TUALCHHUNG CHANCHINBU KAN NEIHTE HI

Mahmuaka Chhakchhuak March 23, 2021 Mizo ṭawnga chhiar tur Chanchinbu hi kan nei nual a, nitin Chanchinbute, kartin chhuak chi te leh thlatin chhuakte pawh kan nei hlawm a. A thente hi chuan Advertisement Bill chauh hi a ni lawng maw an chhuah chhan hi ni ang tih theih dawn dawn hian mipuiin kan hre meuh lo a. Chutih laiin thenkhatte erawh rintlak takah ngaiin thupui hlapui vaina atan tak kan hmang bawk a nih hi. Thuziak hi a huaisen a, hmaizah a nei lem loin khawi hmunah pawh timna nei hauh loin a sawi ngai chu a sawi reng mai zel bawk bakah kawltha duh tan pawh a kawl that theih reng bawk avang hian mi fing zawkte hi chuan an ngai hlu em em thin a ni. Chanchinbute hian nitin/ kar tin leh thla kipin chanchinthar mai bakah chanchin ngaihnawm tak tak min hlui thin a, hengte vang hian kan naupan lai atang tawhin chanchinbu chhiar hi ka tuiin vawiin thleng hian ka la bansan thei lo a, chawl loin ka la chhiar ve char char zel a ni. Tunah hian nitin chanchinbu 4 te hi bahlah loin nitin ka chhiar ve zel a, chung chanchinbu bakah chuan kartin chhuak chanchinbu pakhat hi a bi kimin ka la chhiar chho ve zel bawk a. Hengte vang hian khawvel ningkhawng ka lo hriat phah thinin ram chhung chanchin pawimawh chi hrang hrangte ngei pawh kimchang takin ka lo hriat phah mai bakah ka hriat loh thil tam tak ka hriat thar phah thin bawk a ni. Chutianga tlangnel taka nitin leh kartina ka lo chhiar ve thin chanchinbute chu hetiang hian fakselna han nei ta ila: PARTY SIDE LANG LEH LANG LO: Kan chanchinbu neih thenkhatte hi chu a neitute awmna Party hriat tak te hi a ni hlawm a, hetianga Party side nei taka chanchinbu an tihchhuah thinte hian chanchinbu hlutna a tihniam thei thinin a hriat. Chanchinbu pakhat chu chik takin ka lo thlir reng thin a, tute Party chanchin emaw hi chu tarlang uar bik deuhin a hriat a, chutih rualin tute Party emaw hi chu tarlang uar lo deuh em ni tih hriat turin an tarlang uar lo deuh niin ka lo hre thin. Nimahsela keini lo sawisel phak erawh a ni hauh lo nain a chhiartu mipui thinlung lamah chuan ngaih khata neih mai a awl maithei niin a hriat a. Hetianga side lam hriat tak chanchinbu hi chuan ngaihhlut ala hlawh lo thuai te a hlauhawm maithei. An awmna Party tan erawh a tha em em thung ang a, an hlawkpuiiin an tangkaipui ngei pawh a rinawm. Hetiang a nih vang hian keichuan chanchinbu atan chuan side lang lo thei ang bera chanchinbu an buatsaih thin hi ka duhsak zawk a, nakin hnu zel atan pawh chanchinbu ngei chuan ngaihhlut a hlawh chhoh zel ka duh a ni. Party pualin Chanchinbu an chhuahte hi chu a awmin hetiang law law chu sawi a ngai loah ngai ta zawk ila, mitin huap chanchinbu atan hi chuan a neitu rilru puthmang leh ngaihdante Editorial-a an ziak hi chu a pawi miah loh laiin lang lutuka chanchinbu chhuak thin hi erawh chu mipui lamin kan hlut loh mai te hi a hlauhawm ka ti deuh. TUNLAI MILA CHET: Social media-in kan nunah thuk taka hmun a chan tawh avang hian chanchinbu kan neih ang angte ngei pawh hi a hlutna tlahniama ngai an awm maithei a, kei erawh chuan ka la dah sang larh tho. Chutih rual erawh chuan chanchinbu ngei pawhin kan kalphung ngai renga kal alo rem loin tunlai mil thei zawk tura kalphung thlak hret hret thin pawh alo ngai maithei bawk a. Social media lama thu pawimawh leh mipui tana bengvarthlak tak tur thu (mimal thil lutuk a nih lem loh chuan) chhuah ve thin te, Aizawl khawpuia chengte chauh ni loa thingtlang hmun kilkhawr tak takte tan pawha chhiar nuam tur thu ziah thinte leh kan nitin khawsakna atana tangkai leh tul lam hawi thu ziah zauh zauh thinte leh tunhma, hun hmasa lam daih tawha kan hrang hluite chanchin ziah zauh zauhte hi mipui kan in ang vek lo bawka mamawh leh chhiar chak kan awm thei. Hetiang a nih vang hian chanchinbu buatsaihtute lam hian hetiang lam hawi ziak thei tura an rinte chu ziak turin sawm thin sela emaw an huangte hi siam sak thin sela chanchinbu hlutna a kiam phah kherin a rinawm loh. A bik takin ram leh hnam inrelbawlna Politics lam hawi phei hi chu kan hriat dan alo in ang tawh lo nuaih maithei a, lehkhabu-a ziaktute ngei pawh hian an hriat dan (ziak dan) a lo in ang lo palh theih bawk thin avangin a bik taka ziaktu tur awm hi kan bengvar phah zawk maithei a ni. Pathianthu lam hawi erawh hi chu inhnialna tawp maithei lo chi te pawh a nihna a awm zawk laiin History lam hi chu Lasi thawnthu ang ngawta ngaih theih loh turin thui tak tak thlengin a chhui theihin a sawi theih thin a, chungte chu topic mumal deuh tak neia chhiar tur awm hi a bik takin thangthar zawkte phei hi chuan kan chhawr tangkai ngei te a rinawm bawk. Heng bakah hian chanchinbu thlen phak lohna hmuna awmte tan leh mahni Cell Phone hmanga chhiar duh zawkte tana Pdf (Portable Document Format) hmanga inpek mai thin hi thil tih chi tak a ni. Chutih rual erawh chuan chanchinbuin tawrh theih bawk avangin fimkhur a tha bawk ang. Tunah hian chanchinbu pathum chu nitin Pdf hmangin ka dawng thin a, zing thawh hlima chhiar tur lo awm hi a lawmawm thin hle. Hmundangah erawh ka pechhuak ngai lo a, uluk takin Computerah ka vawng tha leh thlap bawk thin a ni. A size a lian lem lo bawkin en let leh duh hunah pawh haichhuah leh mai a lo harsa lo bawk a, thil tihchi tak niin ka hria a, lirtheia chuan laite leh khualkhaw zinna hmun atang tea nitin chhuak chanchinbu thar han chhiar phei hi chuan nuam ve duh tak a ni.