DAN NGAI PAWIMAWH TUTE THILTIH

Mahmuaka Chhakchhuak April 28, 2021 Harhna chi hrang hrang kan tawngin kan hmachhawn mek zel a, chung harhnate chuan a tha zawng leh a chhe zawngtein min chenchilh thar ta thin a nih hi. Kum tam tak kal liam tawha ‘Isua hi lo ring ve tawh rawh u’ tih tawngkam ringawta harhna lo thleng an sawi te kha chuan hnuhma tha tak a nei ni awm tak a nih laiin tunlaia kan harhna dawn erawh chuan sawi sep a kai ta thung ni awm tak a ni hei. Assembly House chhung atang ngeiin harhna danglam tak kan chang a, ni danga la tih ngai reng reng lohin sakhaw puithiam kaihhruaina meuhin tawngtai rualna neih a ni a, mipui lam chuan beiseina sang tak kan lo nei a nih kha. Nimahsela chu tawngtai rualna rah chu a ni e tih erawh a tih theih hauh lo nain a rah chhuah kan hmuh ropui ber chu dan ngaih pawimawh vanga tawngtai rualna hmun thlenga an thutpui lai reng, an memberpui pakhat chunga hekna thleng ta chu a ni. Treasury bench lam atanga hekna thehluh a nih tlat avangin mi pakhat chauh pawhin hekna kha thehlut ta sela a hlawhtlin loh a rinawm loh tehlul nen Zirtir zat lawihin hekna an han thlen ta kha a ni a, a hlawhtling chiang teh e. Heti a nih chuan dan ngaih pawimawhna lamah kan harhna hian a bul tanna a sang ang bawkin a hnu leh zelah pawh ngaih pawimawh a hlawh dawn viau mai tura kan lo rin khauh khauh laiin dan ngai pawimawhtute zinga pakhat chuan FIR pahnih thehluh ngai khawpin khawtlang humhalh lai sangha bomb tute zingah a telve nia sawi a ni a, Zirtir 12 zinga Juda Iskariota ang deuhin mi famkim vek chu an ni bik hauh lo mai kan ti a nih kha. Famkim loh theuh theuhah pawh hian tum nei sa rana midang chunga dan ngaih pawimawhna chu a lian viau ni bawkin a hriat a, thuthlukna kengtu tan pawha lu hai map mapna tham ni ngeiin a hriat bawk a ni. Mipui lam atang lahin tan a hnehin sawiseltu an tam ang reng phian mai ta si a, Speaker hnena insawifiahna thehluhni ah ngei pawh Press Conference neih a ngaih mai bakah By Election neihna hmun thleng thleng pawh chuan kan dan ngai pawimawh tute lam chuan an la sawifiah ta zel a nih kha. Mipui lamin an hriat loh a hlauhawm bawk em a tin ni. Hetianga harhna kan dawng ta hi thil lawmawm tak nia a lan laiin mi pakhat chungah chauh dan an ngaih pawimawhna hi lantir loin midang, amah ang bawka colour tak leh danglamna awm hauh lo tur mi 6 te chungah pawh hian dan an ngaih pawimawhna hi lantir ta ni bawk sela he harhna hi a famkim awm mange a tih theih laiin an ni erawh chuan tul an lo ti kher lo pawh a ni thei bawk a, chutih mek laiin midang 6 te ngei pawh chuan ban huam takin zawlbuka e tang theuh theuh an lo ti bik ta chiah bawk si lo nen chuan kan lo heti zo ta a nih hi. Hetiang neuh neuh ngaihtuah chuan Rev. C. Lalhmingthanga tawngkam takin ‘a mak lutuk a, a mak leh lo’ a tih hi ka hriatchhuah phah a, a mak dawn viau a, a mak leh lo tih mai ve tur ni awm tak a ni. Dan ngai pawimawhtute reng reng pawh chuan mi pakhat chungah chiah an dan ngaih pawimawhna chu an ti lang reng reng bawk hi a chhan tak zuk hre lem lo mah ila ngaihbel deuh reuh chuan a hriat theih tho ni tea sawi an awm bawk a. Party ang chauh pawh niloa a hnam anga chawimawi tlak khawp hian kan dan ngai pawimawhtute hian thiltha an ti zel dawn nia beiseina lian tak kan neih mek laiin nimin lawkah Lunglei ram kang thelh tura Indian Air Force (IAF) Helicopter rawn kal chu Kawmzawl Helipad-a a rawn thleng hlim hlawl laiin an member thenkhatte chuan hmanhmawh takin thla an lo lakpui a, thlalakpui hi a pawimawh viau ni tur a ni. IAF Helicopter hi an la hmu ngai lo em ni ti dawn ila a rinawm chiah si loh a, heti taka thlalakpui tuma hmanhmawh ta chiam nge an nih ang tih hi hriat chakawm tak a ni. Tleirawl hawklak deuhte chuan thla lo lakpui ta mai mai pawh nisela an ninhlei mange tih mai mai tur a nih laiin anni dan ngaih pawimawh vanga an memberpui hek duhtute meuhin thlalakpui tuma hmanhmawh taka an han ding tlar ta hi chu an nihna nen a inhmeh hlawl loh mai bakah mipui chunga leng tan phei chuan zahthlak tak a ni thei ang. Nuih liam mai mai ka tum laiin an ni, mi sawm leh pahnih bikte ngat hi chu mi zawng zawng chunga leng tur leh mi zawng zawng entawn tur khawpa dan ngai pawimawhtute an nih tlat si avangin an chevel hian mit ala bik lo thei lo si a. Kang mei chauh kan tuar lo a, tui harsatnain zoram hmun hrang hrang min tuam mek bawkin kan ran vulh ber vawk lam lah hrileng vangin an thi mek bawk a, hmun thenkhatah lah chinghniain kan ran vulh alo seh hlum bawkin chhiatna chi hrang hrangin min tuam mek a ni a. Kan hripui leng CoviD lah chuan rem lam pan bik hauh loin zual lam a pan zawk emaw ni tih turin nikhata hri kai thar kan hmuhchhuah te lah chu a tam viau zel mai bawk a, hetiang karahte hian ram hruaitu kan neihte zinga dan ngai pawimawhtute ngat hi chuan langsar taka zoram mipui min thlamuan theih ngei pawh beisei ila a awm hliah hliah a ni. Anmahni lamin langsar lo takin thil ti ah inngai mahsela mipui lamin kan dah langsar tawh tho tho si a, social media lama an thil tih apiang vawrhdarh chak tak tak hi kutchang thleh nghauh nghauh tham an awm hialin a rinawm a. Ram hruaitu, mipui thlanchhuah kan neih tawh zawng zawngte ai pawhin anni bik ngat hi chu thangtharte ngat hi chuan kan dah langsar lo thei si loh avang hian tuna kang thelh tura Helicopter rawn thleng hlimhlawl thla an lo lakpui pawh hi sawi ta hluai mai chauh kan ni e.