THIS IS MIZORAM – XVI

Mahmuaka Chhakchhuak Feb. 21, 2021 Zofate Jerusalem – Aizawl khawpui enkawltu turte chu kan thlang zo fel tain tunah chuan boruak pawh a dai tan ta deuh a. Ṭhenkhatte tan lawmna tur anih laiin ṭhenkhatte tan chuan beisei ang a ni kher lo thei a, Vawk talh sual te pawh an awm ni awm tak a ni a, Khuangte nena lawmna hun lo buatsaih sualte pawh an awm bawk ni awm tak a ni. Engpawh nisela, Councillor seat hi 19 chauh a ni si a, mi 66 tan beisei vek mahsela mi 47 te chu an hlawhchham a ngai tho tho si a. Mizo kristian zingah hian khawtlang leh ram hruaina hna thawktu turte thlanna kan neih reng rengah hian Mizo Union hunlai atang tawhin nakin hnu zela chhunzawm tlak loh tur thil ti kan la awm reng thin hi thil zahthlak tak a ni awm e. Thu belhchian dawllo hmanga Party insawichhiatte, a mualpho zawnga mimal inbeihna lam hawi zawnga thusawite hriattur ala awm fo ṭhin hi a pawi ngawtin ka hria. Tuna Candidate pakhat phei chu a hmingpui lo chetsual palhna chu amah a ni lo tih hrereng mahsela hmehbel theih tur lek lek hian an sawi fo a ni awm a, amah ber pawh chuan vote thlak dawn hnaih lamah phei chuan insawifiahnain hun a hmang ta ber niin an sawi nghe nghe. Politics field-ah a vawikhat luhna a ni an ti bawk lehnghal si a, a tan chuan politics hi telvena tlak loh khawpa tenawm leh bawlhhlawh anga ngaih mai pawh thil awl tak tur a ni awm e. Nimahsela politics chu a ruh no no chhuakah tia patling chetvelna hmun a ni tlat mai si a, engtik lai mah hian hmeichhe rilru nem tak ang neitu tan chuan hlawhtlinna a awm lo turah te hian han ngai ta mai zawk ila a fuh awm e. Candidate ṭhenkhatte chu khawtlang mai bakah pawl hrang hrang leh kohhrana an nihna zawng zawng mai bakah an lawmman dawn tawhte zawng zawng nen mipui hnenah an inzuar a, in tinah lutin chibai an sem bawk a, nimahsela mipuiin chutianga inzuarte chu kan thlang tling leh chuang hauh bik lo a. Anni aia chanchin ngaihnawm nei lo zawk leh kawng engkima hniam zawka kan ngaihte chu vote hmusang tute an lo ni zawk tlat mai thin hi a chhan hriat theih a chakawm thin ngawt mai. Tunhma lam atang tawhin hetiang hi kalphunga kan lo neih a ni deuh reng reng a, mipuite zawk hian mi dik leh mi tha tia kan fak em emte ai hian mi dik vak lo leh sawi sep lo kai tawhte zawk hi kan ram leh khawtlang enkawl tur hian kan lo thlang tling fo tawh thin. An awmna party kan dah pawimawh laiin hmun thenkhatte chuan an mimal kan en zawk em ni tih tur alo ni leh thin bawk si a, thusawi thiam leh rual pawl thiamte ngei ngei pawh chu a tling lo zawkah an lo tang fo bawk si a nih hi. Donald Trump kha vawihnih Impeach a nihnaah khan a awmna party Republican atangin paih duh lama vote pe mi 6 lai an awm te ngei pawh kha keini ramah chuan nisela ‘Uire’ kan ti ngei awm si a, anni lamah chuan hei inhremna a awm lem lo ni awm tak a ni. Anni chuan an awmna party an dah pawimawh ber lo em ni aw a tih theih a, chu ai chuan mitinin zalenna an neih chu an dah pawimawh zawk ni awm tak anih avangin party lam atang pawhin action lakna engmah thawm kan hre lo chu a nih hi. Hetianga mimal zalenna an hmang ang hian keini ramah chuan a theih ve ngawt lem loh a, lo theih pawh nisela a rem hek lo ang. Pu Zawma MP laia Nuclear deal chungchanga ban pharna lam a nei lo te leh tun hnai lawka Pu C. Lalrosanga’n CAA Bill pass a nih tak vanga lawmthu a sawi ta mai te pawh kan sawi duh viau a nih hi. Hetiang deuh hian khawtlang enkawltu tur leh ram hruaitute kan thlanna reng rengah hian keini chuan party kan dah pawimawh tlat zawk hi kan thatpui nge kan chhiatpui zawk ang tih hi inhnial theihna tur tak a ni ang. Ram hruaitu zingah kan kristianna nena inmillo tak tak thilti awm nia an sawite ngei pawh chu an lawina kohhran lamin an hre lo der nge hrereng chungin an ngaimawh lem lo tih pawh a hriat loh mai bakah anmahni ngei pawh chuan inthlahrunna eih pawh nei loin an hmai ala uang thin bawk te hi a lehlam kawnga ngaihtuah chuan an huaisen ngawtin a hriat theih a. A hrim hrim hian ram hruaitu zinga ‘ka lo tihsual palh a ni’ ti emaw ngaihdam dilna leh mipui hriatthiam dilna lam hawia sawi tute kan la nei ngai reng reng lo hi thilmak tak niin a hriat. Ram hruaitu reng reng hian thil an ti sual ngai lo a, mipuia ngaihdam dilna tur leh mipui hriatthiam dilna turin thil tha lo an la ti reng reng lo ni awm tak a ni a. Chutih laiin Vantirhkoh anga thianghlim em tur chuan tumah chu kan ngai chuang si lo a. An thlabi hlawh lak zat te lah chu kan hriatpui vek bawk si laiin In leh lo tha tak tak an neih phah a, anmahni lah chu an thau tulh tulh hlawm bawk si a, buh kan hlir ei ang maiin an mawm hmel em em bawkte hi chunglam malsawmna niin kan hre chiah bawk si lo a. America President hlui Bill Clinton khan rei tak chhung chu a thil tihsual zep a tum nain a tawpah chuan a zep thei ta ngang lo a, mipui hriat turin nula hmeltha tak, Monica Lewinsky nena affair an neih kha a puang a nih kha. Chutiang bawkin American President 37-na Richard Nixon ngei pawhin a bawhchhiatna chu zep ral tum bik loin mipui hriatturin alo sawi tawh bawk a. An zimtawt vanga lohtheihloha puang an ni pawh chu alo ni maithei bawk nain keini ram hruaitute in zimtawtna ve thung chu sawi mawi phet kan la tum ta zawk zelin a zimtawttu chungah hremna lek kawh kan tum ta zawk a nih si hi!