IH, KA HMANGAIH CHE

Mahmuaka Chhakchhuak Jan. 20, 2021 Hmangaihna hi sawifiah thiam hleitheih loh leh hriatfiah zawh sen loh khawpa ropui leh hlu a ni. Mita hmuh theih a ni lo nain mi zawng zawngin kan dawng vek thei si a, khaweng hmu thei loa mittdelte ngei pawh hian a awmzia chu an hrefiah em em bawk. Chumai bakah mi zawng zawngin kan pe chhuak thei bawk a. Chu hmangaihna avang chuan mipa leh hmeichhe karah inpumkhatna a rawn awm a, chu hmangaihna vang vek chuan chhungkua kan lo din phah ta thei a ni. A chhe lamah pawh hmangaihna vang vek hian thikthu chhiatna a awm a, tual thah duh hial khawpa thinrimna pawh a thlen phah hial thei bawk. A nihna takah chuan Hmangaihna hi a thlum a, a parzu dawt a nawm vang hian mi tamtakte chuan khaw hmu lo lekin an atchilh phah thei hial a, chutih rualin a nunrawng em em bawk si. Tumah a thliar ngai hek lo a, mi rethei ber leh mi hausa ber karah pawh zalen takin a leng a, patling leh mi chak ber pawh a buanthlu tawp tawp thei bawk a. Chu hmangaihna eng chuan kan pahnih inkarah zung a rawn kaih a, a bul chu hote a niin kan inbiakna hmasa ber pawh June 19, 2014 a nih nghe nghe kha. Nimahsela hmel la inhmu loa rei tak kan inbiak hnuah chuan inhmu ta lo na na na chu inngainat tak tak theih alo ni lem lo nge ni kum a liam meuh chuan kan inbe ta meuh lo a, kum 2015 ah khan Lunglei rawn kalin thil pawimawh tak kan rawn ti a, in Inah pawh ka rawn leng nghe nghe a, amaherawhchu khual khua atang chuan hmangaihna parzu tlan tak tak a lo har deuh bawk nge ni kum 2016 hnulamah phei chuan a hriat pawh kan inhre ta meuh lo a nih kha. Nimahsela kum 2018 ah Lunglei rawn kalna remchang tak a awm hlauhin Programme pawimawh tak neiin kan rawn kal a, ONO HOTEL ah ka thleng a, Chawngte lam atanga ka Sarep chah rawn thawn chu Civil Hospital-ah damlo awmpuitute’n an rawn keng a, chumi lam tura ka rawn kal chu Casualty kawtah insu thelhin kan intawk a nih kha. Hnai taka in melhin ‘i ni em?’ inti tawn ve vein kan inbe leh a, chumi atang chuan Cell Phone number te pawh inpe thar lehin vawiin thleng tur hian hmangaihna kawng kan lo zawh dun leh ta a ni. Remchang awm zauh zauhin inhmuhna hunte pawh kan nei ta zauh zauh a, Kum 2020 a rawn herchhuah meuh chuan nupaa insiam duh hial khawpin kan inkara hmangaihna chuan puitlin lam alo pan chho tawhin midang tuma hriat lohin hmangaihna hrui khat vuanin kan lo awm ve ta hial a. Chutah nangin ‘ka chhungte’n i hmel an la hmu lo a, rawn interview rawh’ i tih takah chuan huphurh tak leh phur tak bawk siin ka rawn kal ta a. Zan dar 10;00 velah ka rawn thleng a, insilfai zawh hnua ka meilum ai lai i nuin bek thle haa min han thlir mai kha chu ka zak ve teuh ang reng hle a ni. Amaherawhchu intih patlin hun tak nia ka hriat vangin amah chu ka han fiam zui nghal a, kan nui ho ta zawk a. A tuk mai Pathianniah in hnena zanriah kil turin min han sawm nghal mai bawk a, ka tan chuan thil chakawm tak leh huphurhawm tak a ni nain boruak a nuam ta viau thung a. Kumah naupang chhia ni tawh lo mah ila hmangaih berte chhungkaw zinga chawei dawhkan a vawikhatna atana han kil ve ngawt mai chu a nawm dan a dangdai viau nghe nghe (vawiin thleng hian ka la zak ru deuh hial a). Chunglamin kan pahnih tan tluang takin rem a ruat zelin Lunglei atanga ka haw hnu reivakloah chuan Pumkhatna tura pawimawh hmasa ber palai tirh chungchang chu sawiin kan pahnih ngeiin kan rel tlang a nih kha. Nangin rem ilo ti zel bawk a, chumi atang chuan keiin ka chhungte ka bia a, sawihona hmasa ber atan chawhlui kilhona kan nei nghal nghe nghe a. Chuta tang chuan boruak a nuam a, a hahdam a, a hlimawm chho ta viau zel a, palai kal hun atan pawh Thawhlehni zan kan rel ta a nih kha. Kei, kum 40 hnaih tawh takin vawi khat te’mah a ruk emaw ruk loh pawha nupui la nei lo hrim hrim tan chuan a phurawm dan hi thuah hnih chauh ni loin thuah thum lai pawh a ni bik awm e. Palai kal zanah chuan keini pawh a thei thei lo inkokhawmin zanriahte eikhawmin kan lo awmkhawm ve a, chanchin min rawn hrilh hlan nghakhlel takin kan thlir a, kan beisei leh duhthusam ang takin zan dar 9;00 velah chuan chanchin lawmawm tak min rawn hrilh ta a. Hmabak a phurawm a, boruak a nuam chho ta viau zel mai. Palai kal leh hun tur pawh chu chhungkuain kan sawikhawm leh a, Chunglamin kan ruahmanna pawh min remtih sakin tluang takin a hun turte ruahmanna kan siam pawh chu harsatna awm loin kan thleng thei a. A hun atan kan ruahman May 20, 2020 niah chuan harsatna dang awm loin pangngai takin hun kan hmang thei ta a. Amaherawhchu CoviD hripui len lai a nih vang erawh chuan sorkar lamin mi 30 bak punkhawm a phalloh avangin a hma ni chiah hian hruaitute kan lo be hmasain sorkar ruahmanna hi kan lo pelh tak palh hlauhin min lo hrethiam ula tiin kan ngen bawk a. Tichuan a hun darkar a rawn thlen meuh chuan min 60 vel lai kan tling hial awm e. Inkhap theih a ni chuang si lo a, Aizawl lam atangin motor pahnih laia rawn phei an awm bawk a, Keini nupui neih ve a heti zak rawn pungkhawm chu kan lawm hle a ni. 2014 atanga vawiin thlenga kan inkara hmangaihna ti thanglian leh puitlin tir theitu hi keini kan ni hauh lo a, Chunglam Pathian a nih zawk zia ka hriat chian avang hian a hnenah lawmthu ka sawi fo a, Nupa nihna hian kentel alo ngah zia te ka han hre thar leh deuh deuh thin bawk a, nupui neih ka inpeih emaw ka lo intih thin kha ka la inpeih loh zia te ka han hre thar leh bawk a. Nula tlangval kan nih laia Hmangaihna kha a par a mawiin a hmuh a nuam em em a, a parzu dawt a chakawm em em a nih kha. Tunah hian alo danglam ta pawh nichuang lo hian tunah erawh chuan kan inkara Hmangaihna kha midang tana rahchhuak turin leh kan pahnih tan pawha kar-awl awm hauh loa lawmna hmunah chauh ni loa tahna leh lungngaihna hmunah pawh lungrual taka in hmangaih turin alo tiak tan ta zawk tih ka hriat hian mak ka ti a ni. Sawidan pawh ka thiam lo a, ka sawi thiam chhun chu - Ih, Ka Hmangaih Che tih hi ni mai rawh se.