KA MITTUI A TLA HIAL A

Mahmuaka Chhakchhuak Feb. 16, 2021 Kan mizo society hi a chhe vek tawh, kan kristianna ngei pawh hi engmah alo ni tawh lo, hmaikawr-ah chauh kristianna kan hmang a, belhchian tlak tumah reng kan awm lo tihtein sawi sawi thin mah ila, chung mi bawlhhlawh zingah chuan mi fel leh fak tlak hi an lo awm leh zauh thin. Chung zingah chuan lansarh leh chawimawi beisei hauh lo tur chu Kohhran Thalai - Chaltlang Lily veng SAY te hi an ni ang. An chanchin erawh sawi thui tur ka hre hauh lo mai a, Chaltlang SAY lam hmelhriat ka neih mai loh avangin Salvation zinga ka ngamtlak em em U Partei of Remphamly number ka neih chu ka han dial ngial pawhin a tlang thei si lo a, inthlahrung chung chungin Commissioner (Pu) Kiamlova ka be ta ngawt mai a, a ni pawh chuan chiang takin alo hre bik si lo. Chaltlang Lily veng SAY te hian tun Valentine’s Day ni ah khan Aizawl khawpui chhunga nitina kutdawh thinte chu hruai khawmin Hotel Floria-ah chaw an ei tir niin social mediaah ka lo hmu a, kutdawhte hi engzatnge an nih a, engtiang fakauin nge SAY te hi an luanchhuah tihte chu sawi tur engmah ka hre lo nain he an thiltih hi sawichhuah chaknain nasa takin min nawr tlat bawk si a. Amaherawhchu hetiang hian anni chauh lo pawhin luanchhuahna hi an nei maithei a, kan lo sawi hmaih a nih pawhin min lo hrethiam hram turin ka ngen nghal duh bawk a che u. Valentine’s day kan hman dan sawi ta theuh ila a inang lo hlawm viau maithei a, Facebook Group pakhata tute emawin live-a an hun hmanna an rawn tarchhuak erawh kha chu thlirtu an thahnem hle mai nain an chhuanawm lutuk hran loh a, sim vang vang chi zawk awm tak a ni awm e. Chanchinthar lamah kan hmuh dan chuan he Valentine’s Day pual hian District hrang hrangah Association for Volumtary Blood Donation (AVBD), Mizoram State AIDS Control Society (MSACS) leh Blood Bank tnakgawpte chuan Valentine’s Day pual hian thisen pek runpui neiin Blood Donation Camp an buatsaih a, a vaiin thisen Unit 466 an pe niin kan lo hmu a. Hetianga Valentine’s Day nia thisen pek hi kum 2010 atang khan lo buatsaih tawh niin avaiin Thisen Unit 7,342 an lo pe tawh nghe nghe. Thisen petute hi an fakawm ka ti thlawt a, rah tha tak pawh a chhuah ngei a beiseiawm bawk a ni. Hetianga midang tana luanchhuahna hi thil intihhmuh zel chi tak a ni a, pawl hrang hrang, kohhran hrang hrang leh NGO te, Organization hrang hrangte pawh hian ching chho zel ila a duhawm ngawt mai. Chutianga kan thalai thenkhatte’n Thisen pekna hun atana an lo hman lai chuan Chaltlang Lily veng SAY te ngei pawh chuan Aizawl khawpui chhunga kawngsira Kutdawh thu thinte tan an lo luangchhuakin Hotel Floria-ah chaw an ei tir a, engemaw zawngin lo ngai lo ula Hotel Floria te hi chu Aizawl khawpuia kan Hotel changkang pawl tak a ni a, anni Kutdawhte tan ngat phei hi chuan luh ngam mai mai chi pawh a ni kher lo ang. Nimahsela Chaltlang Lily veng SAY te hian an inthlahrun lohna turin an kikawi thiam ngei te pawh ka han beisei nghal bawk a, puar leh tlai taka an ei theuh ka beiseipui a ni. Hetianga ei leh in buatsaihna atan hian cheng fe a kal ngei ka ring bawk a, a ruala ei phei chuan cheng Sing tam tak a kal ral maiin ka ring a. Chutianga kohhran thalai an han luangchhuak hi chhuanawm ka ti takzet a ni. Kan Mizo society hi zep rual loh chuan a chhe tawh a tih theih ngei ang a, duhamna leh hlemhletnain kan khat tawh a, rinawm leh leh dikna te hi kan hmui chauhin kan sawi tawh em ni aw a tih theih bawk ang. Nimahsela chutiang chuan sawi mah ila chung mi bawlhhlawh tak tak karah hian mi tha leh chhuanawm tak tak hi an lo awm ru reng tho thin avangin anni vang chauh chuan za ah za tia sawi a rem mai lohna chhan pawh a ni. Tirhkoh Paula khan ‘kan zain kan bawlhhlawh vek a, tumah mi fel tak reng an awm lo’ tia a sawi ang em chuan kan sawi ve mai a rem chiah lo awm e. Anni mi fel tlemte vang hian humhimin kan la awm chauh a ni te ti zawk ila a dik theihna a awm maithei zawk a. Lalpa chu dawhtheihnaa khat a nih tlat vangin kan sim hun min nghak a nihte ring zawk ila Pathianthu a kalh bawk awm lo e. Midang chunga that chhuah hi thil harsa tak a ni a, mi tam takte hi chuan mahni dinhmun hi harsa em em te hian kan han hre zawk thin avangin midang tana luanchhuah hi kan harsat phah tlat thin. Nimahsela eng dinhmunah pawh hian ding mah ila keinia hausa zawk leh rethei zawk hi anlo la awm zel tho mai avangin mahni dinhmuna lungawih zir chunga midang tana luanchhuahna thinlung kan neih hi chunglam malsawm duh zawng tak pawh a nih ngei a rinawm a. Tuna kan sawi tak ber Chaltlang Lily Veng SAY te luanchhuahna ang chi hi mi tam takte tana thil harsa leh tih mai mai theih loh a nih laiin anni hi chuan an thei tlat si hi an fakawmna lai chu a ni. Kan hria a, CoviD hripuiin min chimbuai a, thenkhatte tana eizawnna a bahlah phah a, chhungkaw tam takin harsatna kan tawh lai zual lai (April – July) vel khan mimal leh pawl thenkhatte chuan ei leh in tur an sem chhuak a. Fakawm tak tak leh chhuanawm tam tak an awm laiin mahni hnathawkte thlabi hlawh pawh pe thei lo chunga langsar taka midang va tanpui tak daihte kha chu chunglam hian mal a sawm kher ang em aw te ka ti a. Kan mak ngawtin ka hria. Hmangaihna kan tih pawh hi an laka beisei let nei miah loa an hnena luanchhuah duhna thinlung kan neihna zawk hi a ni a, chutiang chiah chuan Chaltlang Lily veng SAY te ngei pawh hian beisei leh phut let nei miah loin kutdawhte chunga thatna an lantira an luangchhuak hi an fakawm thlawt ka ti a, hetianga kan society chhe tak kara fak tlak mi kan la awm hi lawmawm ka ti a, kan la bawlhhlawh vek lo tih ka hriat avangin ka lawm a, lawmna avangin ka mittui a tla hial a.