KUMTHAR TIPS

Mahmuaka Chhakchhuak 

10 Jan, 2021 

KUMTHAR INTIAMNA: Kum hmasa, kumtirah ngei pawh khan hetiang rilru hi ilo nei tawh pawh a ni thei a, kumthar tirah hian mahni mimal nun hmasawnna atana intiamna neih hi chin fo tlak a ni. 

Thil ropui leh lian tham tak takte chu a that tho rualin thil ropui tak nia lang lem lo te pawh a pawina a awm chuang hauh lo. I bansan tur thil pakhat leh i tih ngai loh thil pakhat ti tura intiamna angte hi thil tangkai leh zawngchhang tlak tak a ni thei a ni. Sahdah hmuam ka sim ang, Meizial zuk ka bansan ang tih emaw Tuibur hmuam ka bansan ang tih emawte hi taksa tana thil tha tak a ni thei. Kum thar atang chuan Morning Walk ka nei ziah ang tih emaw, kuminah Lehkhabu pakhat tal ka khawrpum ngei tur a ni tih emaw, Article 50 tal ka ziak ngei tur a ni tih emaw, nitinin zing lamah emaw tlai lamah emaw Chhung Inkhawm kan nei ziah tawh ang tih te pawh hi thil tha leh zawngchhang tlak tak a ni. 

Hetiang hian heng kan sawi loh te pawhin thil pakhat emaw tal kumtharah hian intiamna nei ngei ngei ang che. I intiamna chu langsar taka hmuhtheih tura banga tar te hlei hlei a tha a, nangmah chauha hre loin i chenpui te hriatpuina ngeiin intiamna neih kha a tha a ni. A remchan phei chuan tuktinin chhiar ri lauh lauh bawk la, thildang zawng aiin ngai pawimawh bawk la a hlawhtling ngei ang. 

LEHKHABU BAWM CHINFEL: January thla kan thleng a, nakin lawkah chuan Fabruary thla pawh kan thleng chho leh mai dawn. Nitinin mahni hnathawhna leh pawl neuh neuha kan inhman bawk vangin kan buaiin thildang kan ngaihsak hman meuh hlawm loh thin avangin tih tur nia kan hriatte ngei pawh kan ti lo leh mai thin a, a rei hnuah loh theih lohin kan buaipui leh tho thin bawk si. 

Chuvangin Kumthar tir te ala nih lai hian kumtluana buai ngai lo turin kan lehkhabu bawmte hi chingfel thin ila a hahdamin hmuh alo nuam bawk thin. Nitin chhuak chanchinbute, Kartin chhuak leh Thlakip chhuak Chanchinbute kan lak pawlh bakah Kohhran chanchinbute kan la bawk a. Chungte chu a rem lai laiah kan dahkhawm mai a, hun alo rei deuh chuan mumal lo takin a hnawk nuaih duh viau thin. Chanchinbute hi ngaihhlut nachang hre lo tam tak erawh kan awm a, ngaihhlut tur a ni. Nitin thilthlengte leh mi thiam thuziakte hi chhiar ve fo thin tur a ni a, kan ram chhunga thil thlengte leh khawvel hmun dang danga thilthlengte hi nitinin ngaihven thei lo mah ila, ngaihven chang kan nei bawk tur a ni. 

Nitina chanchinbu, Vanglaini, Aizawl Post leh Zozam Times angte hi in la (Subscribe) a nih chuan a remkhawmna hmun bik siam la, chutah chuan nitin dah thinin thlakipin dah tha thin ang che. Kartin chhuak chanchinbu te Thlakip chhuak chanchinbute pawh thehdarh mai mai loin a dahkhawmna siam la, thla tawp lamah emaw thla hnih danah te emaw chingfel lehin dah tha thin ang che. A theih phei chuan hun insiam la a thopazuan talin chhiar nawn leh hram thei la a tha ngawt a sin. Kan ram sorkar kaldante, kan kohhran kal dante leh kan nitin khawsakna thil chi hrang hrangte hi a hnua chhiar leh hian hriatfiah a awl thin riau a nia. Chutianga duhthala i chinleh tawh hnu, mamawh tawh loa i hriatte chu hnawk i ti deuh a nih phei chuan Kg hmiah tawh mai rawh. 

CELL PHONE THUAHFAI: Technology changkang takin kan mimal nun theuh hi min hnuk ta chu a ni ber mai a, kal thiam lo chung chung pawhin kan inzir chawp a, thiam lo chung chungin kan hmang mawlh mawlh tho a nih hi. 

Thalai chauhte thiam tura kan ngaih pawh kum upa zawkte ngei pawhin thiam ve kan tum zel hi a lehlama ngaihtuah chuan thil lawmawm tak a ni. WhatsApp kan tihte leh Facebook kan tihte hi thalaite khawih tur emaw chauha kan ngaih laiin kum upa zawkte tan hlei hlei hian alo tangkai thei mai. Kum tam tak thian inhmu ngai tawh lote chanchin inhriat pawhna pawimawh tak a ni thei a, thlalak hlui tak tak han phawrh lehte hian lunglenna a kaitho leh thei thin bawkin inngainatna thar te a rawn piang leh thei thin bawk. Nimahsela a tha lam chauh niloin a chhe lamah pawh hmasawnna thar a rawn her chhuahpui theih bawk avangin mi tam takin an chhiat phah mek bawk a nih hi. 

Tichuan, kan Cell Phone neihte chu thlalak inthawnna atan te leh Document pawimawh tak tak inthawnna atana kan hman tangkai a ni a, thlalak chauh niloin video te ngei pawh kan inthawn ta fo a nih hi. Hetianga hmaraw chelek bera kan hman a ni vang hian kan Cell Phone hi mi tam tak chuan Document pawimawh kawl thatna atan bera hmang kan tam ta a. En leh tura phawrh mai alo awlsam bawkin a lo him bawk a, kan uar ta viau mai. Nimahsela hetianga Document kawl thatna atana kan hman uar viau lai hian a zawhloh khawpa kawlthat erawh a awm theiin a memory berin tlin loh chin alo nei ve bawk theih avang hian kan Cell Phone chuan tawrh zawh loh chin neiin alo chiangkuan loh phah thei a ni. Chutiang chinfelna atan chuan kumthar tir hian hunthawl tha tak insiam la, Computer lamah i Document pawimawh leh Thlalak vawnthatte chu dahlut thin ang che. Computerah chuan folder fel taka siamin i hriat awlsamna atan chiang takin a folderte chu hming pe la, chutah chuan i Cell Phone a Thlalakte leh thil pawimawh dangte chu dah thin ang che. A nih loh pawhin E-Mail lamah pawh document vawnthat hi a remchang tho a, nimahsela E-mail chu vawikhat thawnah hian a leng tawk bituk a awm vang hian taihmak deuh erawh a ngai maithei thung. A him thuah chuan Computer-a kawlthat ngawt ai chuan a him zawk daih thung a. Mi tam takte chuan document dahthatna atan an hmang uar viau bawk a ni. 

Hetiang hian kumthar tir hi thildang tih thulh chuang loin tangkai leh hlawkthlak takin hmang ila, keimahni vek hian a lawmawm zia kan hre leh thin a ni. Thil vawng reng thei lo mi tan ngat phei chuan tangkai tak a ni a, thusawimi leh ziakmite tan pawh tangkai tak bawk a ni.