KRISTMAS BAWNG KAIH

Mahmuaka Chhakchhuak 

Dec. 22, 2020 

 Kan kohhran upate chuan kaih tur tih an lo rel fel vek tawh ang chuan rual u zawkte hnungzuiin Arro khuaa Kristmas Bawng kaihnaah chuan kal ka tum ve ta a, heta kal ho hi mi 15 vel kan ni a, keini tak phei chu tangkaina kan nei lo viau a, phur vanga kal kan ni ber zawk awm e. Phur takin kapa chempui chu Iptepuiah ka akchhuak ve ngawt a. 

Arro khuaah hian hmelhriatsa ka neih loh vangin ka thianpa Chhantea chu kawpin zanriah te eia riak ve mai turin a u te In chu kan pan a. Hetih lai hian kum 13 vel ka ni maithei a, Arro khua pawh hi ka vawikhat kalna a ni nghe nghe. 

 Zanriah eikhamah chuan mualah kan chhuak khawm a, Arro khaw luh tirhah hian Mual zawl awmin, naupangte phei chuan ball petna atan an hmang fo thinin zan lamah pawh Bawng riah khawmna hmun a ni nghal bawk a, mual zawl kianga In pakhatah chuan keini o chu kan kalkhawm a. Chinchang hre zawk kan val ute chuan bawng awmkhawm zinga kan Kutsa ber tur chu touch light hian zawngin an han chhunkual pap pap a, an hmuh fuh chuan a nghawnga hlin a, thlun beha, naktuk lamah Khawzawl lamah letpui leh tura ruahman kan tum a ni. Val u zinga ran chinchang hre tak mai Pu Chunga chuan a touch light, cell 4 ngat chuan kan bawng man tur ber chu a mit takah hian a chhun a, hetia a chhun lai hian a thim lamah mi pakhatin hruizen valh sa hian lo phihawh tur a ni. Hetia light hmanga a mit taka chhun hi a mit tih vaihna atana chhun a ni a, mitvai taka a awm chuan a kiang hnaia amah pana mihring kal pawh chu a hmu fiah thei dawn lo tura ngaih a ni a. Chutianga engtin tin emawa kan buaipui hnuah chuan a nghawngah tak mai hruizen chu tlangval pakhat chuan ava valh thei ta hlauh mai a. Banah kan thlungbet zui ta nghal a. 

 Chumi zanah chuan In pakhatah hian kan titi khawm a, kan nui dar dar hlawm a, thlasik lai khawvawh lai mah nisela Arro khua hi alo zo ang reng hle a, zanah pawh chuan rin ai takin a vawt lo a. Zan dar 9;00 velah chuan mahni riahna tur lam theuhah hawngin keipawh chu ka thianpa Chhantea nen chuan a ute In lam panin kan hawng ve a, a u nupui chuan dap chhuatah hian mutna alo phah diam sa bawk a, kan thian dun chuan mu nghal mai a, Arro khua hi ka vawikhat hmuhna a nih vangin hla ka ti deuh bawk nen chuan ka chau ang reng hle a, ka mu tui hle nghe nghe. A tukzingah pawh chuan kaihthawh chawp ka ngai a, tho phang tak chung chuan tukthuan kan ei mawlh mawlh a, keini rual tan chuan chaweitui loh a awm lem lo bawk a, ka ei nual tho mai. 

 Chaweikhamah chuan mual zawlah keini ho chu kan kalkhawm leh a, nimin lama a thenin kalpaha chiar hrui an lo chhah te chuan kan Bawng kaih haw tur chu an han thlun belh leh bawk a, hrui sei tak te chu an hnuh tir bawk a, kan inpeih ta maw tihah chuan bawng chu a thlunna atanga an han phelh chuan kaih mai kan tum a, alo duh awzawng lo mai a, a kal duh ta tlat lo mai a, a lu a thing muat muat a, a ni lo lama tlan vak te chu a tum bawk a. Hrui pathum vela a kaihna tur kan thlun hmang chuan kan pawt kak thu hlawm a. A hnu deuhah chuan engtin tin emaw hian Khawzawl lam panna kawngah chuan a kal duh ta hlauh mai a, a tir chuan kal pangngaiin a kal mai a, nimahsela a hnu deuhah chuan a tlan ta vak mai a, kan pawt ding zo mai si lo chu hrui vuan reng chung chuan kan tlan ve vak hlawm a, keini naupang lam phei chu kan tlan chak loh bik vangin a hnung lamah hian kawr phe lawp lawp chungin kan tlan ve a. 

 Khawzawl lama kal a kilometer 3 vela Arro khua pelh tawh si, Khuai kham an tih (a hming hi ka sawi sual maithei, tunhma lamah phei chuan ramhuai an hmuh fona hmun)ah chuan kan Bawng kaih chu ramhnuai lamah hian a tlan ta thut mai a, U Mafaka phei chuan a kaihna hrui chu a vawn tlat si avangin a pawt hneh lo hi kawngpui vut ah chuan Bawng chuan a hnuk khu rum rum mai a, feet 10 vel lai hi a hnuk hmanin ka ring hial a, vawiin thleng hian vaivut khu kara U Mafaka bawngin a hnuk lai hi ka mitthlaah ala cham reng a, ‘Pa’ hi ka ti khawp mai. Bawng lah chu ramhnuai lam pana a tlan avang chuan a ni pawh chuan pawt ding zo loin hrui chu a thlah a, chak tak chuan ramhnuai hnim pik karah chuan a tlan lut a. Keini pawh chuan zui ve nghalin hling leh bawn pik tak tak karah chuan a hniak zuiin kan um zel a, nakinah chuan Bawng chu kan hmuin kan hual bet a, kan man leh thei hram a ni. 

 Kawngpui lamah kai chho lehin, nilo kan hnuk chho a ni mah zawk a, a sual ve hrim hrim bawk nen chuan kaih a har hle mai a, hruia pawt an awm laiin a mawng lama lo nam an awm bawk a, a chang leh a mawng lama awmte chu a rawn kheng bawk a, tianga vuak a tawng ngun malh malh thin hle. A thenin a mei an lo herh bawk a, mei herh chu a duh lo hle mai a, a ke hnunglam hi a leng vat vat thin bakah a chang phei chuan a tlan leh thut thut phah thin avangte chuan a meia herh chu ti lo tur tein kan han inkhap leh thin bawk a. Kan bawng kaih berin sual a chhuah chang chuan a meiah kan herh leh nge nge thin. 

Tun hnua ka ngaihtuah leh hian hetianga Bawng mei herh hi alo na duh dawnin ka hria a, kan theihtawpa vial chuat tham khawpa kan han herh chuan a awm mai mai thei ngai reng reng lo a ni. Tichuan, Kawihthuang lui vel kan thlen atang chuan a zalh ta raih ni berin kan hria a, pangngai takin a kal tain kaih pawh a nuam ta hle a, khua kan hnaih tak deuh bawk avang chuan Bawng luah te chuan Tlaizawng parte leh tlangsam par te chu Bawng tan pawha khaw hmuh theih loh tur khawp hian kan thiat khat luk mai a, kan zinga fiamthu duh deuhin kan inrin loh laia Bawng mei alo herh thut chang phei chuan Bawng chu a tlan leh vak a, nui hluah hluah chungin kan um leh vak thin bawk a. 

Tlai lam, ni tlak dawn hnaiha Biak In tual kan thlen chuan Zunin kiangah Bawng chu kan thlung a, thingpui senhang leh kurtai hmeh paha kohhran upa leh nuho kiangah report kan han pe nak nak chu a nuam ve thin hle a ni.