AWI KA REI KANGMEI HI!

Mahmuaka Chhakchhuak March 15, 2021 Hmanni lawkah Mizoram chu Best Green Forest ah thlan kan ni a, nimahsela a nihna takah chuan hetiang em chu kan ni lo deuh ni awm tak a ni. A enga pawh lo nisela, kan zoram hi ramngaw nei tha ang reng tak kan ni nain keimahni mipuite hian kan vat chereu hneh hle mai a, khawi lai hmunah mai pawh hian vah chereu hnu leh ram bua hi hmuh tur a awm ta vek tawh mai a nih hi. Kan pi leh pute hunlai atang tawha kan lo chin than tawh niin kan thanhnan a ni tawh a, kan la chhawm zel a ni. Hetianga ram tha lai vaha hal hi Lo atana kan neih duh vang a ni ber a, hei kuminah ngei pawh lo hal khu kan hmu leh ta zel a, hetiang zel chuan zoram nuam tak hi Thlaler ramah kan la chan mai lo ang tih pawh a sawi theih loh a nih hi. Lo neihna atana ram ngaw tha lai vah leh hal hi kan hnam nunphunga bet tlat tawh a ni a, vawiin thlengin kan la bansan thei tak tak lo. Kuthnathawka eizawng hi a tam zawk kan la nih avangin zoram pumah hian kumtin lo kan vah thar zel a ngai lo thei si lo a. Engtin emaw tak kan kalphung hi kan thlak danglam ava duhawm em. Chuti a nih loh chuan kan tu leh fate tan hian ram nuam leh duhawm hi kan nei lo mai ang tih pawh hlauhawm tak a ni thei. Ram ngaw tha hi hnam changkang zawkte chuan boruak tha siamtu a nih avangin an humhalh tha em em a. 2020 kuma Brazil rama ramngaw kang te California rama ramngaw kangte kha mipui mai bakah an sorkarin theih tawpin a thelhmihnaah tha an thawh mai bakah an buaipui a, sum leh pai ngei pawh thahnemtham tak an seng a nih kha. Ramngaw hlut zia an hria a, ram ngaw siam hautak zia leh hun a duhrei zia an hriat avangin ramngaw neihsa humhalhna kawngah tha an thlah lo a, sum leh pai lamah pawh ipna an nei hek lo. An ram hi an hmangaih takzet a, a humhalhna lamah pawh an theihtawp an chhuah bawk avangin ram awh-awm an nih phah bik thin. Ramngaw humhalhna lamah chauh ni loin an hnam culture hrim hrimte pawh an humhalh tha a. French ram leh hnam-a chiangte’n an hnam tawng an humhalh dan mawlhte hi a chhuanawm a sin – French khawpui Paris-ah i kal a, an tawng i thiam si loh chuan sap tawng emaw i hmang ngei ang a, sap twang i biak chuan sap tawng thiam reng chungin anmahni hnam tawngin an chhang thin ang che. A chhan chu an hnam an hmangaih vang a ni. Chutiang thinlung an neih avang chuan an ramin hma a sawn phah a, ram awh-awm tak an lo nih phah a ni. Hetiang rilru hi kan neih ve loh chuan he ram hian a tuar ang a, ral lam kan pan zel thei. Tuna kan sawi lai – ram kang chungchangah ngei pawh hian a neitute hian ram hal a, thlawhhma neihna atana kan hman hi thil tangkai tak leh ei leh bar tur neihna ber a nih rualin kum khat atan chauha nei mai loin vawikhat kan vah leh hal hian kum 10 talte daih tura kan sawngbawl a va tha em. Kuminah Lo kan hal a, nakumah hmun dangah kan hal leh a, chutianga thlawhhma sawn zung zung mi kan nih chuan he ram hian tlin loh chin a nei mai ang a, mipui kan pung zel bawk nen hian eizawnna kawng pawh kan thlak mai a tha zawk hial lawng maw. Huan nghet ang chite emaw thlai kumhlun ang chite hi ching uar ila kan taksa pawhin alo ngeih zawk mai bakah ram leilung pawhin alo ngeih zawk ngei tein a rinawm. Lo kan vat a, kan hal leh a, tum thum emaw kan han thlo leh a, kum tawpah a rah kan seng chauh a, a rah seng that tur alo awm loh phei chuan kan hah thlawn emaw te alo ni bawk a. Hetianga hah tak taka kan thawhna rahchhuah hi kum khat emaw ei chauh te kan seng thin bawk nen hian thil zawngchhang tlak tak a ni pawhin a hriat loh. Nimahsela, kan thisenah a bet tlat tawh si a, kan thanhnan tlat tawh si a nih hi. Ram kan hal hian kan vah chin chauh alo kang lo thin bawk te hi pawi tak a ni a, ram tha lai leh ram ngaw hring tha tak te a han kang vak mai te hi thil pawi tak a ni a, a ngai ang bawka rawn hring tha leh tur hian kum engzat tak ngai ang maw le. Hetia ngaihtuah ringawt pawhin a thinrimthlak a sin. Brazil ram ngawpui a han kang duai duai mai chu thenkhatte chuan an tahpui hial a, a pawi takzet a ni. Nungchate tan zalenna hmun nuam tak ni thin kha a kiam mai bakah mihring taka boruak thianghlim hip tur alo tlem phah lehzel te pawh hi thil pawi tak a nihna a ni awm e. Zofate hian kan ramri humhalh chin enkawl tak tak thei lo mah ila, tuna kan ram enkawl theih chin tal hi chu humhalh tum teh ang u. Thlawhhma atana lo hal thinte ngei pawh hian kumkhat atan chauha nei loin kum tam tak daih turin enkawl ila, lo vahna atana kan tha sente hi thlai tui pekna atante hian seng tawh zawk ila, kum 10 emaw daih tal hian thlaite ngei pawh phunin chung atang chuan sum leh paite pawh lalut thei turin ruahmanna i siam thin tawh zawh teh ang u. Hetia ram tha lai vat a, kan han hal leh ngawt thin hi a pawi emai a, kum khat emaw chauh tana kan enkawl te pawh hi a uihawm lutuk emai. Ram leh hnam humhalh tu kan nih ang ngeiin he ramah hian hmangaihna lantir ila, keimahni ngei hian hmangaih taka enkawlna hna hi kan kuta awm a ni tih te hi i chiang thar leh ila a va duhawm em. Awi ka rei, saw kan ral hla tak a sawi ram a kang leh hluah hluah ta, ava han pawi tak em!!