Bill inchiah rei – The Mizoram Maintenance of Household Registers Bill - 2019

Mahmuaka Chhakchhuak April 4, 2021 Kum 2019 March 12 – 20-a Assembly Session neihah khan Mizoram State chhunga hman turin Bill pawimawh tak tak 10 lai Pass thar a ni a, chung zingah chuan pakuate chu hman a ni tawhin pakhat erawh chu vawiin thlenga la hman loh a ni a, a chhan bera sawi chu President of India hnen atanga pawmpuina nghah mek a ni tih chu a ni. Chung Bill pawimawh tak takte chu hetiang hian a mal malin han sawizau ta ila: THE MIZORAM MAINTENANCE OF HOUSEHOLD REGISTERS BILL: He bill awmzia chu Mizorama chhungkaw awm zawng zawngte chu member-te hming, nihna leh thlalak thuneitute hnenah chhinchhiah tura thehluh vek turin a duang a. General Administration Department (GAD) hmalakna niin bill hi House-ah Chief Minister Zoramthanga’n a pharh a, a pharh chhan chu Mizorama ram dang mi dan lo va khawsate’n nasa taka tualchhuakte chanvo an ei hek vang niin a sawi a, tunhnaia Assam-a lar em em National Register of Citizens (NRC) ang deuha kalpui tura ngaih a ni. THE MIZORAM LIQUOR (PROHIBITION) BILL: Hei hi chu Mizorama zu lak luh, Mizoram atanga zu thawnchhuah, phurh, siam, kawl, hralh leh in khapin, he dan hian Mara, Lai leh Chakma Autonomous District Council erawh a huam lo thung. Excise and Narcotics Minister Dr. K Beichhua chuan he bill House-a a pharh rualin sorkar chuan mipui vantlang hriselna leh dan leh venhimna kenkawh chungchangah tul a tih vangin zu a khap niin a sawi a. He dan avang hian Mizoram chuan kumtin a hmuh tur cheng nuai 7,000 bawr vel a hmuh loh tur thu a sawi bawk. THE MIZORAM ANATOMY BILL: Hei hi a awmzia chu mitthi, a chhungte’n hun bithliah chhunga a ruang an lak mai loh te chu ZMC (MIMER)-a zirlaite’n an zai chhin atana lak a phal a. ZMC-a zirlai lut thar 100-te’n kumtin zirna kaihhnawihah ruang 10 an mamawh dawn rualin, ruang pariat tal a awm ngei ngei a ngai dawn niin Health Minister Dr. R. Lalthangliana chuan House a hriattir. He dan hi Ministry hmasain 2018 September thla khan ordinance hmangin a lo keng kawh tawh. THE MIZORAM STATE LEGISLATURE MEMBERS (REMOVAL OF DISQUALIFICATION) (AMENDMENT) BILL: Hei chuan dan ding laiah belh neiin, MLA te chu sorkar laipui emaw state sorkar emaw din Board emaw committee-ah emaw Chairman, Vice-Chairman leh Deputy Chairman leh member hna chelh a phalsakin heng hna an chelh avang hian Assembly atanga paih theih an ni lo vang a ti. THE MIZORAM ESSENTIAL SERVICES MAINTENANCE (AMENDMENT) BILL: Hei chuan ei bar zawnna eng emaw zat, duh duha hnathawkte’n nawrh an huaihawt ngawt theih loh zingah thlawhna tumhmuna bungraw buaipui hna leh thlawhna enkawl hna a dah a. He dan hi Ministry hmasa chuan ordinance hmangin December 6, 2018 khan danah a lo siam tawh a ni. THE MIZORAM FOREST ACT (AMENDMENT) BILL: Hei hi chu thingkung anga ngaih tur chi hrang hrang atangin mau (bamboo) a paih a. He dan hi sorkar laipuiin November 2017-a ramchhung huap dan a tihdanglamna zulzui niin, sorkar laipui leh state sorkar te’n hetianga mau an pawm dan an tih danglam tak avang hian thingkung pangngai angin mau kih leh phurh sawn dawnah phalna lak kher a ngai tawh lo vang. THE MIZORAM MOTOR VEHICLES (TAXATION) (AMENDMENT) BILL: He bill avang hian vawilehkhata lirthei thar tan lifetime tax pek a tul tawh dawn lo va. He amendment bill hian kum 2011-a dan siam chu siamthain, inhlawh chi ni lo lirthei neitute chuan tax hi kum 5, kum 10 emaw kum 15 emaw chhung atan an duh angin an pe thei dawn a ni. Instalment khata pek nghal dawn chuan kum 15 a daih ang a, lirthei man zaa paruk tluk a ni ang a. Installment hniha pek chuan lirthei man zaa 4.2 niin kum 10 daih a ni ang a, a bak lirthei man zaa 2.2 chu a hnuah pek leh tho a ngai ang. Tin, installment pathuma pe duh chuan vawikhatah lirthei man zaa 2.2 an pe phawt ang a, a hnuah tum hnihin a bak an pe leh ang. THE INDIAN STAMP (MIZORAM AMENDMENT) BILL: Hei chuan dan awmsa hmun eng emaw zatah a thlak danglam a. A hmasa berah chuan, ram kaihhnawih lehkha pawimawhah non-judicial stamp hman ziah ngai tihtawp nan khawl chi khat “franking machine” hman a phal a, hei hian mipui tan heng lehkhate buaipui a tih awlsam zawk beisei a ni. Tin, ram hlut zawng bithliahtu chairman atan Revenue Director ni loin Revenue Secretary zawk a dah thar a. Tin, chhungkaw member-te ram inpekah a hminga sum chawi ve a ngai tawh bawk ang. THE REGISTRATION (MIZORAM AMENDMENT) BILL: Hei hian kum 1908-a dan siam hmun engemawzatah siamremin, sorkar lehkha pawimawhte kalpui dan chi hrang hrang a ti danglam. THE MIZORAM GOODS AND SERVICES TAX (AMENDMENT) BILL: He Bill chuan Goods and Services Tax-in chhiah lak dan dang a thlak vek avangin chutiang taka kalpui a nih theih dan chhiah lak dan chi dang Mizorama awm te a thlak danglam a. He dan siam rem hian GST chhiah lak dan a ti awlsam zawka ngaih a ni. Heng zingah hian ‘The Mizoram Maintenance of Household Registers Bill, 2019’ erawh vawiin thlenga la hman loh a nih chhan hi enge ni ang tiin kan inzawt mek a ni ber mai. Kumin Feb. 26 khan Bill pu luttu Chief Minister chuan zawhna ziakin a chhannaa alan dan chuan ‘The Mizoram Maintenance Household Registration Bill, 2019 hi hman theih turin sorkarin a bawhzui mek zel a, India President pawmpuina nghah mek a ni’ tih a ni a. He Bill chungchang hi Feb. 23 Session tannia Larsap thusawi chungchanga lawmthu sawina motion lut sawihonaah eptu group Leader Vanlalhlana chuan sawi chhuakin, Bill chu thil tha tak angin alang nain Larsap-in a pawm duh miah lo chu mak a tih thu sawiin Larsap leh sorkar inkarah thil thup a awm hial a nih a rin thu a sawi nghe nghe a nih kha. Pu Hlana hian a sawi zel dan chuan kum 2018 inthlan dawn a election manifesto-ah khan village level citizen register tih hi MNF Party manifesto-ah a chuang a, sorkarna an chang a, House ah ngei pawh House Leader-in Bill a pu lutin kan pass a. Thu tisaa chang turin Governor-in a assent a ngai a, nimahsela Governor chuan alo ngawihbopui ta a ni, a ti. Dan kan en chuan Governor hian thil tih theih pali a nei a, Assent a pe thei a, assent a pe lo thei bawk a, President hnenah a thawn thei a, kha bill pass-a kha House-ah a rawn thawn kir thei bawk a. Keima ngaiha a chhe ber – Assent withhold chu a kalpui ta a, vawiin thlengin a chinchang kan hre ta lo a, MNF te’n citizen-te registration siama Mizote security siam a tumna chu a fail ta a ni a ti bawk. Heng bakah hian Assembly Speaker chuan he Bill hi Larsap in President pawmpui turin a thawn tawh niin a sawi a, President pawmpuina nghah mek a nih thu a sawi bawk. He lam atanga kan tih tur chu kan ti zo tawh a, Delhi tlang lam kut a ni tawh a ti a ni. He bill hi pass a nih hnuah chuan kan ramah hian ram dang atanga rawn lutte kan chhuichhuah zung zung theihna tur hmanraw pawimawh tak a ni dawn a, VC, Local Council leh sorkarin Authority hmantlaka a ngaihte enpuina hnuaiah hman a ni ang a, Mizorama chhungkaw awm zawng zawngte chu member-te hming, nihna leh thlalak thuneitute hnenah chhinchhiah tura thehlut vek tura duan a ni. Hetianga thil pawimawh tak a nih laia tuna President kuta tang ta reng hi ngaihthat tur nge ngaihthat loh tur zawk ni ang tih pawh hi ngaihtuah tham tak a ni awm e. Mizorama ram dang mi dan lo va khawsate’n nasa taka tualchhuakte chanvo an ei hek vang nia sawi hi Mizoram mipuite tana a pawimawhna ber pawh a ni awm e. Hetianga Governor berin a thawn thlak thu a sawi a, a reh tak vang vang siah chuan ngaih a tha thei chiah chuang lo a, State sorkar atang pawh hian a ngaihven dan a awm lo nge, NGO lam ngaihven ngai chi zawk tih phei chu ka hrethiam hauh lo nain President of India hian a remti lo zawk em ni ang tih chu ngaihdan lian zawk pawh a ni thei ta hial mai.