KAN RAM A DAM LO

Mahmuaka Chhakchhuak 

Jan. 25, 2021 

Pathianin kan chenna hmun tur atana min pek Zoram hian natna tam tak a tawk a, tihdam maitheih loh natna benvawn na tak a tuar mek a ni. Intensive Care Unit (ICU) a a damchhuak leh ang em tia thlaphang taka enkawl mek ang vel hi a ni ber mai. Pawnlam natna chi hrang hrang a neih mek bakah chhunglam natna chi hrang hrangin a tuam mek bawk a, a khawi zawk hi nge enkawl hmasak tur ni a, a khawi zawk hi nge a damlohna ber tih pawh hriatthiam hleihtheih a ni meuh lo a nih hi. Damdawi tam tak kan hmang tawh a, a dam thei chuang lo a, Gilead thinghnai damdawi a awm lawm mi le tiin kan van ruai ruai ta hial a nih hi. 

 A CHHUNGA CHENG MIPUITE NATNA: He ti taka mizo mipui te’n Cancer natna kan vei nasa ta mai hi ngaihtuah tham tak a ni. Google ah lutin ‘Cancer death in Mizoram’ tiin han search tawp mai la, chuta chuan 725 people die every year due to Cancer and three person are diagnosed every day in Mizoram tih i hmuh hmaksak ber ve ngei ka ring. Zoram chhung ngeia Cancer natna vanga kumtin mi 725 boral ziah hi mihring kan tam ve tawh bawk alawm tia ngaihthah ngawt chi a ni lo ang. India ram pum thlir pawhin Zoram hian a pahnihna kan hauh phak a, Thlatina Vellore, Mumbai, Kolkatta, Delhi, Guwahati leh Shillong khawpuitea Cancer vanga damlo kal hi engzat tak hi awm ang maw le? Kum 2019 – 2020 Sorkar kum chhunga Mizoram Sorkar Department hrang hrang 53 in Mizoram Sorkar sum bawm atanga Medical Reimbursement (M.R) an bill tur zah tarlan dan chuan Rs. 77,20,16,536 zet a ni. Hei hi 27th July, 2020 nia tarchhuah a niin sorkarin a approved zat a ni. Natna vang hian sum pawh a luangral hnem hle mai. 

 RILRU LAM DAM LO: Mahni thawhchhuahah lawmna kan nei tak tak thei lo a, thiante kuta sa hrang kan hmu lian tlat zel a, chu chuan hlet a chhuah zelin a tawpah chuan eiruk duhna hial kan lo neih phah ta a ni. Sorkar hnathawkin a eiruk kan sawi laiin keini pawh chuan kan theihna hmun hmunah eiruk kan lo tum ve mek bawk a. Thenawmte neih ang neih ve zel kan tumna hian chu eirukna kawngah chuan kal lo thei loin min siam phah te hian a hriat bawk a. Mahni neih tawka lungawih kan tum lo a, kohhrana inhmangte hlei hlei hian mawi leh nalh an hre lehnghal a, chu chuan kan Biakbuk ngei pawh fashion show- na hmun ang zia zangin a chhuah phah ta hial a nih hi. He natna hi tihreh mai theih a ni lo a, damdawi tha ber ber hmang pawha tih dam maitheih a nih pawh a rinawm loh. Chu natna hlauhawm tak chuan rilru lama beidawnna a hring nghal a, mahni inthah duh hial khawp a thlen phah thin a ni. Heti taka kan ram chhunga Depression sawi hluar a ni ta te hi a zung chu thuk tak a nih a rinawm. Chu natna chuan tumah a thliar lo lehnghal hi thil buaithlak tak a ni leh zel a, Kohhran upa leh rawngbawltu mai bakah ram hruaitu leh sorkar hnathawk lian tak tak atanga mi che ber thlengin a kai darh a, a kai tawhte lah hian an kai nghet em em mai zel bawk a. 

 POLITICS HRI CHHIA: Kum 1972-a Pu Ch. Chhunga Chief Minister atanga tun hun 2021 thleng hian Political Party hrang hrang Pali (4) laiin kan ram hi an lo kaihruai tawh a. Chung zingah chuan Indian National Congress Party chuan 5. 5. 1984 – 20. 8. 1986, 24. 1. 1989 – 3. 12. 1998, 10. 12. 2008 – 14. 12. 2018 leh Mizo National Front Party chuan 20. 2. 1987 – 7. 9. 1988, 4. 12. 1998 – 9. 12. 2008, 15. 12. 2018 – till date chhung lo hruai tawhtute chu vawiin thlenga Party lian pahnih an la ni. Pu Ch. Chhunga khan kum 5 leh ni 10 chhung Chief Minister a lo ni tawh bawk a, Brig. T. Sailo khan kum 5 leh thla 5 chhung Chief Minister alo ni tawh bawk. Vawiin thlenga kan la sawi ban theih loh chu Pu Ch. Chhunga leh Brig. T. Sailote pahnihin rorelna fawng an chelh hunchhung tawite kha vawiina kan hruaitute hian an phak lo tia kawng hrang hrangah entawn tur an lo nei ngah bik ang hiala kan sawi hi a ni. Engtik atang chiah khan nge kan ram hruaitute hian sulhnu chhui tlak loh tam tak an hnutchhiah a, mahni sahmim hnawhpuar hi an lo chin tak ni? Retheih huama ram hruai tuma mipuia inzuar vek an nih hlawm laiin kum nga chhung lek pawhin an thau kung kung mai chauh pawh ni loin In leh lo tha tak tak an nei ta zel a nih hi. A then chu an hausakna a pun phah a, chutih mek laiin a thente chuan eiruk thubuai an awrh nawlh nawlh phah bawk a nih hi. An hausakna pung ta hluai te hi chhui hleihtheih lohte an ni nawk hlawm bawk a, an thlabi hlawh lak zat kan hriatchian em em te ngei pawh hian lirthei changkang tak tak an neih thlak zut mai bawk te hi kan hruaitu mualliam tawhte chanchin sawi chuan kan sawi tlem deuh chuan a hriat a. Hei vang hian kum 30 lo liam chu a ni lo ang tih a rin theih mai awm e. Hmangaihna tela roreltu chu a ram mipuiin kan theihnghilh theih ngai loh rualin mipui sum leh pai hmanga inhaivur ching ram hruaitu pawh kan hrereng thin tho bawk. 

Heti taka hmasawnna kawng zawh tur a awm lai reng pawha ram hruaitu ber te’n hmasawnna kawng min zawhpui tak tak theilo te hi thangtharte hian kan la dem ngeiin a rinawm a, an sulhnu bawlhhlawh leh luak ti chhuak tak takte hi chunglama ruahtui leh thli tleh hian a ti reh hlan nghakhlel tak tak kan tam ta te hi thil lawmawm tak a nih rualin thil zahthlak tak a ni bawk si a! Tun hnaitea Champhai Zote ram chhunga AK-56 Rifle pathum man a han ni ringawt te, Champhai Tlangsama Meth (ruihhlo) mum 2,69,000 man a han ni bawk te Zophai lama harsatna awm rengte leh Saisihchhuah lam atanga dan lo anga kan ram lama vawkte rawn phur lut teuh teuh a an sawite hi tangruala kan vei tlan a va ngai em. Heng kan sawi bak pawh hi he ram hian natna chi hrang hrang a tuar ngeiin ala rinawm lehnghal a. He Ram hian a tuar chhuak zo hian kei ka ring meuh lo a ni.