COVID VANGA THIHNA HI THLENG LUL TAWH LO SE LA AW!

Mahmuaka Chhakchhuak April 13, 2021 VAWIIN THLENGA COVID VANGA MIZORAM CHHUNGA NUNNA CHAN TAWHTE: Lalsangkhuma 66, Dawrpui; Thih hun Oct. 28 2020 Darhawni 78, Durtlang Leitan; Thih hun Nov. 5, 2020 C. Lalthanga 70, Dinthar Aizawl; Thih hun Nov. 13, 2020 Lalnuntluanga 34, Durtlang; Thih hun Nov. 14, 2020 Rengchhuana 74, Seling; Thih hun Nov. 16, 2020 R. Hrangthanga 40 Thenzawl; Thih hun Nov. 23, 2020 Lalbiakenga 41, Falkland veng; Thih hun Dec. 1, 2020 MK Roy 83, Durtlang North; Thih hun Dec. 11, 2020 Lakhi Dhan Chakma 57, Silsury; Thih hun Jan. 10, 2021 T. Pazawna 82, Ramhlun North; Thih hun Feb. 15, 2021 11. Ratna Gurung 54, Venghlui; Thih hun March 17, 2021 12. R. Lalmuanzova 34, Kanaan veng; Thih hun Aizawl April 12, 2021 A BUL ṬANNA LAM KHA: China chuan he Hripui (Coronavirus - Covid-19 tia vuah tâk) hi Dec. 31, 2019 atang khan Wuhan khawpuiah a lêng ţan tih WHO-ah a report a. He Hri hi an control theih meuh chuan Chinaah chuan mi 81,439-ten an lo kai hmanin mi 3,295 lai te chuan an lo thihpui hman a. Tunah phei chuan rambung hrang 219 aia tamah he hri hian nunphung a ti danglam ta hial a, chutiang bawkin Mizoramah ngei pawh March 21 (Inrinni) atangin kan buai tan a, Sorkar lamin zanah thuchhuah neiin atuk, Pathianni chu Kohhran inkhawm nei lo turin a khap nghal a nih kha. Khawlaiah Police leh Task Force te duty nghalin veivak pawh an awm meuh lo a, Aizawl khawpui pawh a reh duk a, motor tlan hmuh tur pawh a awm meuh lo. He mi atang hian mipui tan pawn chhuah khap a ni a, uluk taka kan inveng chung chuan rin loh lam tangin March 25 alo thleng chuan Foreign atanga Mizorama rawn hawng mi pakhat chu positive a nih thu puan chhuah a ni ta thut mai a, kan hlauh em em hri hlauhawm tak chuan min luh chilh ta tih kan hriat meuh chuan mitin kan chi-ai a, mahni Inah kan tawmim lehzual sauh a. Sorkar laipui lam pawhin mut mawh hnar mawhah neiin he Hripui CoviD avang hian March 24, 2020 zân khân India Prime Minister ngeiin ram pumah “Complete Lockdown for 21 Days” a puang ta rup mai a nih kha. Hri kai belh kan neih loh vang vang hnuah June 1, 2020 zinga Delhi leh Kalkatta atanga kan unau rawn haw te atanga mi 12 lai maiin hripui an kai tih kan han hriat kha chuan min thawng hle a. Hri kai chungchangah hian sawi hmaih theih miah loh chu Netherland atanga rawn haw kan sakhaw puithiam kha a ni. A ni kha March 24 ah a positive tih hmuhchhuah a ni a, rei ang reng tak Damdawiinah enkawl a ni a, a thih leh dam kha nitinin kan ngaihven a ni ber a. Pathian zarah dam tha takin May 9 ah damdawiin atangin a chhuak leh thei ta hlauh mai a, zofa zawng zawngin lawm avangin kut kan beng hial a nih kha. Dama a chhuah hnuah thawm a reh vang vanga, thla khat dawn lai a reh hnuah June thla kan chuangkai a, heti hian nitin hripui vei thar kan hmuh belh ta zel ang chu a nih hi. COVID VANGA LUSUN HREHAWM CHU: October thla alo thlen meuh chuan CoviD hripui vanga thihna kan lo tawng ve tain Pu Lalsangkhuma (kum 66) Dawrpui a awm chuan Oct. 28, 2020 chhun dar 12;00 ah vanduaithlak takin ZMC a ICU hmuna enkawl lai chuan min lo boral san hlauh mai. Amah hi natna benvawn nei sa nia sawi a ni a, hetih lai hian CoviD vanga enkawl lai mi 373 kan nei mek bawk. Pu Lalsangkhuma hi sorkarin SOP a duan anga vuina hun hman a ni a, Damdawi In atangin Thlanmual lamah a ruang phurh tlang a ni a, a kar lakah chawlh hman a ni lo lehnghal! A nupui, he natna avang thoa inkhunghrang mek chuan remruattu fel takte zarah invenna thuam famkim ha chungin thlanmualah, kuang inchhin phui tlat chu a tah khum thei hram a, a hmutute tan insum a har a, mittui a kochhuak hnem hle a nih kha. Zofate hian kan sawi bang ngai tawh lo ang a, vawiin thleng hian hrehawm ti tak chungin kan la sawi zel a nih hi. Hetiang bawk hian CoviD vanga nunna chan pahnihna Darhawni (Kum 78), Durtlang Leitan a chengin Nov. 5, 2020-a min lo boralsan leh pawh chuan ZMC atangin Ina luhpui a ni loin zing dar 8 ah Durtlang Leitan LC Court ah vuina hun hman a ni. Midang chu sawi zel tawh lo mai ila, hetiang hian CoviD vanga nunna chan hmasate kha khawhar takin kan lo thlahliam a, an chhung leh khatte tan ngat phei chuan hetia sawi mai ai hian a hrehawm zawk ngei ang. A vanduaithlak lehzual a, an lainatawm takzet a ni. Vawiinah hian hetianga vui ngai hi awm belh tawh lo hram ila a va duhawm em. Kan mizo nunphung nen in millo takin thihna meuhah pawh inhnem hleithei loin kan awm a, mipui nawlpui len hun piah lam, mi reh lai, zingkarahte ngei pawh len luh alo nuam chiah lo lehzel bawk nen hian a tuartu tan pachan a ngai lehzual dawn si. Hetianga inthlah liam ngai tur hian thleng tawh lo hram sela, lusun a nih pawhin pangngai taka invui theih tur te hian boruak hi thawveng tawh hram sela a va duhawm em. Dik taka sawi phei chuan a tuartute tan ngei pawh hian phak ang tawk tawka invuina hun hman theih te hi thil chakawm tak tur a ni a, kohhran lam leh khawtlang hruaitute tan ngei pawh vuina hunserh pangngai taka neih te pawh a chakawm bawk ngei ang. Hawh u, tawngtaina kan neih piah lamah hian kan theih tawkin fimkhur ila, sorkar lamin dan leh dun a siamte tha taka zawmin thenawm khawvengah leh pawn lamahte pawh tualchai tlem deuh zawk ila, rilru leh taksa dam taka kan awm tlan vek theihna turin mahni Inah i tawmim hram hram zel bawk ang u. CoviD vanga thihna hi thleng lul tawh lo sela aw!