KAN INKHAWM THEI TA

Mahmuaka Chhakchhuak Feb. 8, 2021 CoviD hripui leng avangin Pathianni vawi 46 zet mai han inkhawm theih loh chu inkhawm mi tan chuan hrehawm tak tur a ni. Kan hripui leng hi palzam mai mai ngawt theih a ni si lo a, kan sa himna atana kan inven hram hram bakah kan bihruksan a ngai si a nih hi. Chutiang karah chuan thuneitute lam atangin Feb. 7, 2021 atanga chhun en lai chuan Inkhawm remtih thu kan hre ta a. Zai erawh chu remtih rih loh nisela Sunday School zirtirna pawh hmun khat atanga zirtirna pek ni bawk se tiin inkhawm theih zat turte pawh duan vek a ni bawk a, Pathian zarah hetia inkhawmna kan nei thei ta hi a lawmawm hle a ni. Pathian khawngaihna zarah hetiang hian hma kan sawn chho zel turah ngaiin boruak tha pangngai taka kohhran inkhawmna pawh kan neih chhoh theih mai beisei bawk ila a tha awm e. Chutia kan inkhawm chhoh theih tak ah chuan tiin hetiang hian duhthu ka lo sam a: KHAWTLANG NUN HI DANGLAM TAWH SE: Kan khawtlang nun pangngai, kristian ram kan nihna ang taka khawtlang nunphung nuam tak ni thin kha dinthar leh theih nise a duhawm hle a ni. Khawtlanga sualna chi hrang hrangte hian rem lam a pan theih ngeina turin kan Inkhawmna hian rah chhuah se, kan mizo society duhawm tak thin kha parchhuak leh ngei rawh se. Kristian kan nihna hian hmun pawimawh chang sela kan eizawnna theuhah rinawmna leh dikna nei chungin midang tana entawn tlak turin kan Inkhawmna hian rah tha chhuah mawlh rawh se. Kristian ram kan intihna hi tawngkamah emaw chauh a nih laiin a taka lantir hi kan nihna tur tak zawk a ni a, chu chuan mihring nunah rinngamna pawh a pe ngei bawk ang. Dik lo taka sum leh pai lakluh kan duhna te, mi kuta sahrang hmuh len biknate hi awm tawh lo sela, chantawka lungawihna thinlung nei chungin thahnemngai takin kan hna theuh thawk ta zawk ila, chu chuan he ram hi ram nuam tak ah a siam ngei ang. Drugs addict aia a hming maia Inkhawm addict kan tam zawkte, Lalpa mitmei aia thawhpuite mitmei kan veng zawkte, Pathian thlarau hruaia awm aia mahni nuam tih zawnga awm kan tam zawknaahte hian kan kristianna hian danglamna thlen mawlh se, kan Halellui-na hi dawngdahna nilo thawhrimnain zui mawlh bawk rawh se. MIMAL NUN THEUHAH LANGCHHUAK SE: Hetia kan han inkhawm leh theih takah chuan Biakin chhunga kan thlalakte chu Social media lamah midang hmuh theih ngei turin kan tar chhuak chuai chuai a, hmuhnawm a nih rualin a lawmawm hrim hrim bawk. Chutih rual erawh chuan hetianga thlalakah chiah hian kan duhtawk mai ang tih erawh chu hlauhawm tak a ni. Pathian kan biakna leh chibai kan bukna hmun Biakin hi a zahawm em em a, mi mangang leh beidawngte tana tlukluhna hmun leh hahchawlhna hmun ber a ni. Hetia social media lama kan vawrhdarh ang chiah hian kan nunpuina lamah pawh midang hmuh theih turin langchhuak sela a duhawm viau bawk. Mimal kan danglam chuan loh a, kan nitin khawsakna hmuna inkhawmmi kan nihna kan lantir leh chuan si loh chuan tu tawngkam emaw ang takin Pathian kan chhaihkawlhna mai mai a ni zawk thei. Davida khan ‘I Biakin hunchhunga nikhat awm chu hmundanga ni sangkhat awm aiin a tha zawk si a’ a tihna chhan hi Biakin hungchhungah chuan sualna leh hlemhletnate, elrelnate, itsiknate leh sualna chi hrang hrang a awm loh avanga tu tan pawha hmun nuam leh hahdam a nih bik vang a ni a. Chuvangin Biakin hi hmun thianghlim a nih ang ngeia chu hmuna kalte chuan kan nitin hun hmannaah thianghlim taka nun kan hman hi kan bat lian tak a ni ngei ang. Nun danglam a, nun thlakthleng hi Piangthar awmdan tur a nih laiin thlalakpui nan emaw chauha Biakin hi kan hmang a nih chuan kan inkhawmna chuan awmzia a awm lo tihna a ni ang a, hlawkna a awm lo tihna a ni ang. HE RAM HIAN NANG LEH KEI HI MIN MAMAWH: He kan ram neihchhun Mizoram hi sualna chi hrang hrangin a bawm mai bakah natna chi hrang hrangin a bawhkhat luk bawk a, dam chhuak zo loin natna khirh tak a tawk mek a ni. Kan nu leh pa ber Sorkar hruaituteah mipuiin rinna nghah ngam har kan ti a, hruaitute lam lahin mipui min ring zo bawk chuang si lo. Ring lo mi, piantharna mamawh tih hriat ngawih ngawihte aimahin kan sual zawk emaw tih mai turin kristianna chu hmai kawr (mask) ah kan hmang a, lemchangin ei kan zawng a, lemchangin sum leh pai kan zawng a, lemchanna vangin kohhranah thleng thleng chanvo tha kan chang hial a nih tak ber hi. Nimahsela chutih laiin mi mangang leh beidawngte tan Pathian bak belh tur a awm chuang bawk si lo a, fianriala kan tawngtai mai bakah Biakin-a inkhawmte alo ngaiin, inkhawm loh chu ‘misual awmdan’ tih ngaihin kan ngai lek lek hial a ni bawk si a. Kan thinlung put dan a khawlo zo tawh a, hnamdang laka kan hmel lanna ber Tlawmngaihnate pawh chu kan bosal mek bawk a. Kan thalaite lam lahin kan pi leh pute hunlaia hnam nun zemawi chhawm zel tum loin a hautak thei ang berin hnam changkang zawkte tih dan an lo zir mek zel bawk a nih hi. Kan nulate lah chuan incheina changkang ber berin an inchei a, a tupawh mai hian hnam changkangte model nalh tak tak anga inchei an lo tum zel mai bawk bakah social media lama mizo tawng dik mang hlei loa hmang kan tam em em bawk te hi a vei awm ngawt mai. Kan tlangvalte pawh chuan lirthei hmanga chak tak taka tlan chu ropui riaua an lo hriat hlawm mai bakah changkang riaua an hriat avangin enghelh berah an nei bawk a. Nu leh pate ngei pawh chuan neih zawng zawng bakah puk chawpin an lirthei man tur kan tuak pui a ngai ta hial thin bawk a nih hi. Kan thinlung put dan a dik miau loh avangin mi rethei ber leh hausa ber thlengin Maurawkela Zawng khuang ang maia engkim vuak chhuah theihna hmun angah kan Sorkar hi kan ngai ta hial mai bawkin tupawh mai hian sorkar lakah beisei kan nei ta vek mai a. Neih tawka lungawih kan tum tlat loh avangin neih baka nun a ngai a, chu chuan dik lo taka sum leh pai neih duhna thinlung min neih tir phah a, chuvang chuan kohhrana kan nihna leh chanvo zahawm tak takte aiin kan mamawhna chuan min hneh fo ta thin zawk a nih hi. Rinawmna leh Diknate chu midang tan kan sawi a, keini aia dinhmun hniam zawkte laka beiseina kan neih len em em rualin kan chunga mite lakah erawh kan beisei ngam lem chuang lo thung te hi he ram chhiatna kawng khat chu a ni ngei ang le. Heng bakah hian thiltitheia awmte tan lah thiltihtheihna hmanga dikna rahbeh chu nuam zawk tlata hriatna neite kan la awm cheu bawk te hi hetia Pathian khawngaihna zara Inkhawmna kan neih leh theih takah chuan kan danglamna tura duhthu ka han sam hmasak duhnate chu a ni.