KA THINRIM NILENG !

Mahmuaka Chhakchhuak 

April 3, 2021 

 Ka ṭhianpa nen Serchhip aṭanga Lungleia hawng phei mai tur chu Hnahthial lamah kual ila kan ti a, zing chaw eikham dar 9;00 velah Serchhip chhuahsanin Keiṭum lamah kan kal a, Hnathialah thingpui no hnih zet inin kan chawlh hahdam hnuah unau hmelhai velah hian Lunglei kan thleng leh a. Ṭhian dun chauha chuang kan ni nain kan ṭawng tlem dun hle mai a, a bikin kei phei chu ka ṭawng tlem lehzual chhan hi ka thinrim vang a ni a, ka thinrim chhan pawh thil dang niloin tlan paha vah loh ram kang ka hmuh hnem vang chu a ni ber mai. Kan pi leh pute hunlai aṭang tawha thingtlang lo neih kan chhawm a, kumtina lo ka vat a, kan hal a, a kum leha hmun dang kan vat leh ta zel ṭhin hi ka sawisel hauh lo nain vawiin ang hun thlenga lo vah loh kang duai duai ṭhin erawh hi chu lawm taka pai daih mai harsa ka ti tlat thung si a. Kum 20 kal tawha Serchhip leh Keiṭum inkar kawngkama thing buk ṭha tak tak awm thinte kha hmuh tur a vang tawh hle mai a, a piah lawka ram ngaw ṭha pui puite ngei pawh alo chereu zo ta bawk a, sava hram hriattur a awm tawh ngai lo bawk te chuan ka thin a ti rim zual a, a khawharthlak ngawih ngawih a ni. 

Ni a sa em em a, thlantui a luang zawih zawih reng a, kawngkam thinghlim chawlh chakawm tak tak tur a awm ta lo hi a huatthlalaawm hle a, hetiang zawnga kan kal zel a nih phei chuan Zoram hian Thlaler ram nun hi kan tawng chho zel ang a, kum rei loteah hian He ram hi Thlaler ramah kan la chantir lo ang tih pawh a sawi theih loh a nih hi. Tuipang thlenga Double Road tura kawngpui laih mek chu kawng tluanin an hnathawh kan hmu zel bawkin hnathawh zawh huna a nawm tur zia te kan sawi phei pah bawk a, motor insulpel turte tan pawha horn pek ngai miah lo leh speech thlahdul chuang hauh loa a tlan par par theih tawh dawn thute kan sawi a. 

Chutih rual erawh chuan an kawngpui laihna leivung paih dan chuan thin a tirim viau thung si a. Kawngko, feet 60 vel lai tura sang tein an lai a, a zawn kawngthlang lamahte chuan a rem dan danin an paih liam leh mai thin bawk a. Kawngthlang lama thing tha tak tak leh mau hring dupte chu a delh chhiain nasa takin a chhilh bo a. Kawng ko an laih ang bawk chuan kawng thlanglam chu leivung chuan a chhilh bawk tih a hmun atang leh ral hla atanga thlir chuan tah a chhuak ngawih ngawih zawk a ni. 

Lunglei hnaih tawh lama Dawn khaw chung leh hnuai lama vah loh ram kang fere tak tak hmuh phei chuan insum har ti takin mittui tla dawn dawnin ka thlir a, ka tah hi a chhuak em em a, hmeichhe awm nem deuh ni ila chuan tah hawm hawm ka chak viau a ni. A pawi hi ka ti takzet a, An vah chin kang chu a hriatthiam theih em em rualin an vah loh lai, ram tha lai zau tak taka kang chhia ka hmuh chuan pawi hi ka ti hle. Engtinnge hetiang system hi kan tihdanglam theih ang? Tih hi khawtlang hruaitu tinte hian ngaihtuahna nei sela a duhawm hle a, kumtina hetianga ram tha lai kan vat a, kum khat atan chauh lo neihna atana kan hmanga a kum leha hmun dang kan vat leh thin ang system hi tihdanglamna awm sela Environment humhalhna lam Awareness hi neih uar nise a duhawm hle a ni. 

Thingtlang lo neih hi kan bansan tak tak theiin a rinawm loh avangin kan ram ngaw tha hi kan vat chereu zel dawn chu a ni mai si a, boruak vawng daitu kan nei lo telh telh chauh a ni lo a, nungchang tam tak, chungleng sava leh ramsate hram thawm hriat tur a awm lo telh telh bawk ang a, mihring hi keimahni chauh hian kan la awm mai tur a sin. Chutih hunah zet chuan kan khawharna hian van a tawng ngeiin a rinawm a, ramsa leh sava lem te, ram ngaw nuam tak lem te hi kan hmuh phak tawk ala ni hial maithei a ni. Chutianga thinrim teuha kawng tluana ka awm lai chuan kan piah hla taka ram ngaw te chu ka thlir phak tawk ka thlir pah zel bawk a, a chang phei chuan ding meuha thlir chang pawh kan nei bawk a. 

Ram ngaw tha hmuh tur a vang hle mai a, sava hram ri hriat tur awm lo te chuan khua a ti har viau mai bawkin kan kawngpui laihna leivungin kawng thlang lam alo chhilh nasain thing tam taka lo chhilh khawlohte han hmuh phei chuan hnathawktute hauh mai a chakawm rum rum hial a. Keini lo hauh ve ngawtin awmzia a awm dawn bawk si lo tihte ka ngaihtuahnaah alo awm nghal bawk avangin thinrim taka melh chungin kan tlan pel zelin Khawtina ram ngaw humhalh tura hrilh phei zel mai a chakawm viau a ni. 

Hetianga ram ngaw kan tih chhiatte hian ngai awh leh turin kum engzatnge an mamawh ang tih te hi ka chhut thiam hauh lo nain kum sawm aia tam an mamawh ngei ka ring a, chutianga ngai an awh leh hma chuan engtiang takin nge hmun dang alo chhiat bawk ang tihte ka ngaihtuahnaah alo awm nghal bawk a, pawi hi ka ti em em a ni. An hnen atanga boruak thinghlim kan dawn hlut ziate hi hre thar ila, a thlawn liau liau Oxygen kan dawn man tam zia te hi hre ta vek ila chuan hetiang hian ram ngaw tha hi kan ti chereu duh hauh lo ang maw le tihte ka thinlungah a awm bawk rualin mihring hian zir tur kan va ngah tak em ka ti a, chhungkaw tinte, pawl tinte leh sorkar lam te ngei pawh hian Environment humhalhna lam hi uar takin sawi ṭheuh ila hma kan sawn deuh angem te ka ti a ni.