LAWIPU AṬANGA VEINA LIAN TAK NEITU CHU

Mahmuaka Chhakchhuak March 23, 2021 Pu Lalbiakthanga, Lawipui venga cheng chuan Myanmar rama sipai rorelna a awm leh tak vanga kan unaute tawrhna nasa tak chu a tawrhpuizia lantirna atan leh Mipui rorelna thami tundin a nih leh thuai theihna atan March 23, 2021 (Thawhlehni) atang khan a chenna hmun Lawipui atangin kein a chhuak a, ke hlira kalin April 6, 2021 khian Zokhawthar leh Tiau thlen tumin kal a tum a ni. February 1, 2021 atanga sipaite’n mipui sorkarna an paih thlak atang khan duhlohna lantirna chu kal zelin nitin a lian telh telh a, vawiinni thlengin ala tawp lo a. Mipuiin an thlan hruaitu Aung San Suu Kyi chu walkie-talkie kawl leh Natural Disaster Law bawhchhiaa puhin an hreng nghal bawk a. Sipai sorkar thar chuan hrohrang na tak hmangin mipui chungah thuneihna an lekkawh a, mipui lam hawia silai an hmetpuak satliah pawh a huatawm tawh nakalaiin nu nau pawisawi lo thlengin nunna chhahna atan silai an hmang lui ta fo mai hi a thinrim thlak ngawt mai. Buaina chi hrang hrang a awmin mipui lamin himna zawngin Mizoram thleng thlengin an rawn tlanchhe thla bawk a, tunah (March 23) hian 500 chuang chuan Mizoram rawn lut tawh nia hriat a niin mi 100 bawr vel chuan Aizawl khawpui an rawn thleng tawh nia hriat a ni bawk. Hengte hi Myanmar Police ni chunga Civil Movement an zawm vanga an sahimna zawnga rawn tlan chhiate an ni nghe nghe. An sawi dan chuan sipaiin sorkarna an lak takah chuan sipai rorelna duh loha lungawih lohna lantirte kha kap tura thupek an ni awm a, chu chu an tan thil harsa tak a ni bawk si avangin pawisawi lo kan unaute kah ai chuan keimahni zawkin an tuar mai ang e tiin an rawn tlan chhe ta ngawt mai a ni. Hetiang chauh niloin chi hrang hrangin sipai lam hian mipui an tiretheiin nunna chan phah an tam hle a, nunna chante hi mi 800 an chuang tawh hiala sawi a ni nghe nghe. Chutih mek laiin kan sorkar laipui chuan Myanmar nena inrina nei State Mizoram, Nagaland, Arunachal Pradesh leh Manipur bakah ramri vengtu Assam Rifles-te hnenah lehkha thawnin, dan loa rawn lutte chu uluk taka zawng chhuak a, a rang thei ang bera thawn let turin hriattirna alo chhuah bawk a, hemi thu tidanglam leh tur hian kan State sorkar hruaitute’n theihtawp an chhuah mek a ni. Hetianga sorkar hruaitu lam an buai mek lai hian kan unau raltlante chu hmangaih taka kuangkuah turin hmun hrang hrang atangin thuchhuah a lo awm mek bawk a, Aizawl khawpui ngeiah pawh an puala thawhlawm khawn hial a nih bawk kha. Nitin chanchin thar hriattur a awm reng laia chanchin lawmawm loh lam thu thar a awm reng fo bawk te hian mut a ti har ta hle mai. Chutiang boruak rit takin min chenchilh reng lai chuan Lawipui venga cheng Pu Lalbiakthanga chuan a awmhmun atanga a ngaihtuahin rapthlak a tiin mut mai mai har a ti hle mai a, ralthuam nena inring taka awm sa reng sipaite do let turin neih engmah a nei bawk si loh avangin a mutna khumah chuan a hui leh pap pap thin ngeiin a rinawm a, chawei pawh harsa a ti tawh ngei bawk ang le. A mah, Pu Lalbiakthanga hi mi fel tak a niin a hriat a, Foundation For Drug-Free Mizoram-a Financial Secretary tang lai ngat a ni lehnghal a, khawtlang tan pawha mi tangkai tak a ni. Aizawl khawpui veng mawng tak Lawipu atanga a veina chu hmetmit thei mai loin a lian zel a ni ngei ang a, a tawpah chuan mihring tan vawi khat thih theuh alawm le kan hmabak vek tiin a nunnain a tawrh tur lam pawh ngaihtuah duh hauh loin iptepui ak chungin Ke ngata Zokhawthar thlen tumin Thawhlehni (March 23, 2021) khan a chenna In chu a chhuahsan ta a. Pu Lalbiakthanga chanchin ka hriat hian ka awmhmun atangin full support ka lo pe a, Patling, kum 63 miin heti taka Myanmar rama kan unaute tawrhna a han vei hi ngaihnep rual a ni lo a, a kalsan a chhungkuate ngaihdan turte leh ama taksa hriselnain a tawrh theih dan turte ngaihtuah phei chuan tu tan pawh han kal tirna chi rual a ni kher lo ang. Nimahsela a ni chu Pu Lalbiakthanga a ni tlat alawm. A ipte puiah hian Chemtum bak hmanrua a ah ka ring hauh lo a, Myanmar sipai huaisar tak tak hmachawn turin ralthuam lam engmah a ken ka ring lo a ni. Nimahsela a thinlung tumruhna erawh chu tuma han tihdaih theih rual lohin nitin pawh nilo, darkar tin zawk hian a inthumrawn tluk tluk a ni awm si a. Zing a thawh hlimin thu thar a ngaihven ngei ang a, tukthuan ei laiin a ngawih theih mai mai a rinawm hek loh. Chhun lamah lah midang bula a awmin Myanmar lama kan unaute chanchin sawi loin a ngawih mai mai a rinawm loh bawk a, tlai lamah lah a thinlung veina chu Niin a tlak liampui theiin a rinawm hek loh. Pu Lalbiakthanga thinlung ngaihtuahna hi hmu thei ngat ila a hmuhnawm ngawtin ka ring a, a thisen zam zawng zawngah hian Myanmar lama kan unaute tawrhna hlir bak hi thil dang hmuh tur a awm lo hial awm e. Sipai nunrawnna vanga nunauin an tawrhna zawng zawngte a han ngaihtuahin rapthlak a ti ngei ang a, thinrimnain a thisen chu a lum pup pup ngei ang a, chutih rualin mipui lamin an tawrhna rapthlak tak chu lainatnain a khat dawn bawk si a. Chuvang tak chuan a tan Lawipu-a awm reng theih a ni ngang loh vanga ke ngata Zokhawthar thlenga kal huam ta hial a nih hi a rinawm a ni. Zuk leh hmuam ti mi a nih phei chuan ni tam tak tla turin zialsa leh zial chawp ngaiin vaihlo leh lehkha a pai ngei bawkin ring ila, mizopa tan chuan Chemtum chu khawilo kan kalnaa ken ngei ngei a nih bawk avangin a ken hmaih hauh lo bawk turah ngai ila, lukhum hmathlawk nen phur takin a kal ngei ang le. A tan darkar khat pawh hi hlu tak tur a nih avangin keini chuan Chunglam hruaina hnuaia a kal theih ngeina turin ilo ṭawngṭaipui mawlh mawlh ang u.