KAN DRIVER TETE-A

Mahmuaka Chhakchhuak May 30, 2020 Kum thum vel zet hnua mahni khua thleng leh tura thinlung leh rilru a han inpeih meuh chuan a boruak a dang hle mai. Thawmhnaw lam inbuatsaih a phurawm a, helhhlawlh vang nge zan mut pawh zan dang a ang thei tawh meuh lo. Mahniin kalna tur motor kan neih ve miau siloh avangin Khawzawl leh Aizawl inkara motor tlan (Sumo) hmanga kal turin kan inbuatsaih a, Driver number midang dil chawpin chumi hmang chuan awmhmun atangin seat ka hauh a, kawmthlanga lo chang mai turin kan inbe ta bawk a nih kha. Tunlai boruak (Hripui leng) vangin motor tlan a mumal thei meuh lo a, nikhatah motor 3 chauh emaw an tlan avangin a tlan chhun te pawh an riak loin langin an kal a, chawlh khawmuanna hun pawh an nei ngai meuh lo bawk a ni. Chawhnu dar 2 velah chhuah tumin kawmthlang, motor kawngpui kamah chuan kan lo chang a, darkar chanve vel kan chan hnu chuan a rawn thleng ta a, nimahsela motor chungah bungrua a rem sang hle bakah chuan a seat hnung lamah chuan engemawzat a rem bawk avangin mihring aia bungraw phur thin motor a ang zawk mah a. Passenger 6 chauh kan awm dawn avangin bungrua a phur duham a nih dawn hi ka ti rilru mai a, miin an thawn uar ve deuh bawkah ka ngai mai. Kan Driver hi a hming chu ‘Tete-a’ a ni a, a hmel ka hmuh hma hian a hming ka hre tawhin ka lo be tawh bawk a, Tete-a tih hmingpu a nih avang hian ka rilru chuan hang lam leh sam kir lam a nih hi ka ring lo viau nain kan Driver erawh hi chu a ni tlat thung si. Ngaihnobei leh duhawm lam a nih loh vek pawhin hmela suai nei lam ni tura ka lo rinna zawng zawng pawh chu a hmel ka hmuh meuh chuan dawt vek a lo ni bawk a. Fresh tak a nih ringa kuhva pawh ei lo emaw ei sen suah lam a nih loh ka lo rinna zawng zawng pawh chu engmah lo maiah a chantir vek bawk a. Tete-a a nih chuan western music ngaina a, tarmit dum bun chunga lukhum hmathlawk pawh hnung zawng ngata khum tura ka lo suangtuahna zawng zawng pawh a hmel ka hmuh chuan ‘thu lawi lo’ ang maiin sawi zahthlak khawp a ni ta daih zawk si. Tarmit dum a bun ve tho nain a ni tarmit dum bun hi chuan zaithiam leh western lam ang loin kawngsira pawisa thlak bawm nena mitdel thu thin a ang daih zawk. Tuiah tla hlum pawh nisela ‘a kang hlum a nih hi’ tih tur a ni daih zawk chuan first impression ah chuan ka biak chak loh phah vek nghe nghe a. Nimahsela amah zawk chuan min lo hriat miau avangin leh ka hminga min lo koh theih mai nghal avang chuan ka tlangnel ru ang reng lawi bawk a. Bawngkawn lamah kalin Zemabawk daiah tawngtaina kan nei leh a, Aizawl khawpui kan chhuahsan fel meuh chuan tlai lam dar 3 a ri der mai. Tluang takin kan tlan a, kan tlan thui tawlh tawlh a kan Driver fel zia ka hre telh telh ni berin ka inhria. Sumo Driver te hi an fel viau hlawma ka hriat rualin kan Driver erawh midang aia fel bikna a nei hi ka sawi chak leh sawi nuam ka tih lai ber chu a ni a, keimah ngei pawhin amahah zir tur neiin ka inhria a, ka ngainat zui phah hial bawk a ni. Hetiang hian a fakawmna bik nia ka hriat point hnih lekin han sawi ila: ZAIDAMNA LEH DAWHTHEIHNA: Mihring phur motor khalh tute hian zaidamna leh dawhtheihna hi an tlakchham fo laiin Tete-a hi chuan tlakchham lai a nei lo ni berin ka hria. A tir lama sawi tawh angin bungrua a phur tama, chung bungrua te chu a hriat loh laia tute’n emaw an lo hlan leh dah tawp an ni nghe nghe. Chung bungraw thawntute chuan khawzawl thlen dawn hnaih lamah an rawn phone ta ale, phone a ri zing malh malh hle mai a, ‘khawi lai nge in rawn thlen tawh’ tih chu an rawn sawi tam ber a ni. Minute tinin an rawn bia ti ila kan sawi uar deuh hrat pawh a ni ang a, an rawn be zing malh malh hle mai a, chuti chung chuan vawi 25 zet miss called ala awm hman tho zuk nia. Tete-a chuan a theih ang angin call zawng zawng chu chhan vek a tum a, motor khalh a ngai bawk si a, motor khalh chung chuan tha taka chhang zelin zaidam leh dawhthei takin a chhang zel a ni. Kan zinga hmeichhe chuang ve te phei chuan ‘motor i khalh bawk si a, phone call chu la lo rih ve mai la’ an ti hial chung pawh chuan chutianga phone call zingah pawh chuan bahlah hauh loa zaidam leh dawhthei taka motor a khalh pah thei tho te chu a fakawm thlawt a ni. TLAWMNGAIHNA: Passenger phur motor khalh tute hian mipui, mi chi hrang hrang leh ze hrang hrang nei te nena an inhnim hnaih reng avangin zaidamna leh dawhtheihna hi an lo tlachham a nih pawhin an demawm hauh loh pawh ti ila a dikna chen a awm thei ang. Kei erawh chuan ka tlin lo tih ka chiang. Chubaka pawimawh leh em em chu Tlawmngaihna hi a ni. Tete-a hi kum 25 rual vel a ni a, chhungkaw pangngai tak atanga seilian a nih ngei pawh ka ring. Ka fak uchuak ni hauh lo sela passenger te tan induhna leh ngeiawmna tur ka hmuin ka hre hauh lo. Amah ang bawka mihring phur driver (sumo driver dangte) a ngaihsakin a ngaihven reng bawk te chu an dan ve reng alawm inti a nih chuan ka hre lo ni mai sela, nimahsela Tete-a ang vek an ni vek lo ang tih erawh ka sawi hram duh. Zemabawk dai ah a thiante min nghahpui a, kawng laka inhlat deuha kan tlanin a ngaichang reng bawk a, ruahsur lai pawha an dinin a ding ve zat zat a, a thiante motor ke a chhia a nihin tanpuitu hmasaber a ni bawk thin. Heng bak pawh hi fakna tur ala awm ngei ang tih a rin theih bawk a. Hetia ka han sawichhuahna chhan ber zawk chu mizoin, a bikin thalaite hian ‘Tlawmngaihna’ hi tunlai hunah kan nei tawh meuh lo nia ka hriat laiin a ni nunah hi chuan hmuh theiha a la nunpui avang hian ka sawi lo thei lo a ni. Heng baka a mi phurhte tana thlamuanawm taka motor a khalh te leh passenger te tana tawngkam hawihhawm tak tak a hmang thin te kha ka hriatrengna hian a theihnghilh mai mai in ka ring lo. Khaw kar hla tak takah Sumo hmangin ka kal zauh zauh thin a, midang te kha an sualin an tha lo e chu ka ti hauh lo nain Tete-a erawh hi chu midang hriata sawi chakawm tur hian a awm bik tlat si.