriat tlat a ni. Tlem laia Kohhran Inkhawm pawisa kan chawitir takte kha han ngaihtuah let leh hian tuna kan sorkar atanga thuchhuak lawmawm tak lo awm ta hi kohhran leh sorkar lam hian dik leh fel fai taka vawn nun tum ila a tha ngawtin a rinawm. Khang kan sum leh pai chawitirte kha kohhran tana rinawm leh member tha tak tak an ni a, sorkar thuchhuak bawhchhiat tum ngawr ngawr vangin inkhawm an ni loin an sual vang hrim hrim a inkhawm nei lui an ni bik hauh lo. Nimahsela thuneitu lam chuan sum leh pai kan chawitir tlat bawk si. Sum leh pai chawitir hial khawpa an inkhawmna vang khan kan hripui leng hi a darh phah chiah pawhin a hriat lem loh a, sorkar thuchhuak runluih tum vang hrim hrima inkhawm buatsaih an nih bawk si loh avang khan ngaihdam a, hriatthiam mai tur an nih laiin thuneitute lam atang chuan kan chawi tir ta tho a nih kha. Khatiang anga tuna sorkar lamin dan leh dun a rawn siam pawh hi kan bawhchhiat lohna atan kohhran leh sorkar lam atang hian endiktu ruat hial a tha awm e. Mitinin hripui leng hi hlauh nachang kan hre tawh ti ila a dik awm e. Khawilai hmun emawa dan lo bawhchhe palh chu hriat tur a awm zauh zauh a, kar hmasa lawka Congress Party te’n Office hawnna neih paha mithar lawmluhna an neihnaa bituk aia tam an punkhawm vang sum leh pai chawi tir te kha chu anmahni ngei pawhin an hresa a, chawi an hreh hauh loin lungawih takin an chawi a nih kha. Amaherawhchu kohhran meuh pawh hrethiam bik chuang loa sum leh pai chawitir duh khawpa thuneihna kan hmang a nih si hi chuan tuna kan dan leh dun lo chhuak pawh hi a bawhzui lam pawh kan chak ngei turah ngai ila a tha awm e. A nih loha February thla atanga kohhran inkhawm te’n Biak In khat taka an inkhawm emaw member 200 aia inkhawm an tam a sorkar lam atanga Action lak a awm loh chuan Krismas ni tak, December 25-nia Kohhran Inkhawm, member 35 aia tam punkhawm khap laia a aia tam an punkhawm vanga Sakawrdai leh Vaitin khuaa Evangelical Free Church of India (EFCI) kohhran te Rs. 5,000 ve ve kan chawitir te khan an lo hriathiam lo palh mai bakah zoram mipuite hian a thena ni sat tir a, a thena ruahsur tir ang hialin kan sorkar hi an ngai palh ang tih pawh thil awllai tak a ni thei awm e. Anni kohhran te lah chuan an dan bawhchhiat chu insawimawi leh hriatthiamna dil lem chauh hauh loin Police Stationah an sum chawi tur hi lungawi takin an pe mai a ni awm lehnghal a, an zahawm lutuk palh ang e. He hripui leng hi zoram atanga hnawhbo theih ni tawh sela tih hi kan duhthusam a ni theuh laiin nitinin hrivei thar kan la awm zel chu a ni lawi si a. Chuvangin mitin hian he hripui leng hi kan nitin khawsaknaah awlsam taka kai theih mai a ni vangin fimkhurna hi i theihnghilh lo ang u. Fimkhurnaah chuan himna a awm si a, he Hripui leng vang hian nunna chan te phei chu awm tawh lo hram ila ava duhawm em.