INKHAWM THEIHLOH I CHHUANLAM EM NI?

Mahmuaka Chhakchhuak Dec. 27, 2020 CoviD hripui leng vangin March 22, 2020 atangin Kohhran Inkhawm dar a ri tawh lo a, Dec. 27, 2020 (Pathianni) nen chuan vawi 41 Kohhran Inkhawm kan nei thei tawh lo tihna a ni. Kumthar lamah pawh hian Inkhawm kan la neih theih mai hmel loh lehnghal a, engtianga rei tak Inkhawm thei loin nge kan la awm zel dawn pawh a hriat theih rih loh a nih hi. Thenkhatte chuan Minister thenkhatte thil hawng leh hun hmanna hrang hrangah mipui an pungkhawm luih luih a, khawilai hmun emaw nia kan Ministerte mipuiin an zawn pawh khan Social Distancing an ngai pawimawh miah lo an ti bawkin tun Krismas dawn hnaiha Aizawl khawpui chhunga mipui bazarte ngei pawh khan an ngaih pawimawh loh laiin Kohhran Inkhawm erawh an remti chuang si lo tiin vuivaina tur chi hrang hrang an lo zawng bawk a. Hetiang anih mek laiin mask hreng lo te sum leh pai kan inchawi tir danah lungawih lo tak tak kan lo awm bawkin mi pakhat phei chuan nghathu rim hnim chhung leka mask vuah tha lo pawh an chawi tir a ti hial a. Vuivaina zawn dawn chuan hetiang lo pawh hi sawi tur ala tam thei awm e. Kohhran Inkhawm theih loh phah meuha rampum huapa hripui leng hi thil namai a ni lo a, sorkar lam tan pawh luhaithlak deuh tur a ni. Mipui duh dan leh tha tih danin a kal vek theih si loh a, sorkar lamin dan leh dun a siamte lah mipui tan zawm vek alo harsa thin bawk si a, Israelfate’n Pathian chunga an vui ang mai kha kan ni ber awm e. Chutianga kan tih nek nek chhungin hei kumtawp chu kan lo thleng chu a ni mai bawk a, kumthar lamah chuan hei aia ruahmanna fel leh mipuite pawhin kan lungdamna ngei tur inkaihhruaina dan thar zawk pawh kan neih mai te pawh beisei ila a tha awm e. A nih loh pawhin sorkar lamin inkaihhruaina dan a siam pawm thei turin mipui lam zawk pawh kan hmin tlang tawh maithei bawk a. A engpawhchu nisela he hripui leng hi kan tawn thar leh zirchawp hmang tea hriat chauh a nih vang hian mipui tana inkaihhruaina dan siam pawh thil awllai lo tak tur a ni. Chutih kara Pathianni vawi 41 lai Inkhawm thei loa kan awm hi lo la urhsun viau kan awm erawh thil tha ber a ni lem lo maithei thung. Inkhawm theih loh tura Biak In khar avanga thlarau nun chau kan awm a nih phei chuan ringtu nun derthawng tak kan ni ngei ang a, Inkhawm loh vanga khawtlanga sualna pung ta hial tura kan ngai a nih phei chuan a dik hauh lo ang. Inkhawm theih loh vanga Pathian kan be pawp thei loa kan ngai a nih lek phei chuan ringtu ngaihtuahawm tak kan ni tihna a ni bawk ang a. Kum Za chuang Kristian ram lo ni tawh tan chuan Pathian biak dan kawngah pawh thanglian tawh tura ngaih kan ni ngei ang a, Heti zat Sakhaw rawngbawltu kan nei chunga hrileng vang mai maia kan inthlahdah phei chuan kan kristianna hi bultan that a ngai zawk hial awm e. Kristian hmasaberte kha mi tlemte an ni chungin an pung zelin vawiinniah chuan anni zarah nang leh kei ngei pawh kristian-ah kan lo awm ve ta hial a ni a, hetiang khawpa kristiannain ram a zauh tawh kara hrileng vang mai maia kan inthlahdah a ni chuan kristian pianthar nawn leh ngai kan ni tihna a ni hial awm e. Kan Biak Inah ngei hian Genesis leh Thupuan inkar mai bakah kristian awmdan tha tinreng kan zir thinin kum tam kan lo zir tluk tluk tawh a, khangte kha vawiinniah hian rahchhuahpui tur kan ni tawh zawk awm tak a nih laia nausen ang maia hnutea chawm kan la ngai leh fo a nih chuan inngaihtuah kan ngai awm e. Zoram buai lai ngei pawh khan kan nu leh pate (tunah ngei pawh min la dampui an awm bawk ang a) khan inkhawm thei loin vawi engemawzat sipai hlauin an awm a, inkhawm chak ngawih ngawiha an awm thin tihte pawh kan hria ang. Anni kha chu sipai hlauh vangte kha a ni a, silaimu vanga nunna chhanhim duh vangin inkhawm loh a ngai zawk a, keini chu hrileng vanga nunna chhanhim a ngaih vang zawk a ni. Kan hmelma hripui leng hi a hmuh maitheih si loh avangin mitin kan fimkhur theihna atan Biak In khar alo ngai zawk hi remchang taka chhungkaw kima Pathian biakna hun atan tea lo hmang zawk kan nih phei chuan a lawmawm ngawt ang. Heti taka kan kristianna belhchian dawl lo te, kan kristianna percentage hniam ta tlat mai te, lemchang kristian kan tam ta lutukte hi vei ila kan danglam theihna atan urhsun takin i tawngtai fan fan zel zawk teh ang u. Kan nula thenkhatte lahin Biak Ina nalh tak taka inkhawm chu Pathian hnaih phahna ai maha mipa mit lakna atan tea an lo hmang thin te, kan tlangval thenkhatte pawhin Biak Ina Inkhawm chauh nungchang thaa an lo ngaih hman lek lek hialna te, Uire thulh duh chuang hauh loa lamtuala inthlahrunna nei miahloa kan lam thinnate, Politician thenkhatte pawhina taihma taka inkhawm kal an lo chibai nghauh nghauh thinnate leh Pulpit tlanga lemchang thiam taka mittui tla lek lek hiala Pathianthu an lo sawina zawng zawng baka Rawngbawltu thenkhatte ngei pawhin hmaikawr atana an lo neih emaw hial tawh khawpa Biak In an lo ngaih pawimawhna zawng zawngte kha hri leng vangin tih danglam alo ngai ta ang hian kan nungchang theuhah danglamna thlen ta bawk sela a va tha dawn em. Kristian belhchian dawl, kristian rinawm ngam leh kristian huaisen ngam hi a ni lawm ni kan Lal Isua ngei pawhin a hnungzui tura a duh kha. Hawh teh u, CoviD vanga kan inkhawm theih lohna zawng zawngte hi malsawmnaah i chantir zawkin puitlin lam pan turin kan mimal nun theuh hian Pathian hnaih zawk i tum theuh ang u hmiang. Chuti chuan Zoram Khawvar kan thleng hnai tihna a ni mai ang a, kan ram ngei hi Krista Lalna ram alo ni bawkin kan Kristianna ngei pawh hian hma a sawn phah ngeiin a rinawm a ni. Pathian a danglam lo ang bawkin a thu pawh a pangngai reng a, nang leh kei hi danglam thin zawk chu kan ni si a.