DAVID SAILO - THE INVISIBLE MAN

Mahmuaka Chhakchhuak Dec. 12, 2020 Social Media khawvelah kan cheng tawh bawka a hming hrelo chu kana wm kher awm lo e. A wall ah lut ila 19, Sept. 2018 atang Facebook khawih niin a hriat a, a hmasa berin 19 August, 1993 a piang angin a indah a, chumi hnuah Sept. 19, 2018 zing lam dar 1; 09am ah profile picture a rawn dah leh a, Sept. 19, 2018 zing dar 1; 14am ah bawk chuan Got married a rawn inti leh a, hemi zing dar 1; 16am bawkah hian cover photo a rawn dah leh a ni. Sept. 19, 2018 zing 1; 25am ah bawk chuan Here I’m back tiin status a rawn update tan a, thu pangngai deuh tak a rawn post tanna chu 25 Oct. 2018 zan dar 11; 29pm ah niin ‘Update ve teh ang – Tu emaw chu a tawng hliak hliak a, a nui heu reng a, kan ning hle a, Pakhat ve chu a chapo emaw tih turin a tawng bul hmuk hmuk a, a tawngkam chu kan ning leh tho a…… An tawng dan lam a ni tawh lo, a mihring hi kan ning ve tawh a ni ber lo maw…..’ a tih chu a ni. Amah nen mi 22 chiahin an like a, comment tu a nei lo nghe nghe. Tichuan tlem tlemin a wall ah chuan thu chi hrang hrang a post zeuh zeuh a, Group lamah erawh a post fo ni awm tak a ni. A wall ah chuan “CAB tlang tak lohna chhan hi tu te emaw thawhrimna leh tute emaw inthlahdah vang a ni chiah em?” tih chu 15 Feb. 2019 zan dar 6;34 pm ah a post a, heti hian politics lam hawi a rawn post ta zauh zauh a, April 16, 2019 zing dar 1;24am a a post – Status meuha ka tarlan tawh chuan ka lohah harsatna an tawk ta nge nge.. Corner hrang hrang atanga thil thlir hi a tul reng a ni. A tih chu awmze nei tak a nih hmel a, comment 3 awmin enge ni ang le? Tih lam hawi vekin an comment a, tumah chu a chhang chuang lem lo a ni. Heti hian zawi zawiin thu eng eng emaw a rawn post zauh zauh a, tunah meuh chuan a thu post reng reng hi kan ngaihven ta thup ni berin a hriat mai bakah tunlai thil relevant tak tak a nih hlawm bawk avangin hmun hrang hrang atangin titi a rawn awmtir phah a, dik ti tak chung siin mahni awmhmunah kan lo thlawp hlawm thin viau a, chutih laiin amah ber lah chu kan la hre chuang si lo a, social media-a a thil post te lah chu nitin chanchinbu lamin an rawn chhuah chhawng leh fo thin bawk te chuan amah ngaihventu a ti tam zual a. ENG THU NGE A ZIAH THIN: David Sailo hian thu mai mai a ziak ngai lo a, thu tak leh mi nazawngin an ziah ngam loh te mai bakah a bik takin sorkar lai tana ngeiawm tur ang lek lek te hian huai tak takin thil a ziak thin a, thenkhatte tana huatthlala tur tak tak tea ziah chang te pawh a nei bawk. Phaizau lama Sangha Bomb chungchang a ziak te, Zui turah kan tui hal e tih thupui hmanga a ziak te, Pu Lalduhoma chungchanga An ban ang em? Tih a ziak te, VC inthlan ka puh tih thu a ziak te, Inkhualtelem Politics tih a ziak te, Mizo nih a nuam leh thin tih thu a ziak te, Inthlan dan tehnuaih hi tih thupui hmanga a ziak te, Hruaitu nih laklawhna tih thupui hmanga a ziak te, Ngam zawng tih thupui hmanga a ziak te, MLA ban chungchang, Picnic tawh lo ang u, Kum hnih kharna – Vision tih leh thu dang a ziakte chu comment tu a ngah mai bakah nitin chanchinbu lamah pawh chhuah chhawn leh a ni hlawm. Heng a thuziahte hi mi tamtak ziah loh lam leh sorkar sawiselna lam te a nih hlawm vangin mahni Inlum atanga ‘Huaisen’ titu a ngah phah hle bawk. TUNGE DAVID SAILO CHU; Inti hre tak pakhat chuan Aizawl Dawrpui-a awm a ni a ti a, nimahsela tunge a nih a hre thei chuang lo. Sorkar hnathawk lai a nih ring an tam hle a, Officer lian tak a nih ring an awm fur bawk. Politics lama hamthatna lak tum mi erawh nia hriat a ni lo a, Party tan lam pawh a nei hek lo. Zalen takin a duh hawi zawng zawnga a ziah mai thin vang hian Party Politics lama luh tum mi nia hriat a ni hek lo. Pastor rual zingah pawh ‘tunge ni ang?’ tia ngaihventu a ngah hle a, Veteran Politician a nih ring an awm bawk laiin Mi vengva tak leh hawi her zau tak a nih ring an awm bawk. Vawikhat chu Pu Hriata Chhangte hian amah hriat tumin a ngaihven deuh a, nimahsela a insawi duh chuang lo mai bakah amah Pu Hriata Chhangte chu hmaihmaa a hmuh tawh thu leh a beisei le halo ngaih anga mi pawngpawrh tak a nih loh thu te a rawn sawi leh ta mai si chu Pu Hriata Chhangte tan pawh hawi lawl lawlna tham a ni. Vawiin thleng hian Pu Hriata Chhangte hian ala hrechhuak thei lo a, rin deuh pawh ala nei lo ni awm tak a ni. TINGE A INTHUP RENG: Sawi tawh angin amah hi Kohhran rawngbawltu emaw Sorkar hnathawk lai emaw pawh a ni thei a, atan hetianga sorkar tana ngeiawm lek lek tura thu ziah fo thin hi a rem lohna lian tak a awm ngeia rin a ni. Politics lam hawi pawh lo hre bel tawh tak a ni thei a, nimahsela amah an hriat chu hetiang thu te hi sawi ngam dawn loin a inhria pawh a ni thei. Inthup ta lo sela tute emaw chuan FIR an thehlut leh tawh hial pawh a ni thei a, amah tan pawha hrehawm tur khawpin vauna te pawh a tawk tawh hial maithei. Chhan hrang hrang vangin heti hian a inthup ti mai ila a tha awm e. Hetianga a inthup rih hi kan zoram tana thil tha tak tur a nih te pawh ring ila, a thu leh hla kan lo chhiar ve zel te pawh hian min ti bengvar thin bawk a, ngaihtuahna tam tak min neih tir phah hi thil tha tak zawk pawh a ni thei e. Inthup lo sela hetiang thute hi a tan ziah a rem lohna a awm maithei bawk a, Politics lama hamthatna lak theihna turin tute emaw chuan an lo phuar bet tawh hial maithei bawk. Thiltithei zawkte tan phei chuan a ka hupna tura Contract hna an pek hial te pawh a rinawm a, nimahsela chung zawng zawng hresa vek chuan heti hian a inthup reng hi thil tha zawk a nih te pawh ring ta mai ila a tha awm e. The Invisible Man, zoram tan ngaihtuahna sengin thu tha tak tak han ziak zel teh le….