FISH FESTIVAL CHU HUAIHAWT CHIAH ILA

Mahmuaka Chhakchhuak March 29, 2021 Tukin Aizawl Post chanchinbu ka chhiar chuan Kolasib Journalist hoin Tuipui D hmuna Khawtlangin Sangha an humhalhna hmun an tlawh thu alo langin, Lunglei District Fisheries Officer te nena tangruala Fish Festival huaihawt an la tum thute kan hmu bawk a. Hei hi thil phurawm tak a nih mai bakah ruahmanna tha tak nena huaihawt chuan khawtlang tan pawha hlawhthlak tak tur ni dawn tein a hriat a. Festival phuahchawp tak tak kan buatsaih thinte nena khaikhin phei chuan mi zawng zawngin kan ngaih hlut tur tak ni te pawhin a hriat bawk. Hman deuh tawhah khan Hnahlan khuaah Grep Festival huaihawt a ni tawh a, hei a kum zawnin Anthurium Festival phei chu kan la buatsaih chho zel bawk a. Kan pi leh pute hunlai atang tawha kan Kut neih sa; Chapchar Kut, Pawl Kut leh Mim Kut bakah hian Kut neuh neuh chu kan neih belh ta zel bawk a nih hi. Hetianga kan Kut neih leh hman thinte hi a tha lo e chu ka ti hauh lo nain a hnu leh zela zawngchhang tlak tak tur leh sim vang vang zawk tur te pawh hi kan hrethiam deuh tawh ngei chuan a rinawm a, tuna Fish Festival erawh zawngchhang chi tak tur zingah a tel ngei a rinawm. Tuipui D khawtlangte hian kum 2002 atang daih tawh khan Sangha humhalh hi khawtlang huapin an lo buaipui tawh a, tunah hian chung an humhalh zinga sangha thenkhat phei chu Kgs. 10 te an tling tawh ni awm tak a ni. A ruka man tumte pawh an awm zauh zauh bawk thin avangin chhun leh zan chawl loin an veng reng a. Marboat kaiah ngat te phei hi chuan Sangha hmuhnawm tham an awmin mit an la thei hle thin a, a hmuhnawm thei hle. Tuna hetianga Fisheries Department lam nena tangkawpa Fish Festival buatsaih an tum thu an sawi hi thil phurawm tak niin a hriat a, anni inbuatsaih dan hi ka hre hauh lo nain awmhmun atangin hetiang hian ngaihdan lo sawi ve teh ang; SANGHA MAN HUN SIAM NISE: Chutia Fish Festival huaihawt a nih dawn takah chuan Mizorama Fish Festival vawikhatna a nih dawn mai bakah a phurawm dawn bawk em avangin khualkhua atang leh hmun hla tak tak atangin Festival hmanga kal tur mi an rawn kal thahnem ngei turah ngai ila a sual awm lo e. Sangha man hun hi thla khat chhung emaw buatsaih nisela, khualkhua atanga rawn kalte leh a thlengtu khawtlang tan pawha harsatna a awm lohna atan hun rei lutuk buatsaih chu a chi loh maithei a. Sangha man tura nghakuai chiah hi thil nuam tak tur a nih avangin a hmasa ber Ni (day) phei hi chuan darkar khat chhunga nghakuai chiah man hi Rs. 500/- emaw te ti ila, darkar khat chhunga sangha pakhat an man chuan a dang man theih tawh loh tih pawh a tha viau ang. Nghakuai chiah hmasak ber Ni-ah hian mi tam takin an chiah dawn avangin Sangha ngei pawh chuan an tit phah ngei turah ngai ila, a Ni hnihnaah phei chuan man alo har phah sawt tawh maithei. Chuvangin mipui tana thanat lohna tur ang tawka a rate siam danglam lawk pawh thil tih chi tak a ni ngei ang. A BEHBAWM HLAWKNA: Tuipui D hi Tuipui Daizokai tihna a ni a, Hnahthial District chhunga awm a niin Lunglei atanga 22 Kms leka hlaa awm a ni. Serchhip atangin 44 Kms a ni bawk a, Aizawl atangin 101 Kms a ni bawk. Hnahthial atang phei chuan 3 Kms lek a ni tawh a. Kum 2011 Census ah khan In 177 awmin 840 mihring cheng anga chhinchhiah a ni a, tunah erawh chuan mihring cheng hi Sangkhat an kai tawh maithei le. Khaw lian lem lo tak a nih vang hian mikhual thahnemtham tak thleng turin khawtlang inbuatsaihna tha tak neih a ngai ngei ang a. Mizoram chhung hmun hrang hrang atanga mikhual an rawn kal dawn avangin thlenna tur leh ei leh in tur an mamawh ngei dawn avangin a thlengtu khawtlangin lo inbuatsaih lawk a ngai dawn a ni. An thlenna leh ei leh in lam chauh a ni lo a, an mamawh ngei ngei tur Sangha manna hmanraw pawimawh ber Nghakuaite phei chu engemawzat lei mai theih tura lo inrin lawk a that mai bawk bakah security lam te pawh uluk taka ruahmanna neih lawk a tha ngei bawk ang. Hnahthial atang pawha a hlat loh avangin Hnahthial IB leh mikhual riahna tur awmsate chu harsa lo takin a khat mai turah ngai ila, khawtlang anga mikhual thlenna tur buatsaih lawk a ngai ngei turah ila. Riah man tlawm te tea buatsaih nisela, an ei leh in turte pawh serve theih vek ni bawk sela, khawtlangin sum leh pai tam tak a hailuh phah theih dawn a ni. SANGHA MAN THEIH NI TAK TUR HI: Chutia Sangha man theih tura khawtlang leh Department lamin ruahmanna tha tak a siam hnuah chuan Sangha man turin mikhual engemawzat chuan nghakuai nen an inring thap tawh ang a, Marboat atangin Aurinna (Loud Speaker) hmangin ‘tunah number 1 atanga number 10 thlengin nghakuai an lo chiah ang’ tiin phur tak maiin han puang bawk sela, darkar khat chiah hun an neih bawk avangin anni chuan phur takin nghakuai an chiah ang a, an hunbi a liam dawn hnaihah number 11 atanga 20 thlengte chu lo inring turin an hming nen an han puang leh dum dum bawk ang a, thil hlimawm tak a ni bawk dawn a ni. Sangha mantu apiangte hi an hming nen uluk taka chhinchhiah ni vek bawk sela, a khat tawkin Mike atangin han puang zauh zauh thin bawk sela a nuam duh viauin a rinawm. Sangha hi ei chak vanga man aiin nghakuai chiah chak vang zawnga man tum hi an thahnem zawk ngeiin a rinawm avangin a dawngsawngtu lam tan pawh boruak nuam tak siam thiam a pawimawh ngei bawk ang a, man theih Ni hmasa berah phei hi chuan Khualliante pawh neiin zaithiamte nena a hawnna (Inauguration day) hunte pawh buatsaih a sual lo viau bawkin a rinawm. NImahsela Politician tute emaw chuan khuallian nih an lo inbeisei leh ngei dawn avangin Tuipui D khawtlang hruaitu lam emaw khawtlang ti hmingthatu emaw Hnahthial tlangval Jeje-a te pawh hmang daih ila mipui ngaihhlut an hlawh zawk maithei e.