PU RAMA THUSAWI HI

Mahmuaka Chhakchhuak Feb.22, 2021 Mizoram Chief Minister zahawm tak Pu Zoramthanga chuan tun AMC Inthlannaa MNF Councillor tharte lawmna hmun, Vanapa Hallah kum 2013 khan Electronic Voting Machine (EVM) chu tihdanglam a nih thu nitin chanchinbu Vanglaini chuan ni 21 leh 22 Feb, 2021 khan Editorial huangah a rawn tarlang a, he thil hi tlemin han sawizui ve ka duh a ni. Kum 2013 khan seat 40 kha mi 142 te’n chan theuh tumin an inchuh a, chutih laiin result a rawn chhuah chuan Pu Lalthanhawla erawh hmun hnihah tlingin MNF Party chuan seat 5 chiah an la a, Congress in hneh takin seat 34 an la a nih kha. Vote percentage lamah pawh Congress in 44.6% an hmuh laiin MNF chuan 28.7% chiah an hmu a. Chu chu MNF lam chuan Voting Machine EVM chu tihdanglam niin an ngai ta a, vawiin thlengin tihdanglam ah an la ngai a ni awm e. Hetiang a nih chuan vote thlakna khawl ber hi rintlak loh em ni ni ang le. Nge kan Chief Minister zahawm tak hian a ngaihdan la thlak loin leh finfiahna pawh nei chuang loin ala sawi ri mai mai zawk ni ang. Mizoram Legislative Assembly Election vawi 6-na kha 24 Nov, 2013 ah neih a ni a, Dec. 6 ah Vote chhiar aniin result pawh puan nghal a ni. Kha inthlanah khan Constituency 40 ah Candidate 142 an awm a, heng zingah hian hmeichhia 6 an tel bawk a. Indian National Congress (INC) leh MDA hming invuah thar te MNF, MPC leh Maraland Democratic Front te chuan Constituency 40 ah Candidate an dah kim a, ZNP te’n thawhpui nei loin an maldin a, bial 38 ah Candidate an dah bawk a, Nationalist Congress Party ten seat hnih – Hachhek ah Lalhmingthanga leh Mamit ah Biakthuama Molshoy te an Candidate bawk a. Zoramthar Duhtute (ZTD) te chuan Seat khat – Lunglei North ah S.L. Sailova dingin Jai Mahabharat Party (JMP) te pawhin seat khat – Hrangturzo ah F. Remkhuma a ding bawk. Heng bakah hian Constituency pahniha ding kawp mi pathum an awm bawk a, chungte chu – Lalthanhawla – Serchhip leh Hrangturzo ah, Lalduhoma – Aizawl West I leh Kolasib ah leh Lalawmpuia – Serchhip ah leh Hrangturzoah te a ni. B. Sangkhumi (MHIP President hlui) leh Lalawmpuia te hi Independent-a ding awmchhun an ni bawk. Sorkarna chelhtu INC atangin MLA ni lai mi pali te; H. Liansailova chu Aizawl North II ah a tling zo lo a, Aizawl West III ah R. Selthuama a tla bawk a, Tuikum ah K. Lianzuala tla bawkin Saiha ah S. Hiato a tling zo lo bawk a. Opposition lam atangin MNF Party chuan 2008-a an seat lak an hloh vek a, seat dang panga – Tuikum, Saiha, Aizawl West-I, Aizawl West-II leh Aizawl West-III an te hnehna an chang thung a, MDA anga an thawhhona Aizawl North- II ah seat an chang bawk a ni. Party President Candidate zingah Lalthanhawla chuan Serchhip leh Hrangturzo ah hnehna a chang ve ve a, MNF President, Zoramthanga chuan Central YMA President kalchhuak hlim leh Congress-a lut thar T. Sangkunga chu vote 798 in a hneh lo a, MPC President, Lalhmangaiha Sailo pawhin INC Candidate, R. Lalrinawma chu vote 422 in a hneh lo ve bawk a, ZNP President, Lalduhoma pawh chuan Aizawl West-I ah pathumnaah awmin vote hmu sang ber K. Sangthuama chu vote 1493 in a hneh lo a, Kolasib lamah pawh a pathumnaah awmin vote hmu sang ber PC. Zoramsangliana (INC) chu vote 1950 in a hneh lo leh bawk. Hetiang hi result a nih laiin Pu Zoramthanga hian engvanga vote tihchingpen hi la ring thei tlat nge a nih ang? Vawiin thlenga ala sawi danah hian a thinlung ala dam lo tih a chiang reng a, hei vang hian ngawih liampui mai mai loin han sawi thar leh duhna lian tak a awm phah a ni. Amaherawhchu kan Chief Minister zahawm tak hian a dik leh dik lohna fiah tak tak chuang lem loin a sawi ve mai mai zawk em ni tih zawhna a awm nghal theih bawk avangin an kuta thiltihtheihna a awm lai ngei hian chhui chiang sela a tha ngawtin a rinawm. Chutia bawhzuina engmah awm chuang lo a a sawi leh mai thin a nih chuan thenkhatte chuan khami tuma an chak loh kha an la na hle niin an rin phah emaw te a ni thei a. Inthlannaah chuan chak loh tum a awm ang bawkin chak tum a awm bawk tur a ni a, chutiang ni loa vote thlakna khawl – Electronic Voting Machine (EVM) zawk ringnghel anga kan ram hruaitu berin vawiin thlenga ala sawi reng hi a zia lo deuh a ni. Election Commission lama an bawhzui thu hriat a ni lem chuang si lo a, tunhnai thlenga kan ram hruaitu berin ala sawi ri hi a thurualpui leh a hnungzuitute tan ngei pawh sawi thar leh chi tak nge ni ang a, sawi zahthlak tak zawk ni ang tih pawh hi ngaihtuah tham tak a niin a hriat bawk a. A chhan chu kan Chief Minister zahawm tak hian thil ropui tak tak a sawiin, a tak hmuh tur la awm chiah lote hi engemawzat alo sawi tawh avangin mipui lam hian ngaihkhatin kan ngai tawh zawk em ni aw a tih theih hial tawh awm e. 2018 Inthlanpui neih hmaa sorkarna an chan chuan In tinin Nuaih thum theuh in dawng ang, NLUP dawng tawh zawng zawngte pawhin in dawng vek ang amah ngeiin a tihte kha hei sorkarna an chang tain vawiin thlengin sem ala ni lo a, Aizawl khawpui chhunga Traffic jam awmlohna atana kawng chhawng buatsaih tur pawh a ban khur pawh laih ala awm lo zel bawkin Assam Rifle hotu hnena ramri-a mau chin a sawi pawh kutthlakna engmah ala awm lo bawk zelte hi mipuite hian a tak hmuh hlan kan nghakhlel hle a, hengte vang hian tuna EVM chungchang a sawi leh tak pawh hi ngaihkhata ngaih mai tur zawk em ni a tih theih phah awm e. Chutih laiin ram hruaitu berin a vei tawh chu kan ngawih bopui mai mai erawh a dik hauh chuang lo ang a, engemaw fello awm anga ngaihna awm hi a bo theihna tura hmalakna awm sela chuan a duhawm hle bawk a ni.