KHAWNGAIH VOTE

Mahmuaka Chhakchhuak March 4, 2021 Inthlang ram kan nih ang ngeiin khawtlang leh ram hruaitu tur kan thlang mawlh mawlh reng a, chutianga kan Inthlannaah chuan India khua leh tui-te tan chuan duhthlanna thiang tak hmangin kan duh ber leh tha kan tihna berah mipui te’n vote kan thlak thin. Tumahin kan duhlohna zawkah vote min thlak luih tir thei lo a, zalenna kan neih hmangin keimahni ngeiin kan duhna berah vote kan thlak thin zawk tur a ni. Nimahsela khawtlang leh ram hruaitu kan thlannaahte chuan tlin duh luat avangin thenkhatte chuan sum leh pai an hmachhuan mai bakah hnehna an chan huna duhsakna pek te an tiam thin ta hial mai nia an sawi hi kan ram ngeia thil thleng atan chuan thil pawi tak a nih piah lamah thil zahthlak tak a ni. Aizawl khawpui chhung mipuite chuan nimin lawkah Councillor kan thlang zo chiah a, kan la hre hlawm ngeiin a rinawm: Hmun thenkhatah chuan inthlahrung hmel tak chunga vote chakawm tak tura vote rawn dil an awm laiin hmun thenkhatah thung chuan sum leh pai hmatheh chunga vote dil an lo awm bawkin, chutianga hmalatute chu MPF te ngei pawhin an kamkhat an awm bawk nitein an sawi a. Nimahsela Inthlan result a rawn chhuah meuh chuan chung mite chu mipuiin kan thlang tling leh tho bawk a nih kha! Inthlan hma khan Party Official Candidate pakhat chuan In 1300 vela a luh thu sawiin ‘keimah ang bawka vote zawngin candidate dang an rawn lut ve thoin ka ring a, chungte nen chuan kan khawtlang enkawl turin min khaikhin ula tha min tih leh min vote dawn nia tiin ka sawi zel a’ tiin, khawngaih a dil loh thu leh vote neitute duhthlanna a nih zawk thu a sawi laia result alo chhuah meuh chuan a tling lo mai pawh ni loa vote tlemte chauh a hmu chu mak a tih thu min hrilh a. In tin luta vote a zawnnaa a tawngkam hi ka duh zawng tak a niin tawk ka ti viau mai a, vote neitute duhthlannaa a innghat hi thil kalhmang dik tak niin ka hre bawk a ni. A tlin loh chhan erawh a dang maithei a: a awmna party vang a ni thei a, an manifesto vang pawh a ni theiin amah ngei pawh an ngainat zawng alo ni lo pawh a ni thei bawk ang. Chulam chu engpawh lo nisela, mipui hnena khawngaih dilna telloa vote a beisei hi ka fak duh tlat a ni. Khawtlang hruaina hna leh ram hruaina hna thawk tur hian mipuiin tha kan tih ber leh kan duh ber kan thlang mai tur a ni a, kan hnena khawngaih an rawn dil hi thil tul lo tak niin alang. A chhan chu hruaitu nihna hi kan khawngaih vanga thawk tur an ni lo a, tling lo chung chunga thawk tur lah an ni hek lo. Mipui, vote neitute’n hruaitu tlaka kan ngaih vanga thlan tlin an nih anga thawk mai tur an ni. Kan hnena khawngaih an rawn dil thiam viau vangte, kan laichin hnai an nih vangtea vote mai kan nih chuan vote neitu mipute hian kan mawhphurhna a dik lohah kan hmang tihna a ni ang. Hetiangah takah politiciante hian inzawrh dan an thiam thin a, mipui sukthlek hmuh hmaih hauh silohin kan sihhnipna lai takte hi an hre fuh duh viau thin. Chuvang chuan tawktarh tenawm tak tak hmangte an lo awm phah a, tawngkam thiam tak hmanga mipui hnena vote zawngte pawh an lo awm ta a nih hi. India khua leh tui nia kum 18 tling tawh phawtte chu duhthlanna thiang tak nei thei tura ngaih kan nih ang ngeiin khawtlang leh ram hruaitu thlanaah ngei pawh kan duhthlanna hmang thei ngei tur kan ni. Kan chhungkaw bil min duhsaktu an nih vanga hruaitu atana kan thlan ngawt kha a dik lo ang a, sum leh pai min hlan vang ngawtin kan thlan kher kha a dik hek lo ang. Min duhsak em em tu pawh lo nisela khawtlang leh ram hruaina hna thawk turin a tha kher lo maithei a, sum leh paia min duhsaktu ngei pawh chu mi pamham tak te a lo ni zawk daih maithei. Chungte chuan khawtlang leh ram an tichhe zawk thei a, mipui min hruai khaw lo zawk thei a ni. Chungtiang anih vang chuan mipuite hian kan khawtlang leh ram hruaina hna thawk tur hian ngaihtuahna fim tak nei chunga vote kan thlak fo hi a tha a ni. Hmun thenkhatahte chuan sum leh pai hmatheh tur nei miah lo leh khawtlang leh ram hmasawn duhna vang zawka hruaitu atana tlinga inhria (an chapo vang a ni lo a nia) leh hnathawh tur neia inhriate vote zawng an awm bawk a, chung mite chu hruaitu hna chelh tur pawhin an rintlak hmel daih zawk a ni. Amaherawhchu an tha vek bik lo maithei a, an that hmel viau laiin an tlin hnuah hian party lama an hotute kawh kual ang mai maiin an lo awm hlauh thei bawk a. A enga pawh chu nisela, chungtianga vote zawng tute chu vote an chakawm bik hliah hliah zawk a ni. A chhan chu anni hi chuan campaign-na atana sum leh pai sen an ngah loh mai bakah mipuia an insawi bat ber pawh hnathawh that a ni a, chu chu mipuiin kan tehna fung pawimawh ber tur tak pawh a ni. Heng vang hian khawtlang leh ram hruaina hna thawk turin mipuia khawngaih vote dil hi tih fo chi niin a lang lo a, in khawngaihna chi pawh niin a hriat loh. Mipuia sum leh pai thahnemtham tak senga vote zawng tute ngat phei hi chuan an lo tling a nih phei chuan an sum leh pai sen zah tal hi hmuh let leh an tum fo an ti a, an thlabi hlawh lakin a rulh zawh mai loh thin avangin eiruknain bul an tan duh viau tih hi kan zoram politician lo ni tawh thenkhatte atangin kan hre vek thei ang. Chung mite chu ramin a thatpui loh mai bakah ramin a chhiat phah a, ram hmelma an ni zawk a ni.