THIS IS MIZORAM – XI

Mahmuaka Chhakchhuak Dec. 28, 2020 Ram hruaitu an ni a, politician an nih vanga dawt sawi kher tura ngaihna kan nei hi kum rei tawh tak atanga kan chhawm zel nia hriat a ni a, vawiin thlengin kan politician thenkhatte lah chuan an la ching chhunzawm lehzel nghe nghe te hi thil tha lo tak a ni. An mipui tan ngei pawh thil vanduaithlak tak a ni a, opposition lam tan tawngna tur ti tamtu a nih mai bakah an hnungzuitu tan pawh hmai a uang thei ngai lo a nih hi. Nimahsela anni berin sim an tum chuang hauh si lo a, vawiin thlengin ram mipuite tana hnemhnanna awm hauh lo tur thil anla buaipui zel bawk si a. Nuaih thum te hi inthlan hmaa ban phar dar dar chunga kan hotupain a sawi a niin video clip tawite pawh hmuhtheih turin kan la kawl fur hlawm nghe nghe ang a, hengte hi khawilai hmun hmunah emaw te chuan sem tan tawh sela emaw Aizawl khawpui chhunga Traffic jam awm lohna atana a ban phunna lai tur an enna hmunahte hian ban pakhat tal emaw te hi phun ding tawh sela chuan heti takin mipuite hi kan phunchiar lo deuh lawng maw le? Mipui lam zawkte pawh hi kan phunchiar ve hrim hrim bawk a ni maithei a, lawmna tur reng hi kan nei lo em ni tih turin kawng hrang hrangah kan phun nasa em em zel a, heti chuan sorkar thlakin tute pawh lo sorkar ta pawh nisela kan lung a awih chuang awm lo e. System fuh tawh lo laklawh hi thil buaithlak tak niin alang bawk a, engtik atang chiahin nge heti taka Party sorkar kan neih hi a hriat loh nain vawiin thlenga mipui sorkar niloa Party sorkar kan la hrawn zel hi thil pawi tak a ni. India ram chhung State changkang zawk ahte chuan sorkarna siamtu Political party-in ruahmanna an siam a, Sorkar Department lamin an thawk zawk a nih laiin keini Zoramah hi chuan Department lamin ruahmanna an siam a Political Party zawkin hna kan thawk tlat mai leh system ngheta kan neih tawh a ni bawk si te hi thil pawi tak a ni awm e. Sorkar hna lak leh mipui tana hamthatna awm tur ang thil chi hrang hrangah pawh political party recommend-na lehkha thil tel a ngai ta thin te hi kum sawm tam kal tawh atanga kan lo chin than a ni tlat bawk si a, ram thanmawhbawk lian tak a ni thei awm e. Kan chim chin ala sang lo, kan phak tawk lah a sang lo em ni tih turin ram mipuite tana pawl ding inti meuhte pawhin sum leh pai khawn kan uar phian bawk a, sum hmanna tura an sawi lah chu kum hnih lai emaw liam hnuah pawh hriattur ala awm bawk si lo te hi cheng sing chuang thawhtu tan chuan a thanat thlak duh ngawtin a rinawm. Pawl hminga midang hnena tanpuina hlan lahin social media lama thehdarh hmasa bertu zawkah keimahni chu kan han tang leh ta zel bawk te hi a fuh ber chiah lo deuhin a hriat a. Ram tana thawk chak ber leh zuan zang ber anga lan tum vanga social media lama vawrhdarh nghal zel tura sum leh pai senga mi rawih te phei hi chu zahthlak tak a ni. Hetiang chingte lah hian an zah loh ang bawkin fiam an dawl zek duh lehnghal a, inthlahrung hauh loin an la nui huau huau fo bawk a. Chungte nen chuan Biak In pakhatah kan la lawi tlang lehzel bawk te hi a lehlam kawnga ngaihtuah chuan thil nuam ve ang reng tak a ni awm e. Ram leh hnam tana ro tling leh chhinchhiah tlak thil tha tih tum lem loa a phawvuaka buai pawl hi engtiklai pawh hian hlui hnih/ thum daih tawk tur vel awm reng bawk ang kan ni te hi hnam tlemte zingah chuan insemdarh nasa pawl tak kan nihna kawng khat chu a ni hial awm e. Chung zinga a kalna zual phei chuan khaw eng hmu lek loin Pathianni tuka Vawksa hmehna man tur thawhchhuah tumin thahnemngai takin social media an vil chawt bawk a, an tawngkam te lah chu Thlarau nun chawmna lam ni hawt lo leh Pulpit tlang atanga sawi ngam loh tur chi phawhraw pui pui a nih bawk vangte chuan chhia leh tha pawh la thliarhrang thiam chiah lo kum naupang zawkte’n social media an luh ve changin an hmu lo thei bawk thin si lo a, anni tan chuan politics rimnam reng reng chu tenawm leh bawlhhlawh tak tak hlir awmna hmun emaw tia ngaih mai pawh thil awl tak tur a ni. An demawm hauh loh a, an thiamawm ngawih ngawih zawk awm e. Minister Office tuala nupui fanau chawm lai chhungkaw pa engemawzatin ni leng lenga ram leh hnam tana thil pawimawh leh tha tak puakchhuah tur neih chuang lem loa mahni sahmim hnawhpuarna tur Contract hna beisei a hun kan hmang fo thinte hi nitina an chevel hmutu tan chuan ngaihsan an har ngawtin a rinawm. Nimahsela anni chu biak chhiat a ngamawm bawk si loh a, rem leh rem loa chibai paha tawngkam ngaihnobei taka fak der an la ngai tho si te hi kan chin dawk lak zingah chuan thil tenawm tak zingami a ni awm e. Political party-a inhmang kan nih phei chuan mipui entawn tlaka hmahruaitu kan nih zawk a pawimawha a that tehlul nen hian chulam hawi chuan ke pen kan tum hauh si lo hi thil buaithlak tak a ni. Kan Party-in sorkarna kan chang tih vanga sorkar Office-a inluling tak Party hruaitu kan awm thin phei hi chu a kristian lo a, ringlo mite zinga tihawm tawk tak zawk a ni bawk. A hnathawh a tha lo e, mit a tlung lo e tih vang pawh ni chuang loa sorkar hnathawkte transfer tur ang zawnga Political party atanga vauna han awm thin te phei hi chu a zahthlak ngawih ngawih zawk a, sim vang vang chi a ni. Ram leh hnam hmangaih kan intihna hian mi tha tan lungmuanna thlen sela mi tha lote erawh kimki phah zawk thin sela he ram hian Zoram Khawvar kan hnaih ngei ang le.