THIS IS MIZORAM – XVII

Mahmuaka Chhakchhuak March 15, 2021 Mizote Jerusalem – Aizawl khawpui hi kan khawpui ni tura Chunglamin a ruat a ni. Eizawnna leh dam loh hritlan ni khuaahte ngei pawh kan chak lakna ber a nih mai bakah kan hmunpui ber a ni bawk a. Chutiang bawkin Sakhuana lamah pawh kan hmunpui ber a ni lo thei lo bawk a. Sualna kawngah pawh a hmunpui ber a lo nih zel bawk hi maw! Ram hruaitu ber berte lo kal chang apiangin kan kawngpui awmsa hi chei that a ngaih mai bakah Aizawl khawpui a rawn luh hma atanga a chhuahsan leh hma zawng hi kan kawngpui thenkhatahte chuan motor tlan kan han phal lo a, an chhuahsan fel ta maw tihah a ngai te bawkin kan inpel leh suau suau mai bawk te hi a ropui lo ngawt mai. Heti taka ram hruaitu ber berte bum ngai khawpa kan khawpui chhunga kawng alo fel fai lo leh ruahmanna tha zawk kan la hmang thei tlat lo maite hi ngaihtuah chian ngai tak a ni awm e. A nih loh pawhin a nihna ang ang hian anni pawhin rawn hmu ve mai sela. Tlem lai deuha Happiest State a min thlang ngawt leh Best Green State-a Mizoram min han thlang ngawt te kha a chhunga cheng mipuite hian kan pawm meuh lo a nih kha maw. Khatiang anga bumna kan la hmang duh zel a nih chuan kan ram nihna tak tak hi engtikah tak keimahni ngei pawh hian hre thei ang i maw le? Eirute hi kan ngaisang lo mai pawh ni loin kan ram hmelma lian ber a ni kan tih hial bawk laiin Eirute man chhuah tak tak kan la nei tlem bawk si a. Zu kan do a, Zu zuar sorkar tiin Congress sorkar chu hneh takin kan paih thla bawk a ni lawm ni kha. Nimahsela vawiinah chuan Zu zuar Party kan tih zinga a khaipa ber leh Zu zawrh chungchang ngatah phei chuan a changtupa ber chu chawimawina tlangah kan thut tir leh thauh bawk si a. Congress Party ngei pawh chuan tunhnu daihah Zu an zawrh avangin mipui hnenah ngaihdam an dil leh hial a ni awm a. Chutiang bawkin kum 2013-a MIZORAM CHHANCHHUAHNA TOTAL BANDH ti hiala kan auh khum dup dup chu tunah a autute ngei bawk chuan Pangparthi kan awrh tir mai bakah rangkachak pheikhawkte hial kan bun tir leh lawih si a ni lawm ni hei? Eng ber chu nge kan ram hruaitute hian an duh tih pawh mipui tan hi chuan hriat chian hleihtheih pawh a ni meuhin a hriat loh a. Mahni sahmim hnawhpuar theihna tur a nih dawn phawt chuan a chhe ber pawh kan lo pawm duh zel ni berin alang a nih hi. Chuti chung chuan mipui hnenah kut tling loa sum leh pai la lut lo turte, thawhrimna nei turtein leh Rinawmna leh Dikna nunpui tur tein kan sawi ngun leh viau thin bawk si a, mipui lam hian engtin tak lo pawm ang maw le. Hetiang hi a ni lawmni kha kan Pathianthuin ‘mahni mita khanchhuk awm reng si a, midang mita hmawlhte awm ngaimawh’ tia a sawi kha? Tirhkoh Paula’n ‘mi zir tu ni rawh u, keipawh Krista zirtu ka nih ang bawk hian’ a tihte chu thu tha tak mah nisela kan tunlai dinhmunah chuan chhiar kan mai a tha zawk viau lawng maw le. In leh lo ropui tak tak kan nei a, lirthei changkang tak tak kan neih bawk hnuah Kohhran kan han bel leh chat mai bawk te hi ruahman lawkna a ang thin viau a sin. A tu amah kan sawi chhan erawh a ni hauh lo a, hetianga kohhran belte hian chanvo tha an chang duh viau lehnghal a, Necktie sen lar tak an han awrh phei hi chuan Lal Isua aiin kan pathian lo chauh a nih ber thin hi maw! Kohhran rawngbawltu thenkhatte pawh hian kohhran rawngbawlna hi hlawh tel lo chuan an bawl duh der chuang lo a, chutichung chuan an inti sakhaw rawngbawltu em em ang leh lawih bawk si a, Pathian lam ngaihdan thluk lem loh phei chuan kawngsira eichawp zuarte nen hian an ropui dan a intluk reng lawng maw a tih theih hial awm e. Sakhaw rawngbawltu ni chunga Contract thawkte, Kohhran rawngbawltu ni chung renga Minister Office-a an hmel hmuh tur awm rengte hi kohhran mipui tan hian hnemhnanna a awm a ni ngei turah ngai ila, chutiang a nih loh phei chuan a zahthlak viau ngei ang. Chutih lai erawh chuan Kohhran rawngbawltu zingah hian zahawm leh chhuanawm em em an awm reng tho a, anni vang hian kohhran hi a zahawm a, anni vang hian kohhran rawngbawltute hi a hnualsuat vek theih hauh loh thung. Mihring tupawh mai hian hmel mawi lam kan neih ang bawkin hmel mawi lo lam pawh kan nei theuh bawk a, chu kan hmel mawi lo lam chu kan inhmuh mawi sak hram hram a tha thin. Chutih rual erawh chuan insiamthat tumna nei chuang hauh loa mi min sawiselnate chu khinlet zel tum kan awm bawk thinte hi he ram hian a chhiatpui a nih bawk hi. FIR te hi tunhma lamah kha chuan a hlauhawm em em thinin rapthlak te kan ti thin a nih laiin tunah chuan tawngkam thumal pakhat ang lekin kan ngai ta hial awm e. Social media tualah lah chuan a tu ate pawh mai hian inthlahrunna eih pawh nei loin kan duh duh kan han sawi ta mai zel te hi thenkhatte tan chuan ip chawih chawihna tur hi a tam thei ngawtin a rinawm. Heng zawng zawngah hian kan mizo-na hian hmun pawimawh leh lairil a chang ta lo hlein a hriat a, chu erawh thil pawi tak a ni thei awm e. He hnam hian tlakchhiat lam a pan zel chuan kan tu leh fate tan chenna tlak loh a ni thuai ang a, kan chhehvela hnam dang te hian kan Jerusalem ber Aizawl khawpuiah hian hmun lailum an chang mai palh zawk ang tihte pawh hi hlauhawm tak a ni. Ze nghet tak nei chungin ram leh hnam hmangaihna thinlung i nei theuh ila, chu chu kan tu leh fate ro chun zel turah pawh kan ro hlu ber a ni dawn bawk si a.