KHAWVEL HI A FAIR MAWLH LO!

Mahmuaka Chhakchhuak Oct. 8, 2020 Khawvel hi Setana lalna ram an tih fo thin hi alo dik ngawt asin. Pathianmi kan nihna te leh sakhaw rawngbawltu kan nihna te meuh pawh hian he thim chunga thuneitu thununna hi kan do zo lo leh thin bawk si te hi thilmak tak a ni awm e. Tumah dem tur an awm chuang lo a, tumah puhmawh tur awm chuangin ka hre lo a, nu pumchhung atanga tap chunga lo piang chhuakin khawvel eng kan lo hmu a, nu leh pa thlazar enkawlna hnuaiah seilianin hringnun kan hmang chho a, mahnia kawng inhai kaw thei hiala nun kan hman chhohnaah hian thil tam tak kan tawng a, chungah te chuan chunglam remruat emni zawk tih tur hian harsatna tam tak kan tawng fo thin. Harsatnate hi sual leh keimahni tana tha lo an lo ni ngawt lo a, kan puitlin chhoh zelna tur atana chunglam remruatna pawh alo ni zawk thei bawk. Chung thil tam takte chuan kan taksa a ti hnualin kan thinlung ngei pawh a ti chau thei thin bawk a, nimahsela huaisen tak leh chak taka paltlangtu chuan hlawkna a chharchhuak thin bawk a nih hi. Paltlang zo lo te erawh chuan an chauh phahin an hnungtawlh phah thin bawk a, hmasawn thei loin rei tak, a thente phei chuan kumkhuain khawvel her ruala her ve thei loin an dinna hmun ngai rengah te an din phah thin hial a. Retheihna te hi anchhia a ni ngawt lo a, lo nisela chuan Abraham Lincoln kha khawvelin kan hre kherin a rinawm loh a. A ni chuan retheihna chu taihmak phahna atan a hmang hlauh thung a, lo rethei lo sela chuan American President a ni thei lo hial awm e tih theih tur a ni ngei ang. Midang anga lehkhabu chhiar tur a neih ve zawh loh vangin an awmna kiang hnai, kilometer 2 bial chhunga lehkhabu awm zawng zawng chu ka chhiar zo vek ti thei khawpin lehkhabu chhiarin a kal kual thin a, thingkittu fapa mai chuan ram ropui tak hruaitu dinhmun alo din phah thei zawk a ni. US President a nih theihna tura a kalkawng bumboh zia te hi thawnthu ngaihnawm tham a tling a, tawngkam thiam takin an sawi phei chuan mittui ti tla hial thei khawpa khawngaihthlakawm khawpa retheihna paltlang hnem a ni. Nimahsela a ni chuan tluk a tum lo a, a tluk palh pawhin thawh leh vat a tum thinna zawk chuan mi zawng zawng theih loh tur kumkhua dinhmunah a hlangkai kan ti lo thei lo ang. Ka tum nge ruh sa ruh ti ang maiin a tum (goal) chu thlen ngei tumin a insehruh sauh sauh a, nuihzattu tam tak karah pawh hmuh theih loh chu a hmuh tlat zawk vangin hlawhtlinna a chang a nih kha. Mi pakhat mai chunga hetianga harsatna thleng tam hi awihawm loh khawp a ni zawk a, nimahsela chung harsatte chu a thlen tumna a san vanga lo awm a ni zawk te pawh a tih theih tho bawk awm e. Nang leh kei hi chuan Lincoln-a harsatna tawh zawng zawng hi kan tuar zo ve kherin a rinawm loh a, Pathian ngei pawh dem duh hial khawpa kan thlarau nun thlenga chauh phah rawih rawihna tham a ni hial ta ve ang. Keini chuan harsatna tia sawi tham loh thil te tham te te kan tawh pawhin Pathian lakah kan vui mai thin si a. Khawvela cheng mihring hi alo in an loh theih ngawt mai. Buhfai thlak tur neih loh vanga lungngai nghal mai te, natna tawrh vanga Pathian dem ta mai te, kan thiltih a tluan loh vanga tu emaw puhmawh tur zawn mai te hi keini chuan kan awlsam viau si anih hi maw le. Pathian hian hetiang mai mai tur hian min din lo tih hi i hre fo thin teh ang u. Pathianin khawvelah hian awmze nei loin min din lo a, engemaw kawng khat tala awmze nei turin nang leh kei hi min din a ni tih hi nghet taka pawm zawka min din chhan chu hre turin amaha rinna nghet tak nei turin min duh zawk a ni. Tumah hi rethei reng turin min din lo a, chutiang bawkin tumah hi hausa reng turin Pathianin he leilungah hian min din lo tihte hi sawi nawn fo a ngai thin. Darwin-a theory ‘Suvival of the Fittest’ hi he leilung awm chhunga dik reng tur a ni a, nang leh kei atan hian a pawimawh zual bik tih te hi kan theihnghilh lo atana thil tha tak a ni. Nang leh keia tan hian thil pawimawh tam tak a awm ngei ang a, chung thil pawimawh tam tak zinga pakhat lek lakchhuah ka duh chu DIKNA hi a ni. Dikna nei tur chuan huaisen a ngai a, Dikna nunpui turin rinawmna a ngai nghal bawkin dikna vanga tawrh tur ala awm cheu bawk a. Chuvangin Dikna chu duh hle mah ila thildang ken tel a neihte chu kan neih tel si loh chuan awmzia a awm ngai chuang lo ang. Hmeichhe pakhatin pasal nei reng chunga tlangval a kawp ru fo thin ang mai chauh a ni. Uire chung renga biakbuk chhunga lam thulh duh chuang miah lo te, chumai pawh la ni lo, Pathian chawimawina hial la pek hreh chuang miah lo mihring hi nang leh kei chuan a awm theih kan ring lo a ni maithei a, nimahsela kristian ramah hian an awm tlat bawk si hi mak tia sawinawn fo tham a ni. Kohhran upa hmaah a uire-na pa zawk inpuang fai kelh tawh mahsela rawngbawltu hmaa zam chuang hauh lo mihring te hi zuk la awm a maw le! A uire-na pa zawk chu kohhran upa te lah chuan zuk la tlawh duh lo hlauh zawk i a! Hetiang mai lo thil dang tam tak he kristian ramah hian a thleng fo tawh thin a, ala thleng zel bawk dawn ni te hian zuk hriat a! Khawvelah hian vantirhkoh anga thianghlim famkim hi kan awm kher lo ang tia kan sawi fo laia Vantirhkoh rual zingah meuh pawh Pathian mitmen ti hrehawm khawpa bawlhhlawh hmuh tur Lucifer-a ala awm thei ngai a nih chuan he leia mihring zingah hian Pathian hnen thleng tlak lo mihring hi kan va tam dawn tak em. Khawvel hi fair lo tih chang tam tak i nei ngeiin ka ring, nimahsela fair lo ti reng chung pawha kan tlanbo san theih chuang miau si loh avang hian Dikna nunpui turin huaisenna leh rinawmna hi eng dang zawng aia kan mamawh chu a ni.