HRINGNUN HI – 28

Mahmuaka Chhakchhuak Nov. 8, 2020 Tlemlai khan Damdawi In pakhatah hian kum upa tawh lam pa pakhat hi a hma ni atanga a zun chhuah theih loh vangin an rawn kalpui a, a dul chu alo puar deuh lung tawhin kun deuh dui chungin a rawn kal a, a khawngaihthlakawm hle a ni. Damdawi In lama thawktute chuan an theih tawp an chhuah a, a dul pawh chu khawih ngam loh khawpin hrehawm a ti tawh hial a, a zun chu an siak sak nghalin liter khat vel tur lai hi an siak sak nghe nghe a ni awm e. Chutianga a zung thei ta chu a lawm em em a, amah buaipuitute hnenah chuan a lawmzia a sawi bang thei lo hial niin min hrilh a, chuta a hlim hmel hmuh a nawm zia te min hrilh chuan kei ngei pawh chuan a hmel hmu ve chiah lo mah ila a lawmna chu enge maw chen hriatthiampui vein ka inhria a, ka lawmpui em em a ni. 2015 kum khan kei ngei pawhin hetiang deuh hian harsatna ka lo tawk ve tawh a, ka thiante Ina thingpui kan in zo bathroom-a ka zun lai hian ka zung kawng – ka sazu hnuai lamah hian bawk deuh hi alo awm a, ka zun kawnga lungte awm niin ka ngai nghal a, tui in ila ka zun chhuah maitheih ka rin bawk avang chuan tui ka in tam lui a. Ka rilru erawh a nuam lo hle maiin zai ka ngai mai ang em? Zung chhuak thei lo ila engtinnge a awm ang? Tih ringawt chu ka rilrua awm a ni nghal a. Dar 11;00am velah meeting ah ka telin kan meeting chu pawimawh hle mahsela ka rilruah keima harsatna chu a lian ber lo thei si lo a, a rukin Pathian hnenah ka tawngtai reng a, zunchhuah theih mai ka beisei avang chuan tui pawh ka in tam lui zel a, pum puar luah khawpin ka in nghe nghe a ni. Meeting zawh veleh chuan ka chhuak vata remchang bera ka hriat, ka hmelhriatte awmna BSNL Office ah chuan kal nghal vatin an bathroom awmna chu zawt chawpin ka pan nghal a, Commode ah pawh zung duh loin washbasin ah ka zung ta zawk a, ka zung hnem hle mai nghe nghe a, ka zung kawnga lungte awm pawh chu a rawn pawk chhuak ta nawlh mai a, ka tawngtaina Pathianin a chhang ngei a nih hi tiin ka lawm kher mai. Mihring taksa hi derdep tak a nih zia ka hre chhuak a, lungte tereuhte, centimeter khat emaw chauh lehnghal vanga ka buaina te ka ngaihtuahin kan taksa lo derdep zia ka hre nawn fo thin. Pa pakhat, reivaklo zung thei loin a zun theih tak vanga a lawm zia te kha ka ngaihtuah nawn foin kan taksa peng hrang hranga harsatna kan neih maitheih dante leh chutianga harsatna nei miah loa tuna nang leh kei hian hriselna tha tak kan nei hi Pathian hnena lawmthu sawi hi kan tih makmawh a ni. Zing leh tlaiah chaw kan ei a, zanah tui takin kan mu bawk a, a tukah chutiang bawk chu thleng leh tura kan ngai ngawta ngaih that lohna nei hran miah loa kan thlamuang em em ringawt te hi a lehlamah chuan ava lawmawm em. Pathianin he leia min din chhan hi duh ang anga awm turin leh duh dana tal mai mai turin min din lo a, chhan nei leh chhan awmin min din zawk a ni. Chu min din chhan chu enge ti a amah Pathian rawn chung zela a duh ang zawnga nitin nun hmang hi kan tih tur pawimawh tak a ni a. Chulam ngaihtuahna nei lo leh ngaihsak duh lo kan nih erawh chuan Pathianin alam kan hawi theihna turin harsatna leh hrehawmna te kan chungah a thlen tir bawk thin. Tihtheihloh engmah a nei lo a, a duh chuan mihring nunna ngei pawh a pawtsei thei a, a duh chuan hote vangin nunna a la mai thin bawk. Uzzia khan Thuthlung bawm kha a tlak hlauin a dawm a, nimahsela Pathianin tanpuitu chu chawp leh chilhin a tihlum nghal a nih kha. Chutiang bawkin kan taksa khawl peng hrang hrangah ngei pawh hian Pathianin thu a nei em em a, damdawi kan ei vanga dam emaw kan intih lai hian Pathianin kan damdawi ei chu mal a sawm tih te hi hrethiam ta zawk ila a dik ngei ang. Nimahsela a chang hi chuan misual zawkte hi malsawmna dawngin kan hre tlat thin a, mi sual zawkte hi hmuingil zawk te hian hriat chang kan nei bawk thin. He mihring taksa derdep tak mai leh thinlung nghet lo tak mai chunga Pathianin ro a rel dan hi hriatfiah thiam phak rual loh a ni a, hriatfiah tuma chhui zawh sen chi pawh a ni hek lo. Kan theih tawk leh kan tih theih awmchhun chu ama fak mai hi a ni a, chu amah fakna chuan malsawmna tam tak a keng tel bawk a ni. Harsatna ata lawmna kan neih chauhin fak lo ila, natna ata kan dam chauhin amah chu i fak thin lo ang u. Kan zung a, kan inthiar a, kan tlan a, kan zuang thei te hi Pathian fakna mawlh mawlhna thama malsawmna a ni tih te hi hre nawn leh fo ila Pathianah hian vuina nei loin nitin lawm takin kan awm ngei zawk hian a rinawm. Kan tawngtaina te pawh hi a malsawmna leh tanpuina dil ringawt niloin a hnena lawmthu sawina te hi tam zawk thin sela he khawvelah hian hlim takin hun kan hmang thei zawk ngei ang le. Chu fakna chuan thiltihtheihna nasa tak a nei si a, Pathian leh mihring inkara inremna atana pawimawh ber a ni. Pathian fak leh chawimawi turin chhan dang zawng loin tuna fiah taka i mit i meng te, i nunna atana boruak i hip lut ringawt te kha sum tam tak sengin mi tamtak te chuan an nei thei chauh a sin. Amah chu fak phawt mai la, phunnawi loin chawimawi phawt mai rawh le.