S.E. LAST TOUR ZUIIN - Saisihchhuah lama

Mahmuaka Chhakchhuak Dec. 11, 2020 Lunglei Circle-a PWD Superintending Engineer, Pu Vanlalruata Sailo chu Aizawl lama awm tur sawn a nih takah chuan a bial fan tawpna ber turin December 2, 2020 ni chuan Aizawl atangin kan thian thenkhatte chu motor 4 hmangin an lo chhuak a, keini Lunglei lam pawh motor pakhat hmangin kan chhuakin zing dar 11;30 velah Hnahthial IB ah kan inhmuhkhawm a, tukthuan te kan ei nghal a, muangchanga kan han zik-mar hnuah chuan S. Vanlaiphai lam pan turin kan zavai chuan kan kalho leh ta a. He Last tour neihnaah hian mi 25 te chuan mahni in lum kan chhuahsan a, Aizawl lam atang hian Pu Ruata Sailo leh a nupui, Pi Mali bakah Pu Hriata Chhangte pawhin an nu leh an fanu a rawn hruai bawk a, Pu Makima of LIC leh Pu Vanneihthanga (Pu Vana of LPS) bakah thian dangte rawn tel bawkin keini Lunglei lam atang hian Pu Lalnuntluanga Sailo, Pu Lalramtiama Sailo, Advocate leh Pu CS. Chawngchhuma bakah Driver leh kei te chu kan ni bawk a ni. Hnahthial atanga kan chhuah hian Tuipui D khawtlangin uluk taka an lo humhalh Sangha chu thlir kan chak avangin lui lamah kan peng hmasa a, Sangha lian tak tak, kgs. 10 zet turte hi thahnemtham tak an lo enkawl a, keini chuan neutrella (bekangsa) kan kente chu kan thlak a, an inchuh nak nak te chu hmuhnawm kan ti hle mai a, hetianga Tuipui khawtlangte’n an lo humhalh hi fakawm kan ti hle bawk a ni. Hmun dangah te hian hetianga humhalhna hi awm teuh sela a duhawm hle bawk a, tourism lama sum lakluhna atan thil tha tak pawh ala ni thei ngei ang. Thla te lakpui zawh chuan muangchangin kan kal leh a. Tlai lam dar 4 dawnah chuan Darzo kan thleng a, khua a thim hnaih tawh vangin kan chawl khawmuang duh ta lem lo a, S. Vanlaiphai lam panin kan tlan zel a, dar 5; 30pm velah kan thleng a, Saikhuma Farm ah thingpui in hmasain a enkawltu Pu Lianhmingthanga chuan lawm takin keini ho chu min lo dawngsawngin kan thlen hlim atang chuan huan te kan thlir a, thim chung chungin an vawk vulhna hmunah te kalin mi taihma tih takah mit a tlei hle a ni. Keini vawk vulh dan anga vulh veloin an vawk vulhte hi a hungna siamin an tlat tir a, vawk ei tur chaw pawh an chhum ngai lo a ni. Chutiang bawk chuan an Ar te pawh chu an tlatna tur chin hungin zalen takin an tla darh a, eitur pekna hmun an siam sak bawk a. Hetianga ran vulh hi an lo ngeih daih zawk tihte min hrilh a, an ran vulhte lah an harh that hmel bawk si a, mihring tha leh zung hman alo ngai vak lo bawk nen. Chutianga hmun hma leh ran vulhte kan thlir zawh hnuah chuan kan thlenna hmun tur Tourist Lodge lam panin kan kal leh a, thawmhnaw te dah felin kan in silfai a, zanriah pawh kan ei nghal deuh mai bawk a. Zan dar 8 velah Zawlnei Saikhuma Thlan lamah kan zavai chuan kan kal leh a, Saikhuma Thlan hi khaw mawng lama awm a niin thlan dang te kianga awm loin anmahni (Sakhuma te chhungkua) ramah an lo phum a, Pu Lianhmingthanga hian uluk takin a enkawl a, gate hmasa ber pawnlamah chuan zuk leh hmuam dahna an lo siam a, hungchhung lamah chuan zuk leh hmuam tih phal a ni lo a ni. Thlan pan tur hian gate alo awm leh a, chutah phei chuan pheikhawk bun remtih loh leh a ni a, a kalkawng 70fts vel zet te chu uluk taka puan tha chi a phah vek a niin a thlan chhung pawh uluk taka vawn thianghlim a ni bawk a ni. Keini tan chuan mit leh beng a tlai hle mai a, thlan hi In sak hnan a niin a sei zawng 32fts vel leh a zau zawng 24 fts vel a ni a, a kiang velah hian tawngtaina hmun atan In te 20 vel siam a ni bawk. Gate hmasa zawk chhung chiahah hian JOSEPHA BUHZEM Building, a bang neiloa sak a awm a, he hmunah hian thusawi ngaihthlak thin a ni. Keini pawh chu kan thukhawm a, a thente chu chhuatah kan thu bawk a, Pu Lianhmingthanga hian Projector hmangin Zawlnei Saikhuma chanchin bakah a hnena Pathianthu thlengte ngaihnawm takin min hrilh a, mit leh beng a tlai hle. Kan ban meuh chuan zan dar 10 kan thleng a, khawvawt tak hnuaiah haw chho lehin a tu-amah chuan mut mai kan la tum chuang lo a, zanlai thlengin kan inkawm khawm a, Zawlnei Saikhuma hnena Pathianthu thlengte chu kan sawi chhunzawm a, titi a nuam hle a ni. Zoram Thar thlen hlan nghakhlel takin kan sawi hlawm a, chumi hunah chuan tumah rengin hotute tlawn a ngai tawh lo ang a, ram rawngbawlna hmaikawra hmang kan awm tawh hek dawn si lo. Dec. 3, 2020 tuk chuan S. Vanlaiphaiah chuan Ni a rawn chhuak tha hle mai a, kan thlenna Lodge tual vel chu phul vek a nih vangin a nuam hle a ni. Fai ser sawrin kan inbual a, zing nilum chu hnungpuak pahin tualah chuan kan titi a, nizan titi bawk kha chhunzawm lehin dar 8 kan thleng a, kan khatliam hlawm hle. Saikhuma Thlan lamah kal lehin vawiina kal kan tum na Saisihchhuah lam chanchin kan ngaithla ho leh a, Rev. Darawia’n ‘Saisihchhuah kam vel zawng zawng chu alo kawlh vek mai a, Bomb leh silaia an kah vang a lo ni a. Mi ruang leh thisen chu alo awm put mai a’ a tihna hmun kha a nih vangin rilruah eng eng emaw a awm lo thei lo bawk a ni. Hetiang deuh bawk hian Rev. Darawia hian kum 1959 May 15 ah chuan ‘Sangauah hian Jeep kawng an lai ang, supply centre pawh a awm bawk ang. Sangau atangin Saisihchhuah chu kawngin a chhung ang a, hemi rual hian Hakka atangin an rawn thlen ve ang. Tichuan, hei hi hre rawh u, Sangau leh Saisihchhuah-ah sipai an lo awm chuan – Niin chhiar la, ni tam i chhiar hman tawh lo ang, indo a ni nghal ang – Aw Zoram, i Pathian tawk turin inpeih rawh tih thu chu a hnenah a rawn thleng leh a. A hnena thu rawn thleng ang hian Sangau-ah hian motor kawng chu lo thlengin supply centre pawh chu alo awm a. Saisihchhuah kawng pawh kum 2010 ah laih chhuah a niin, 2011 ah Mizoram Home Minister ngei pawhin Sangauah a hawng ta a. Hei bakah hian Hakka atang pawhin kawng chu Saisihchhuah thlengin an rawn lai bawkin 2012 April 15 (Sunday) chuan Myanmar Prime Minister in Thlantlang-ah a hawng ve leh a ni. Saisihchhuah hi a hmunhma a nuam hle a, hmar lam hawia Chhimtuipui (Kalodyne) luang chu Champhai lam atanga chhim lam hawia Tiau lui rawn luangthlain a finna lai a ni bawk a, a lui kam pawh a zau tha hle a ni. He lui pahnih infinna hi tunhma lamah chuan a kiang hnaia amite chuan an thlir thin a, an hmuhnawm ti chu hawn nachang an hre lo hi nupa tuak sarih lai an inthen phah e an ti nghe nghe. Darkar khat emaw lai kan awm hnu chuan kan haw chho leh a, Sangau Lodge ah chaw kan ei a, muangchang loin S. Vanlaiphai lamah tlan lehnghalin Hnahthial ah kan thian thenkhatte chu riakin keini erawh chuan Lunglei lam kan pan thung a, tluang takin zan dar 10;20pm velah Lunglei kan thleng a. Kan zawlneite’n an lo hrilhlawk hi a then chu alo thleng tawh a, la thleng zel turah ngai bawk ila, zoram hian kan hmabakah thil ropui tak kan la hmachhawn ngei dawn nitein a rinawm.