PU LALDUHOMA A TLIN A NGAI

Mahmuaka Chhakchhuak 

March 7, 2021 

 BY ELECTION SATLIAH A NI LO:

Tun Serchhip biala By Election neih tur hi hun danga By Election kan neih tawhte nena in ang tura ngaih ngawt theih a ni lo a, tum dang zawng aia danglam leh chhinchhiah tlak tak tur a ni. MLA 12 te khan Dan an ngaih pawimawh vanga hek niin an sawi nain amah ang bawka MLA dang 6 te chungah erawh engmah tih an tum leh chuang lo ni awm tak a ni. Assembly House chhunga Pu Duha chetvel danah khan treasury bench lama thute ngaimawh tham alo awm ni ngeiin a rin theih a, kan CM ni lai mek phei chuan a sawi duh ngai miah loh leh sawi a tum leh loh tak ni bawka lang ‘Peace Bonus’ chungchang kha tui lem khalh khalh pahin a sawi nghe nghe a nih kha. 

Nimahsela chutih laiin MLA 12 te thiltih erawh a hriatpui hauh lo thung a, Pu Duha’n show cause notice chhanna a thehluhni khera Press Conference lo neihte pawh khan mahni mawng hlim an nih phah kher awm chuang lo e. Chutianga ban a nih takah chuan Court lama kal tura alo insawi ang loh deuhin Serchhip bial mipuite Court zawkah chinfel a tum ta thung a, chu chuan lehlamte tan ruahmanna dang siam a ngaih phah hial ni te pawhin a hriat ta a. Hqtr. Party Vice President tang lai Pu Vanlalzawma chu Election hnuhnung bera lo tling zo tawh lo mah nisela Serchhip biala Pu Duha khing tura buk rit ber tura ngaih a lo ni lo thei ta lo a ni. Chutih rualin Congress leh PC Party te pawh chuan remchanna lo la vein Serchhip biala an Party Strength hriatna atan leh zoram puma an thawm tih thatna atan Candidate an lo nei ve bawk a. Hei vang hian tun tuma Serchhip By Election neih tur hi a satliah lo hle tih a hriat theih ang. 

 

A VAWTUIN EK A CHEH THEI;

ZPM Party-in kum 2018-a Chief Ministerial Candidate atan meuha an lo vawrh tawh chu kum 2020 ah MNF MLA 12 te chuan ‘a ZPM lutuk’ tiin amah thlang tling tute a phatsan tih ang zawnga Speaker hnena an hek avangin ban a ni ta a. Dan an ngaih pawimawh vang an tih rualin hektu 12 zinga pakhat chu Sangha humhalh lai Bomb chungchanga Rs. 10,000/- chawiin an thil tih dik loh chu a pawm thlap mai bawk a. Amaherawhchu Dan ngai pawimawhtu leh House chhunga an thutpui leh ram rawngbawlnaa an thawhpui pawh Dan an ngaih pawimawh vanga an hek duh hial tawh laiin Sangha Bomb lamah erawh chuan thawm an nei ta lem chuang loin midangin FIR te chu an thehlut ta zawk a. Chutianga Serchhip bialin MLA an neih tak loh avang chuan MLA an neih leh thuai theihna turin By Election neih alo ngai ta a, Dan a bawhchhiain a ZPM lutuk an tih ngei pawh chuan inthlahrung duh tawh bik loin ZPM Party ticket ngeiin MLA nih leh a tum ta a. A tlin hlauh phei chuan a MLA-pui dang 6 te a chhanchhuak tihna a ni bawk ang a, House chhung boruak pawh a hma ai daihin a ngaihnawm zawk ngei bawk ang. 

 KAN SORKAR HRAWN MEK TAN HIAN OPPOSITION THA KAN MAMAWH;

Tun sorkar kan hrawn mekte hian kan rorelna hmun sang ber - Assembly House chhungah hian ram leh hnam mai baka mipuite tana dan pawimawh tak tak zawm tur an relna hmunah hian an duh hawi zawng zawnga phar thluk theih turin ban dinglam phar tur mi 27 an nei sa a. Lehlamin mi 13 chauh an neih avangin an tan thil harsa engmah a awm lo tih theih a ni awm e. US President kal chhuak ta Donald Trump khan Impeachment vawi hnihna a hmachhawnah khan a awmna Party Republican lam atanga amah thlawp lo lama mi 6 an awm ngam anga lehlamte thlawp zawnga ban phar duh tur kan awm ve chiah erawh a rinawm bawk si loh avangin mi 27 te hian eng thu leh hlaah pawh ban an phar a ngai hrim hrim a tih theih ang. Chutianga ban phara hnehtu zawk nih inhre reng chunga ram leh hnam tana thu pawimawh tak tak sawiho a nihna hmunah chuan anmahni khalh ngil tur leh fimkhur theih zawkna atan Opposition tha an pawimawh em em a ni. Tuna kan MLA neih mekte zingah hian House chhunga tlangnel tak tur an tam loh avangin Pu Lalduhoma hi ram leh hnam tan Opposition Bench-a a thut ngei ngei hi a ngai. Party side nei lamin ka sawi hauh lo a, kan ram leh hnam hruaitute lo kal tawhte atanga vawiin thleng hian Opposition tha kan neih leh neih loh kar hi a hla em em a. 

MLA 32 lai nei Congress Sorkar-in kum 2008 atanga sorkarna fawng an chelh atang khan kan hrethei mai awm e. Kum 2014 ah chuan Sorkar-in Zu khap burna dan chu ti danglamin Zu zawrh phalna dan thar – Mizoram Liquor Prohibition and Control Bill 2014 chu July 10, 2014 (Thursday) chuan pass a lo ni leh ta a ni. He dan thar hi Kohhran atang chuan duh lohna a lian hle mai a, nimahsela Sorkar lam atang chuan He Zu zawrh phalna dan hi Mizo thalai ten Zu khap burna dan hnuaiah Zu chhia an in nasa lutuk hi a ziawm phah beiseina an neih vang niin hetih laia Excise and Narcotics Minister chuan a sawi bakah Zu zawrh phalna dan hmang hian Vaibelchhetak 3 vel kumtin chhiah lak luh a beisei thu a sawi bawk a. Excise and Narcotics Minister R. Lalzirliana ngei pawh khan he MLPC Act pass a nih hma kar-ah hian a lawina Presbyterian Kohhran ah ngei Zu zawrh duh lohna lantir nan tawngtai rualna an hman naah tel vein ‘He dan thar hi Pathian duh loh zawng tak a ni chuan Assembly meeting ah pu lut thei lo turin ka tawngtai ve a ni’ tiin a sawi tak naa ama put luh ang ngeia ban phara vote lak a nih hnuin pass chu a ni tho a nih kha.