KA VEI ZAWNG – II

Mahmuaka Chhakchhuak March 23, 2021 PROFFESSIONAL LINE: Kan zoram zimteah hian Kohhran hrang hrang 80 chuang kan awmin chung zingah chuan rawngbawltu pawh engemawzat kan awm bawk a. Chung rawngbawltute chuan theihtawp chhuahin Pathian rawng an bawl a. Nimahsela Pathian rawngbawlna hna an thawhna chu midang aia ropui bik leh chungnung bika an indah phahna a nih chuan an rawngbawlna chu chunglamin mal a sawm kher lo maithei. Sakhaw rawngbawltu tam tak zingah hian Chunglamin a ruat loh rawngbawltu hi a awm ve theih tho avangin bial enkawl tura kohhranin term an siam pawh la hmang zo thei ngai miah loa sawn kual ngai sek rawngbawltute hi chuan tihtakzeta tawngtaina nen Pathian dawr zawk sela an kawng lo tur an zawh palh maithei a sin. Chutiang bawkin sorkar hnathawk tam takte pawh hian hna pehhlen emaw a bika hna siam sak pawh ni lem lo a an hna tha taka an thawh hian fak hranpa kher an ngai lo a, thlabi hlawh neiin an thawk a, a hrana fak kan tum thin hi kan tih loh tawp tur a ni. Chutiang zelin Force lama thawka thlabi hlawh tha tak la bawk chung si a misual man leh ruihhlo man lama sulhnu la nei miah si loa Computer Games lam emaw thil dang a thiam viau ngawt mai chuan thil tha lo tak a ni thei a ni. Mahni eizawnna hna theuhah chuan kan ngaihtuahna pawh kan hmangin mutmu tuah tha thei ngai lo khawpa kan ngaihtuah changte pawh a awm ang. Midang hriat lem loha mittui tlak hial changte pawh a awm bawk ang a, chung zawng zawng chu kan eizawnna hna a nih vang a ni. Sakhaw rawngbawltuin a professional line kalsana motor khalh emaw a uar viau maiin, Driving Competition lamah lawmman dawng fo pawh nisela a hrechiang tute nuih a tiza mai mai zawk thei. Hetiang vang hian kan eizawnna hna theuhah hian rinawm leh dik takin thawk theuh ila, thildang hi chu a penhleh ang deuh chauhin i buaipui thin zawk ang u. Mahni eizawnna kawnga hlawhtling tak tak mang silo hian kawng hran hrang hi kan dap kual a, kan teirei tha peih mang bawk si lo te hi kan hlawhtlin lohna bul pawimawh tak niin a hriat. Pu PL. Liandinga’n kum 1983 daih tawha alo sawi hi ala dik reng a nia - ‘Kan kuta hmanraw awmsa reng hman thiam hi a pawimawh khawp mai. Chumi kalhlen a hmanraw dang va dap va dap hi thluak sawizawi hma chuan thil awmze nei lo tak a ni duh khawp mai’. NGAWI LA, NGHAK HLEK RAWH: Lawmthu sawite, hmangaihna thusawite leh lainatna thusawite hi chu rang tak leh chawpchilh taka sawi nghal bawrh bawrh mai pawh a sual lohna lai a awm thei ang a, lungawihlohnate, thinrimnate leh rilrua awm awm sawi ngawt thinte hi chu ngawi hlek a, nghah hlek hi alo pawi lo duh viau bawk. Miin vanduaina an tawk a, emaw Innei thar an awmte hian inbuatsaihna nei lem lo pawha tawngkam khat emaw leka thusawi thutte pawh hi a lo sual lo tlangpui zawk awm e. Chutih lai erawh chuan Ram hruaitu lu ber atanga inthenawm khawvenna thilah thleng hian hetianga mahni irawm chhuak ang anga puah phawng phawng mai thin hian a ngaithlatute tan lawmna lam aiin vuivaina a thlen awl zawk fo thin. Ram hruaitute zingah pawh hian ngawih rih lawk emaw nghak hlek emaw thei lo riau hi an awm avangin he zoram zimteah ngei pawh hian tunhma, kum tam tak liam tawh thilte pawh kan la sawiri leh fo duh thin. Tun hnai lawkah Assembly House chhungah Nuaih thum sem chungchang chu Voice record hmuh tur a awm laiin ziaka dah a ni ngei em tia sawi an awm a ni awm a, chutih laiin CoviD hripui laka mizote kan la him chhan chu CM Pathian tih vang tih chu voice record kan beisei leh bawk a ni awm e. He thil pahnih hi ram hruaitu lu berte rorelna hmuna thil thleng a ni a, kan sawi duh viau hlawm a nih hi. Ngawi rih lawk sela, han nghak hlek sela hetiang hian an sawi lo ni mai tur niin a hriat a, mahni awmhmun atanga lo thlir tute nuih aza lo mai tur. Hetiang deuh hian kan nitin hun hmanna hmun hrang hrangah inhnial buaina leh insualna hial thleng thinte hi a awm phah fo bawk thin. Thinrimna leh lungawih lohna hi engtik lai pawha neih maitheih tura lo thleng vat thin a ni. Adama thlahte zingah hian insumna tlachham zualte zingah phei chuan thil tha lo tak a thlen phah thin bawk a. Insum thei deuhte erawh chuan mualphona an pumpelh mai thinin sawi sep an kai loh phah zawk thin a. Hnam changkang zawkte hi hetiang kawngah hian entawn tlak tak an ni, Shakespeare-a khan tunge ni a huat deuhpa kha ‘a tha a ni, a tha takzet a ni’ tia a fak chiam kha? Kha pa kha a haw viau niin an sawi a, nimahsela mi tam zawkte chuan a huatna chu an hrethiam vek chuang lo a, a hrethiam tan erawh a haw viau niin a hriat theih thung. Kan Pathianthuah ngei pawh hian kan hmu a, Tirhkoh Paula khan a nau Timothea hnena lehkha a thawnnaah ‘Aleksandra, dar chhun thiam kha ka chungah a sual em em thin a ni, Lalpa chuan a thiltih ang zelin a thungrul ang; a lakah khan nang pawh fimkhur rawh’ tia a sawi nghe nghe bawk kha. A laka misual chu thungrulh lam tum loa Pathian kuta a dah mai zawk hi entawn tlak tak a ni. Insumna nei hman lek loa kan puah phawng phawngna hian rah duhawm loh tak hi a chhuah fo zawk avangin thluak fima ngaihtuah let lehin min ti zaktu alo ni thei bawk a, thenkhatte hi chuan a nih tur ang a nih vek hnuah te hian ngaihdam an dil thar leh thin bawk a nih hi. Chutiang a thlen lohna atan chuan tawng zung zung hi insum deuhin, ngawi hlek ila, nghak hlek ṭhin zawk ang u.