KA VEI ZAWNG - I

Mahmuaka Chhakchhuak March 19, 2021 MITTHI PANGPAR: Engtik atang chiah khan nge mitthi puala pangpar hi kan inpek thin tih erawh ka hre thei mai lo nain kum tam ala ni lo maithei a, tunah erawh kan uar ta viau thung mai. Pawl hrang hrang leh mimalte ngei pawh hian mitthi awm Ni in anmahni uina leh sunna mai bakah hriatrengna atan Kuang chunga Pangpar dah hi lohtheihlohah kan ngai ni ta berin a hriat a, pangpar dah tur bikte hial kan in ruat ta thin a nih hi. Mitthi kuang chunga pangpar kan dah thinte hi a tam zawk hi chu tute emaw siamsa, Rs. 300 – 500 inkar man vel a ni ber a, chungte chu pawl leh mimalte hian kan leiin mitthi vuiniah kan dah ta thin a. Hei hi dan ang maia kan neih tawh ni berin a hriat a, nimahsela chutih rual chuan hetianga pangpar kan dah thin hi thil tangkai lo leh hnawksak mai zawk a nihna hi a tam thei zawk awm e. Side A lamah heti zawng hian han sawi hmasa ila – Mitthi kan neihin a thawhna leh telna pawl hrang hrang mai bakah kohhran lama a rawngbawlpuite thlengin pangpar dah hi tih ngei ngei turin kan ngai a ni ta mai a. Anni bakah hian mimal tupawh maiin kuang chunga pangpar dah hi ruat bik a awm theih chiah loh avangin tu tan pawh a theih bawk avangin thenkhatte thih hi chuan pangpar dah pawh a tam thin viau nghe nghe. Tumkhat chu mitthi kuang chunga pangpar an lo dah hi bangah an tar zel a, chungte chu a zavaiin 170 vel a ni hial awm e. Chumiin a lantir ni bera ka hriat chu mitthi chu mite hian an lo lainat hlawm hle mai tih deuh chauh a ni mai. Side B lamah thung chuan hetianga mitthi puala pangpar kan dah thinte hi pawl leh mimal te hian mitthi kan lainat leh sun zia lantirna atana kan dah a ni ber a, sawisel chi erawh a ni hauh lo ang. Chutih rualin mitthi kan vui liam hnu atangin chung kan pangpar dahte chu paihbo ngawt alo rem chiah si loh avangin a langsar thei ang berin bangah kan tar hlawm a, thla alo tlin meuh chuan hnawk kan ti rilru tanin thenkhatte phei chuan an ngaih pawimawh loh deuh te emaw pangpar mawi lo deuh nia an hriatte emaw chu an thliar a, chutiang zel chuan an paih then zauh zauh a, thla thum a han tlin meuh chuan bangah chuan pangpar tlemte emaw chauh alo awm tawh a, kan ngaih hlutna ai mahin hnawk kan tihna a lian zawk mah thei awm e. Kum alo tlin meuh chuan kan melh peih tawk emaw chauh tawh a, tih fai leh rem fel pawh kan phur tawh meuh thin lo. Hetiang anih vang hian mitthi puala pangpar kan dah thin hi thil tha tak a ni lem loin mitthi awm Ni atan chauha pawimawh leh ngaihhlut tihna a ni. MI thenkhatte hi chuan mitthi dang an awm lehin an pangpar dawn tawhte chu an han tuaifai thuak thuak a, an dah thar veleh thin ni tein an sawi a, thil remchang tak a nih rualin an dah thar lehnate chuan hre ta sela chuan thil lawmawm tak erawh a ni lem lo maithei bawk. Heng vang hian mitthi puala pangpar kan dah thin hi thil tha tak a nihna aiin uar chhunzawm zel chi a nih lohna hi a lian zawk maithei awm mang e. Pangpar ai hian hmanrua emaw bungrua lam emaw sum leh paite emaw hi inhlan thin ta zawk ila mitthi chhungte hian an chhawr zawk mai bakah an hlut zawk ngeiin an rinawm. NAUPANG PHONE KHAWIH TIR: Kan tu leh fate hi kan duat hlawm theuh mai, nimahsela kan duat vanga kan Cell phone khawih tira games-te kan khelh tir hi kan uar viau nain tih tawp hmak theih sela a tha ngeiin kei ka ring. Games khelh hian hlawkna hmuh tur a tam lo hle mai a, nu leh pate rilru atang chuan anmahnia tleina an neih chu kan hriatthiamna ber a ni awm e. Chutih rual erawh chuan an mitin a tuar a, an zirlaiin a tuar bawk a, chumai bakah chuan an thatchhiat phah bawk ti ila nu leh pa thenkhatte chuan min huat phah hial maithei awm e. Nimahsela chhungkaw tam tak ka chikna atangin dikin ka hre tlat si a ni. heng lote pawh hi naupangin Cell phone an khawih that lohna dang pawh sawi tur ala awm ngei bawk ang a, hengte hi duh tawk ta phawt ila, heng atang ringawt pawh hian chhungkaw tam tak chuan a chhe zawngin hlawkna kan hmu zawk ngeiin a rinawm. Hetianga kan tu leh fate Cell phone kan khawih tir hi bansan hmak thei lo mah ila hunbi nei deuh leh tlem zawk deuh tura hun siam sak a tha ngawtin a rinawm. An zirlai atana pawimawh leh tulna vanga an khawih thinte erawh te hi chu sawi ngai loah ngai ila, a tam ber zawkin an khawih chhan Games khelh ringawt hi chu chhungkaw tan hnemhnanna a tam loh em bawk avangin nu leh pa thenkhatte hi chuan kan chhuhsak ngam tawh lo hial ni tein a hriat bawk a, thil pawi tak a ni awm e. naupang thenkhatte phei hi chuan aia upa zawkte zahna an neih loh phah ni awm tak a niin thenkhatte phei hi chu fiamthu ti tak deuha kawmthlanga zawngtah kung aiin chhungkuain an chhawr tangkaipui loh zawk an tihte hi an ni thei hial bawk awm e. A eng pawh chu lo nisela hetianga kan hmuh phak reng leh auh phak renga anmahnia tleina an neihna hmanrua atana Cell phone kan khawih tir thin hi anmahni tal hian hlawkpuiin rah duhawm tak chhuah thin sela chuan an tarmit siamna mante pawh hi a uihawm loh deuh phah maitheiin, zinga kaihthawh hleitheih loa an lo awm thin leh lo thatchhe deuh leh phunchiar deuh pawh nisela ala ngaihdam theih awm e.