I VOTE TUR CHIANG ANG CHE

I VOTE TUR CHIANG ANG CHE Mahmuaka Chhakchhuak Jan. 18, 2021 Aizawl khawpui chhung enkawltu ber Aizawl Municipal Corporation Councellor te term alo zawh takah chuan a thar tur thlan leh a ngaiin tunah hian Party hrang hrangte chuan Candidate an siam fel thawhkhat tawh nia hriat a ni. Heng zingah hian mithar hmel hmuh tur an awm nual mai a, chung zingah chuan mipui ngaihzawn tak takte pawh an tel a, mahni hmazawna hlawhtlinna changte leh mi hriat hlawh tak takte pawh an ni hlawm a ni. Mipui tana vote thlakna tur hriatthiam mai theih loh khawp turin an fel hlawm mai bakah ralkhat atanga kan lo ngaihzawn ruk em em te an niin mi hmingtha tak takte pawh an ni hlawm a, chhungkuaa sawiho laih laih ngai tham te pawh ni hial awma an hriat hlawm hi Candidate thlannaa hmasawnna kawng khat kan neih chu a ni awm e. Vote thlak hun alo thlen hma ngeiin hengte hi lo hre hmasa thei ila: KAN BIAL MIN HMANGAIH EM: Kan bial chhung (Area chhung) min hmangaihtu hi mipuiin kan hriatthiam a pawimawh hmasa ang. A theih phei chuan bial pawna awm ni lo, kan bial chhunga awm ngei ni bawk sela, inthlan dawn hnaih anih vanga hmangaih awm taka lang ni mai loin inthlan hma daih atang tawha khawtlang rawngbawlmi ni thei bawk sela duhthusam a ni ngei ang. Kan vote an duh vanga min rawn be tha ta huamte hian min hneh mai lo sela, keimahni ngei pawhin kan bial an hmangaih dan kan hriat chian ngei chauh vote tum ila a tha ngei bawk ang. Therhlo min sawihmuhtu chu vote lo ngam ila, hamthatna eng emaw min sawihmuhtu pawh lehlam hawisan hmak ngam bawk ila. Tihhlawhtlin theih loh tur nia chiang ngawih ngawih min tiamtu pawh hnawl ngam ila a tha ngei bawk ang. Mipui hian Politiciante inbum nawn fo tir lo ila, an thangah awh nawn tir in tum lo ang u. MIPUI AIAWH ZO TUR NI NGEI RAWH SE: Kan khawtlang mi enkawl turin mipui aiawh zo lo deuh leh Party feeling la na deuh te hi kan lo thlan palh theih avangin mipui kan fimkhur a tha a ni. Mipui chunga roreltu an nih ang ngeia mitin huapzo roreltu ngei kan thlan theihna turin vote thlak hma ngei hian chutiang mi chu vote tura kan lo inbuatsaih lawk a tha a ni. Kan tapchhak zawlah min rawn kawm ang a, an tawngkam thiam theih tawpa an han sawi melh melh chuan mi tha tak an nih dawn hi kan lo ti mai palh anga, khawtlangin a hnemhnanpui lem siloh hi kan lo thlan palh theih vangin chutianga ‘lip service’ rawn hmangte chu inhneh tir mai loh a tha fo. MLA Inthlan hnuhnung berah khan mi tam takte chuan kan hre tawh ngei ang a, tawngkam thiam tak hmanga mi hneh tum leh intiam zut zut mi an awm kha. Kuma naupang deuh emaw upa deuh tih lamah buai Io ila, tunlai khawvelah chuan kumin awmzia a nei em em hran lo. Nimahsela chutih rualin a thinlung lama khawtlang hmangaih mi leh mipui aiawh zoa, mipui ngainatmi a nih phawt chuan tumah i vote hreh lo ang u. Kan khawtlanga hian hmangaihtu der ram hruaitu a mamawh lo a, lemchang roreltu a mamawh hek lo tih hi hre theuh ila mi dik leh rinawm, chhungkaw pangngai tak atanga chhuak ngei mi chu i thlang ang u. HMEL LAM EN NGAI SUH: Tun tum chu hmel thar hmuh tur an awm nual a, anmahni eizawnna kawnga hlawhtling tak takte pawh an ni hlawm. TV lama kan hmuh ngun deuhte pawh an awm a, mi fel tak tak an ni ngei mai. Chutiang mite chuan mipui ngainat an hlawh hma bik lehnghal a, tunlai tawng takin ‘Mi lar’ kan tihte an ni. NImahsela kan khawtlang aiawh zo tur hian mi larte hi an lo tha ber hauh lo mai a, kan khawtlang tana rorelna hmuna thu tur hian mi larte hian awmzia alo awm vak lem lo. A chhan chu khawtlang rorelna hmun leh khawtlang rawngbawlna hmun hi mi larte tana buatsaih a nih loh vang a ni. Pathianthu kan en chuan Pathianin Samuela hnenah ‘A hmel lam emaw, a san lam emaw en suh; a ni hi chu ka duh lo a ni; Lalpa chuan mihring en danin a en ve si lo a, mihring chuan pawn lam lan dan a en thin a, Lalpa erawh chuan thinlung lam a en zawk thin a ni’ a tih kha. PARTY HI A PAWIMAWH BER FO: Eng anga mi tha leh mi dik nia kan hriata kan fak thinte ngei pawh hi Politics an luh hi chuan an ze thatna hi an awmna Party hian a chhilh hneh vek tho thin. Tuna kan khawtlang aiawha roreltu tur kan thlan turah ngei pawh hian Party hmel hi alang lo thei loin mipui lam pawhin kan thlir hmaih theih loh tur bawk a ni. Hei vang hian kan lo thlan tlin tawhte ngei pawhin an awmna Party thu loin khawtlangah hna an thawk ngai meuh lo a tih theih hial a, an awmna Party thu chu a kawi a ngilin an zawm ta thin a ni. Tuna MLA ni mekte ah hian chiang takin kan hriat tawh bawk hi. Kohhran leh NGO lama inhmang thinte hian Politics lama an luh leh hian an zia an thlak duh viau thin a, hei vang hian kan politiciante hi kan rin an ang lo fo thin a, mak tih thu kan sawi kan sawi mai thin a nih hi. Hetiang chiah hian tunah mi thar fel tak takin kan khawtlangah roreltu nih an rawn tum leh dawn a, mipui te hian an awmna Party hi ilo chian sak thin ang u. Kan zoram Politics Rampum huap atanga veng chhung thleng hian hman atang tawha Party feeling la na tak kan ni thin a, chu chuan party nih leh nih lohah nghawng lian tak a nei fo thin. Tunah pawh khawtlang roreltu kan thlan fuh loh chuan kan bet leh rawk rawk reng mai dawn a ni a, kan thlan fuh erawh chuan khawtlang pawhin hma a sawn phah ngei bawk ang.