AIZAWL KHAWPUI TRAFFIC JAM SUKIANG TUR PARKING HOUSE SUPPORT SCHEME (PAHOSS)

Mahmuaka Chhakchhuak March 3, 2021 Inthlan hmaa Campaign au hla pakhat vawiin thlenga kan la hriat lar em em chu ‘Traffic Jam awmlohna tura Aizawl khawpui buatsaih’ hi a ni. Chumi hmalakna dan tur pawh kan Chief Minister zahawm tak hian chiang taka sawiin a ban phun dan tur te pawh Engineer ang maiin a kawk kual zung zung a nih kha. Nimahsela a taka kan hmuh leh sorkar tharin Traffic Jam awm lohna atana a hmalakna hmasa ber chu Parking House Support Scheme (PAHOSS) a ni. Feb. 6, 2019 khan Aizawl khawpuia lirthei tam lutuk vanga tihziaawmna atana hmalakna thar Parking House Support Scheme (PAHOSS) chu Chief Minister’s Conference Hall ah CM, Pu Zoramthanga chuan a tlangzarh a. Traffic Jam-a harsatna lian awmlohna state ah he scheme hmang hian Mizoram hi kan la siam theih ngei a beiseiawm a ni tiin Chief Minister chuan a sawi. Chief Minister chuan PAHOSS kalpui dan tur tlangpui sawiin Aizawl khawpuia traffic jam a nasat em em chhan bulpui ber mai chu motor park na hmun tha a tlem em avang leh motor kawngpuia motor kan park mai thin avang ni berin, mipuiin kan mamawh em em chu motor parkna hmun tha a ni a ti a. Aizawl khawpui traffic tawt avanga mipuiin harsatna kan tawk thin chu sawrkarin a ngai pawimawhin, ti ziaawm turin Parking House Support Scheme (PAHOSS) chu rang taka duan a nih thu a sawi a. Chief Minister chuan PAHOSS hnuaiah hian mimal emaw, pawl angin emaw, motor park theihna hmun siam thei (a tlem berah LMV panga tal park theihna) hnenah Sorkarin tanpuina, motor pakhat zel park-na hmun ruahman turin Rs 1,00,000/- (Nuaih khat) tanpuina pek a nih tur thu a sawi. PAHOSS kalpui tur hian a tirah Chief Minister kaihhruaina hnuaiah ‘House Parking Committee’ din a ni a, ngun taka ngaihtuahna hman a nih hnuah scheme hi duanchhuah ta niin, he Scheme hi chak taka kalpui a nih theihna turin Chief Secretary kaihhruaina hnuaiah Executive Committee pawh din a ni a. UD & PA chu Nodal Agency a ni. Kumin 2018-19 chhung khan he scheme hnuaiah hian motor (LMV) sangkhat (1,000) Park theihna tur ruahmanna turin financial year kal liam ta (2018-19) chhunga hman turin Rs 10 crore dah fel a ni bawkin kum lo awm tur 2019-20 financial year-ah chuan Rs 100 crore dah tum a ni bawk. PAHOSS hnuaia hmalak duh, hmunhma nei tha te tana a dil theih nghal turin PAHOSS scheme guidelines fel tak duan nghal a ni a. UD&PA Department lamah application form mumal tak lak nghal mai theih a ni. A Scheme kalpui dan tur kimchang tarlanna guidelines pawh UD&PA website-ah a duh apiang tana download theih turin upload a ni bawk. He scheme hian motor park-na tur In sak thar mai bakah, kawngpui dunga In nei, Parking atana In sak tawhsa parking a let duh tan dil theih a ni ang a. Aizawl khawpui chhunga traffic jam nasat zualna-ah priority pek a ni ang a, a tul angin priority area siam thin a ni ang. He PAHOSS tlangzarhna hunah hian Aizawl Mayor kalchhuak ta Pu P.C. Lalhmingthanga pawhin thu sawiin, Chief Minister hmalakna hnuaia traffic jam harsatna thui taka sutkianna tur rang taka duan a ni chu lawmawm a tih thu leh, mipui tiphur thei zawnga kalpui a nih ngei a beisei thu a sawi a. IGP Pu LH Shanliana leh Dr. Vanlalramsanga, Planning Secretary te pawhin thu sawiin, he scheme hi Mizoram leh a bik takin Aizawl khawpuia chengte mamawh a nih avangin a lo hlawhtlin theih nan inhawng leh thurual taka sawrkar leh mipui an thawhho pawimawh an tih thu an sawi. Parking House Support Scheme (PAHOSS) tlangzarhnaah hian a thawhkhatna atan June ni 13, 2019 khan Chief Minister chuan Vanapa hall-ah PAHOSS hmanga In sa mi 99-te hnenah tanpuina sum hi a hlan a, a vaia hemi nia sum sem hi nuai 1746 a niin UDPA department chuan hemi atan hian dilna 563 an dawng tawh a, chung zinga 338 chu a hmunah enfiah tawh a ni. PAHOSS tanpuina dil thei te chu ram ruak public/commercial parking sa thar tur te, building awm sa parking atana let duh te tan a ni. June 13, 2019 niin heng beneficiary thlanchhuah mi 99 te hnenah hian CM in approval letter a hlan bawk. 1st batch atana tanpuina pek tur zat hi a vaiin cheng nuai 1,746 a ni a. PAHOSS hi Aizawl khawpui AMC area chhunga traffic jam tiziaawm tura hmalakna niin, PAHOSS beneficiary te hian an In sak sa emaw sak lai mek leh la sak turte emaw, man chawia vantlang motor park-na atan an buatsaih dawn a ni. PAHOSS atan hian Mizoram sawrkawrin kum 2018-19 budget ah Rs 1,000 lakhs dah a ni a. Kum 2019 2020 budget ah Rs 6,000 lakhs a dah leh bawk. Kum 2021 kan chuankai meuh chuan he PAHOSS tan hian cheng Nuaih 1003.30 pek chhuak a nih tawh tih kan hre thei a. Chutiang bawkin Lirthei dah theih zat tur hi LMV – 4,764 leh Two Wheeler – 8,994 niin a zavaiin 13,758 a ni. hetiang zat Lirthei dahna tur atana kan sorkarin kum 2018-19 chhunga Nuaih 1,000/- leh kum 2019-20 chhunga Nuaih 6,000/- a dah sum leh pai thahnemtham tak luanral tirna a tih theih awm e. A chhan chu kan hriat theuh angin Aizawl khawpuiah hian heng lirthei 13,758 te hian Parking fel leh tha tak lo nei hlawm vek pawh nisela kan Aizawl khawpuiah hian lirthei nitinin a pung reng bawkin khawilai hmunah pawh traffic jam awm reng ang a nih mai avang hian hetiang zat lek lirthei parking neih that hian awmzia a awm hmel loh riau a. Tin, kan sorkar hian he PAHOSS kalpui mekah hian mi 430 a thlang fel tawh ni awm tak a ni a, Traffice Jam tihziaawmna atan enge kawngro a sut phahna ni le? He PAHOSS atan hian Urban Development & Poverty Alleviation chu Nodal Agency a ni a, Depaertment dang pawisa hmang loin UD & PA Department pawisa hman ni awm tak a ni a. Chuti a nih chuan UD & PA hian Aizawl khawpuia mi hausaho lirthei dahna atan pawisa heti zat a dah theih laiin mi rethei leh harsa zawkte chawikanna lam hawi pawisa hmanna chu thahnemtham tak dah awm tak a ni. Chuti a nih loh chuan mi rethei leh chawikan ngai tak takte hian kan sorkar hi mi hausate tan chauha sum leh pai hmang emaw kan ti mai palh ang e.