AN SAWI HMANGAIHNA HI

Mahmuaka Chhakchhuak 

Feb. 2, 2021 

 

"Tawploa hmangaih leh mahni inpumpek hmangaihna hi a inang loa. Tawploa hmangaihna chuan nungchang ṭha leh ṭha lo a thliarhran thiam a phut mai bakah dawhtheihna sawi hleihtheih loh khawpin a nghak peih a. Mahni inphalna chuan an nungchang mawi lo leh bawlhhlawh zawng zawng pawh tawrh theihna rilru min pe thung."   

Hmangaihna hi ramhuai, mei, vanram leh hremhmun, lawmnate natnate, leh inchhirnate chenna hmun a ni – Richard Barnfield 

Hmangaihna an tih teh fo ṭhin hi kan Pathian ngei pawh hian alo thupui ngang mai a, Hmangaihna chauh lo chu tumah engmah ba suh u te a ti hial a nih kha. Hei mai bakah hian Hmangaihnain a dawhthei a, ngil a nei bawk thin; hmangaihnain a itsik lo a, hmangaihna a infak lo a, a uang lo a, a che mawi lo lo a, mahni hma a sial lo a, a thin ur duh lo a, sual lam a ngaihtuah lo a, fel lohnaah a lawm lo a, thutak erawh chu a lawmpui thin a; engkim a tuar hram hram a, engkim a ring a, engkim a beisei a, engkim a tuar chhuak ṭhin tiin kan Pathianthu hian alo sawi hial a. 

Hnampuite reng pawh khuan Hmangaihna hi anlo tuipuiin keini ai hian a hrilhfiahna lam pawh an lo nei tha daih zawk mai. Nula leh tlangval kara hmangaihna kan tih ringawt pawh hi hetiang hian an thenhrang a: - 

 TRUE ROMANTIC LOVE: Hmangaihna thianghlim ber a ni a, nula leh tlangval inngaihzawnnaah chuan a thianghlim ber a ni. Thihna, natna leh vanduaina te mai bakah pawnlam thil engmahin a tibuai thei ngai lo a, nghet takin mi pahnihte inkarah inhmangaihna leh inpumkhatna a tuh a, midang hriatpui lohin nun an hmang dun thin. Sualah an tlulut ngai hek lo a, midang mi tikham zawngin an awm ngai hek lo. Lungawih lohna khawvelah hian an lungawih em em a, an pahnih inkarah thatna a parchhuak thin. 

 PLATONIC LOVE: Hmangaihna thianghlim ve tho a ni nain harsatna leh hrisellohna leh thildang eng emaw avangin a tawp mai thei thin. Hmangaihna ziktluak zo lo, thenkhatte tan phei chuan beidawnna thlentu hial a ni thei a, lungngaihna a thlen theiin thenkhatte chuan an tuar thei em em a ni. 

 SPIRITUAL LOVE: He hmangaihna ve thung hi chu pawnlang hmangaihna kan tih ang chi hi a ni a, hmelṭhatna emaw ṭawngkam no nalh vang te emaw avanga hmangaihna lo piang chhuak ṭhin hi a ni. Hetiang hmangaihna hi a nghet lo em em a, ṭhalai tam takin an chhiatpui mai bakah sex-ah an tlu lut nge nge ṭhin a, sawnpai lo chhuahna bul ti hial te pawhin an sawi ṭhin. Mihring nun pawnlannaah min hruai a, nun tak a tibo a, lemchang nunah min hruai thin. Chung mai bakah chuan chhungkaw economics a ti buai a, neih bak baka inchei duhnaah mihring thinlung a kaihruai thin a, chhungkaw tlakranna a thlen hial ṭhin. Rinawmna a hnawt ṭiau , a tawpah lungngaihna leh inchhirna rah a chhuah a, midang tan an lakah rah tha lawh tur a awm ngai lo a, beiawnna ruamah mi a hruai lut ṭhin. 

PHYSICAL LOVE: He hmangaihna e thung hi chu dinhmun leh awmtheihna avanga hmangaihna lo piang an chi hi a ni. Nungchang lam a ngaihtuah lo a, hmel lam a thlir hek lo. Anmahni lah chu an duhtui em em a, an phu tawk nia langte an iai zelin nula senior emaw tlangval senior tak emaw an lo ni thuai thin. Hetiang hmangaihna hi a nghet lo a, fa nei duah tawh hnuah pawh inthen an awlsam bik. Rualawt reng rengin an awm a, an nun a tuihal a, mi khawngaihthlakawm tak an ni mai thin. Chantawka lungawih an thiam ngai lo a, thenawm khawveng tan min hnawksak nihna a thlen awl em em bawk ṭhin a ni. 

 Conservative Pachal John Scott chuan ‘Pathian anpuia siam kan nihna chu mipa leh hmeichhe inkara inhmangaihna hi a ni tiin alo sawi mauh bawk a, hmangaihna hi alo pawimawh ngang a ni ang e. Nang leh kei ngei pawh hian hmangaihna hi haider tum eltiang mah ila emaw hnualsuat tum hle pawh ni ila Hmangaihna chuan dawhthei takin min nghak tang tang peih tlat thung a, kan Pathianthuin ‘…….engkim a tuar hram hram a, engkim a tuar chhuak thin’ a lo tih hial tawh khi. Hei vang hian alawm Mi awmkhauh ber bera kan ngaih Napoleon te hial pawhin an lo hneh loh a, a laka an pau khauh theih miah loh ni. Josephine kha alo zei ve hrim hrim bawk a, Mel sang tam tak karah pawh awm mahsela nikhata vawikhat tal love letter a thawnloh chuan kan pasalṭha kha a awm thei lo a nih hial kha. 

Khatiang bawk khan alawm Nehru ngei pawhin kutziak ngata Edwinna Mountbatten hnenah khan Kgs. 9 lai tura rit hiala tam love letter alo thawn hman ni. Hmangaihna chuan khua a hmu lo tihte ngei pawh hi dawt mai mai a ni a, a duhna hmunah chuan khua alo hmuh tir theih nasa mah mah zawk. Zan khawthim leh hunawl remchang awm hlekah pawh hian hmangaihna chuan mi pahnih tan rem leh rem loin hun alo siam mai thin a. Engtik laiin nge anni pahnih hi an lo inhmuh leh hman tih tur hian Hmangaihna hrui – hmuhtheih siloh chuan alo pawt hnai leh fo thin a. Hmangaihna thahruai chakzia te hi tunge maw sawifiah thei ang ni? Zahtheihlohna te hi alo ngah nangiang mai a, dawtsawi phut zuk kan tih te hi a thiam riau bawk lehnghal a. Heng vang hi alawm Hmangaihnain a bual-at tawh mihring te hi chuan an thiltih tawhna vek vekah hi chuan an lak tlak viau zel a ni. Khurbing vawi thum kalchhuak tawhte ngat phei hi chu zan hnih khat zaikhawm tlaivarna hmuna khuang vaw tur ngat hi chuan an laktlak fu a sin. Khuang tlir lah an hnehsawh nasa, tu mihlim tan pawha lam rem theih vek mai tur hian an tlir zat zat a, mihring hriat thiam phak tawh loh hla dangah pawh bahlah miah loin khuang an tlir zei hle zel bawk a. Hrilhlawk leh sawi lawk ngai miah lo hian hmel lama chuan bik tur nei lo tak takte ngei pawh hi nu thenkhatte hi chuan an hnaih leh nge nge thin a nih hi. Hmangaihna zet zawng sawi fiah tum nasat poh leh kan sawi fiah zawh loh zia kan inhre mai mai a lo nih hi, duh tawk mai zawk teh ang.